ЕРКЕ ЕСІЛДІҢ БОЙЫНА ЕЛ ҚОНДЫРҒАН

“Еділдің бойы ен тоғай, ел қондырсам деп едім, жағалай жатқан сол елге мал толтырсам деп едім” – Махамбет ақынның осы жыр жол­дары ойға оралып отыр. Алтай мен Аты­раудың арасындағы қыран ұшса қанаты тала­тын, құлан жортса тұяғы тозатын алып дала­ның  төсіне ел қондыру, жағалай  қонған сол елге мал толтыру арғы-бергідегі ата-бабала­рымыздың баршасының аңсаған арманы еді. Сан түрлі себептермен ол арман орындалмай келді. Мұның басты себебі тәуелсіздігіміздің қолға тимеуі болатын. Егемен ел атанып, көк байрағымызды көк жүзіне желбіреткеннен кейін Елбасымыз алдымен кең-байтақ даламызға ел иесінің, жер киесінің орайлы орналасуын ойлас­тырды. Осыдан дәл 16 жыл бұрын, 1994 жылдың 6 шілдесінде республика астанасын Алматыдан Ақмолаға ауыстыру жөніндегі ұсынысын Парламент талқылауына шығар­ды. Шешім қабылдаттырды. Иә, Парла­мент астана ауыстыру жөнінде шешім қабыл­да­ғанда осы идеяны қолдағандардың өзі бәрі бірдей Елбасы ұсынысының халық тағдырын, тәуелсіздік тағдырын шешетіндей тарихи мән-маңызын толық түсініп, өзегінен өткізе қойды, жүрегіне жеткізе қойды деп айту әділдікке онша жанаспас еді. Депутаттар ше­ші­міне олардың Елбасына қалтқысыз құрметі, елді бастаған ерге сенімі де әсер еткені анық. Мұны дәл сол кезде толық түсіну оңай да бол­май­тын. Еліміз жасампаздық жұмыстан гөрі жан бағудың қамына көбірек бас қатырып тұрған кезең. Адамдар айлап айлық алмайтын, зейнетақы мен шәкіртақы үздік-создық, оның өзінде там-тұмдап төленетін сол қилы кезеңде астана ауыстыру, бүкіл қажетті инфрақұры­лым­ды қайта жасап шығу, шын мәнінде жаңа қала салу деген нағыз фантастикалық идеяның өзі сияқты көрінетін. Ойымдағыны ірікпей айтатын табиғи мінезіме басып, астананы көшіруге байланысты көңілімдегі күдік-күмәнімді бір айтып қалғанымда Нұрсұлтан Әбішұлының маған не дегенін осыдан 2 жыл бұрын осы “Егемен Қазақ­стан” басшысына берген сұхбатымда келтір­генмін. Қайталай кетейін. “Сен ондайды қой”, деген еді сонда Президент. “Біз мы­нандай территорияға елдің бір шетінен қарап отырып, ие бола алмай қалуымыз да мүмкін. Арқада, солтүстік облыстарда демография­лық ахуалды қалайда өзгертуіміз керек. Мына елдің негізгі иесі кім екенін бүкіл әлем білуге тиіс. Елдің иесі елдің қиыр-қиырына бірдей қарап отыруға тиіс. Тым болмаса соны түсінсеңдерші. Экономи­каны ел орталығынан басқарған тиімді. Ақмо­ла тоғыз жолдың торабында тұр, облыстардың астанамен байланысы да оңайлайды” деп бастап, біраз жайды түсіндірген. “Бұл мен үшін емес, бұл ел үшін керек, елдің ертеңі үшін керек, мұның мәнін қазіргі адамдар толық ұғар-ұқпас, бірақ болашақ ұрпақтары­мыз ұғатын болады”, деген сонда Елбасы. Мұның мәнін қазіргі адамдардың өзі то­лық ұғып үлгерді деудің реті бар Астананың алғашқы мүшелінің тұсында. Иә, бүгінде астана ауыстыру экономика­лық шешім немесе қоғамдық-саяси қадам ғана еместігі, бұл тіпті мемлекет құру тетігі идео­ло­гия­сына түзету енгізу ғана еместігі, мұның өзі идеяларды жаңартудың, тәуелсіз мемлекет­тің тарихи “Менін” айқындаудың дәл өзі екендігін барша жұрт біліп болды. Елбасының талай шешімін талай қырынан сынға алып жататын­дардың өзі қазір астана ауыстырғаны­мыз қате шешім дегенді ауызға алмайды. Ауыз­ға алса күлкіге қаларын олар да біледі. Астана – бүгінде бүкіл әлем мойындаған ақиқат. Қазақстан Республикасының Тұңғыш Пре­зиденті – Елбасы Н.Ә.Назарбаевтың саяси қолтаңбасының басты сипаттарының бірі – қашанда стратегиялық тұрғыдан ой­лауы. Сол ойластырғанын нақты іске айнал­дыра алатын қасиеті. “Астана” жобасы бә­­рінен бұрын Қазақстан халқының алға ұм­тылуын ұйымдастырған ұлы жұмылдырғыш қуатқа ие екендігімен ерекше бағалы. Жаңа астана Қазақстанның жаңа символына, тәуелсіздіктің жүйелік атрибуттарының біріне айналуға, кешегі кеңестік кезеңмен қоштасуға берік бел байлағанымыздың белгісі болуға тиісті еді. Солай болды да. Астана феномені әлі де толық ой еле­гі­нен өткізілді деу қиын. Мысалы, саясат­та­нуда, экономикада реформалар “төменде” туындап, алдымен халықтың өз ішінде пісіп-жетілуі керек, сонда ғана олар өміршең болады делі­не­ді. Негізінен солай екені рас. Ал Нұрсұлтан Назарбаевтың астана ауыс­ты­ру реформасы “жоғарыда”, жоғарыда бол­ған­да да бір адам­ның ғана ойында пісіп-жетілді ғой, алғашқы кезде бұл идеяны тіпті Президент айналасы­ның өзі де толық түсі­ніп, толық қолдай қойған жоқ қой. Демек, ұлт тағдырының тізгінін қолға алған, хал­қы­ның қалтқысыз сеніміне ие бол­ған көш­бас­шы бастаса реформалар “жоға­рыдан” да же­міс­ті жүргізіледі. Жалпы, Нұрсұл­тан Назар­баев­тың ел басқару тәжірибесінде қасаң қалып­тардың құрсауын талқандайтын талай тұстар бар. Соның бірі де, бірегейі де – қазір жасам­паз­дық жұмысымыздың жақсы жемісіне, жар­қын жеңісіне айналған Астана. Жалпы­ұлттық идеяның салтанатына айналған Астана. Ел ордасын ауыстыру жөнінде шешім қабыл­дан­ған­нан 5-ақ жыл өткенде, Астананың ха­лық­аралық тұсаукесерінен 1-ақ жыл өткенде әлем танып, ЮНЕСКО шешімімен “Әлем қа­ласы” атанып үлгерген Астана. Бұл атақ пла­не­тамызда аз уақыттың аясында әлеуметтік-экономикалық, саяси және мәдени дамуда тамаша табыстарға қол жеткізген, ұлтаралық,  конфессияаралық келісімді нығайта білген қалаларға беріледі. Цифрларды сөйлетіп көрейікші. Халықаралық тұсаукесері өткен 2008 жылы халқының саны небәрі 200 мың адам­дық Астанада қазір 700 мыңға жуық адам тұрады. 1997 жылы осындағы өңірлік жалпы өнімнің көлемі 300 миллион доллардан аспа­са, өткен жылы бұл көрсеткіш 9 миллиард АҚШ долларына жетті. Қаржыландырудың барлық көздерінен салынған тұрғын үй құрылысының көлемі 1 миллион 260 мың шаршы метрге барды, мұның өзі 1998 жылғы көрсеткіштен 10 есе артық. Сол жылы кәсіпкерлік салада шағын бизнестің небәрі 7716 субъектісі болса, қазір олардың саны 74700 бірлікті құрайды, демек бұл көрсеткіш те 10 есе артық. Шағын және орта кәсіп­керлік өнімінің көлемі 300 миллиард теңгеге жетіп, 1998 жылғыдан 11 есе асып түсті. Даму­дың мұндай қарқынын сіз әлемнің бірде-бір елінің астанасынан таба алмайсыз. “Астана бүкіл Қазақстан дамуының локомотивіне айналуы керек” деген Елбасы сөзі дәл келді. Астана құрылысына елдің 71 қа­ласы, 432 құрылыс компаниясы атсалыс­ты, құрылыс материалдарын 135 зауыт жеткізіп беріп тұрды. Астана біздің халқымыздың өз күшіне сенімін нығайтты. Астана Президент Нұр­сұл­тан Назарбаевтың басшылығымен қолға алынған қандай жобаның да жүзеге асатынына күмән қалдырмады. Елорданы Алматыдан Арқа төсіне ауыс­ты­рудың саяси тұрғыдан да, экономикалық тұр­­ғы­дан да, экологиялық тұрғыдан да, гео­гра­фия­лық тұрғыдан да толық ақтағандығы талассыз. Бірнеше жыл Алматы әкімі қыз­ме­тін атқарған адам ретінде мен тау баурай­ындағы қазаншұңқырда қалған Алматының дамуы қандайлық факторлармен тежеліп тұрғанын жақсы білемін. Алматының эко­логиялық жағдайынан барша жұрт хабардар. Елорданы ірі көлік-коммуникациялық то­рапқа, елдің индустриялық-өнеркәсіптік, аг­рар­лық және шаруашылық өмірінің эпицен­тріне көшіру бүкіл Қазақстан аума­ғын­дағы саяси және әлеуметтік-эконо­ми­калық үдеріс­терді әлде­қайда тиімді және жедел басқарып отыратын­дай жағдай жасаға­нын қазір түсіндіріп жатудың өзі артық. Қаламыз бүгінде Қазақ­стан­дағы ғылыми-техникалық прогрестің қозғаушы күші ретінде индустриялық-инновациялық жаңару бағдарламасының түйінді стратегиялық белгісіне айналған. Есілдің екі жағын қатар жайлап жатқан аяулы Астанамыз осы заманғы жоғары тех­но­ло­гиялық ғимараттар тұрғызылған сәулет стилімен де сүйсіндіреді. Қала келбетінде ұлттық бояу мен еуропалық үрдістер жақсы жара­сым тапқан. Кисе Курокава, Норман Фостер сияқты осы заманның талассыз ұлы сәулетшілерінің қанатты қиялынан қалыпта-сып жатқан асыл Астана Мемлекет басшысы идеясын материалдық жүзеге асуының келісті көрінісі ретінде жүрек тебірентеді. Астананың болашағы да жарқын. Ел Президенті Н.Ә.Назарбаевтың 2006 жылғы 17 наурыздағы Жарлығымен қаланың 2030 жылға дейінгі тұрақты дамуының стратегия­­лық жос­пары бекітілген. Қазіргі таңда қала өнеркәсібін өркендету, елорданың инвести­циялық тар­тымдылығын арттыру бағытында көп жұмыс атқарылуда. “Астана – жаңа қала” аталатын арнаулы экономикалық ай­мақ осындағы жаңа әкімшілік-іскерлік орта­лықты құру мен Индустриялық паркте жаңа өндіріс орында­рын ашуды көздейді. Ондағы 6 мың гектардан астам аумақта 256 нысан тіркелген. 2009 жылы жаңа орталықтың ау­ма­ғында шетелдік инвес­торлар қаржылан­ды­ратын “Абу Даби Плаза” және “Central Park” кешендері жобала­ры бас­талды. Индустрия­ландырудың өңірлік карта­сына сэндвич панельдер шығаратын зауыт (“Кровля НС” ЖШС), жиһаз фабри­касы (“Ақ Нұр” ЖШС), көкөніс қоймасы (“Астанапром” ЖШС) сияқты жобалар енгізілген. Біздің жоспарларымыз ауқымды. 2015 жылға қарай Астана бәсекеге қабілетті эко­но­­микасы, тартымды бизнес-ортасы бар қа­ла­­ға, инновациялық дамуы мен қуатты кадр­­лық әлеуеті бар экономикалық орталыққа, тұрғындар үшін, ел азаматтары мен туристер үшін нағыз тартымды мекенге айналады. Болашақта Астананың Еуразия конти­нен­­тінің орталығы ретіндегі тарихи мәр­те­бесін сақтау үшін оның алдында мынадай мін­деттер тұр және сол міндеттерге сәйкес ша­һар дамуының келесі бағыттары айқындалған: бірінші – елорданың дағдарыстан кейінгі табысты дамуы; екінші – жедел индустрияландыру жолымен экономиканың тез қарқынмен әртараптандырылуы; үшінші – елордадағы адам ресурста­рының бәсекеге қабілеттілігін арттыру; төртінші – қала тұрғындарын сапалы әлеуметтік және тұрғын үй-коммуналдық қызметпен қамтамасыз ету; бесінші – қаланың тұрақты дамуы үшін елордалықтардың бірлігін нығайта түсу және қоғамның топтасқандығын қамтамасыз ету. Қала экономикасын дамытуда оны жедел әртараптандыру міндеті тұр, брэндтік өнім­дер шығаратын бірлескен жаңа кәсіп­орындар құру жоспарланған. Оның кейбіреулері қазірдің өзінде салынып жатыр. Бұл мақсаттарды іске асыруға бағыттал­ған шаралар елордада іскерлік ахуалды дамыту үшін қолайлы орта құру арқылы шағын және орта бизнестің өркендеуіне қолдау көрсетуді қамтиды. АЭА-ның құрылыс аймағы аумағында Ұлттық ғарыш агенттігі “Жинау-сынақ кешені” жобасын іске асыруды бастамақ, оның негізінде осы заманғы спутниктер жиналатын болады. Биыл “Химфарм” АҚ-тың “Фармацевтикалық фабрикасын”, “Ас­тана ЭкоСтандарттың” жылыжай кеше­нін салуды бастау жоспарланған. Құрылыста инно­вация­ларды, ғылыми-зерттеу нәти­же­лерін пайдала­нуға артықшылық жасалады, бұл жаңашыл­дықтар тұрғын үй салу сала­сында жаңа технологиялар әзірлеуге бағытталады. Астанада халықаралық стандарттарға бейімделген білім алудың сапалық жаңа деңгейіне көшу қамтамасыз етілетін болады. Қазірдің өзінде жұмыс істеп үлгерген “Назар­баев интеллектуалды мектептері” жобасының аясында халықаралық деңгейдегі “Назарбаев университеті” ашылды. Жаңа университет ар­қауында, Елбасының биылғы Жолдауында ай­тылғандай, үш ғылыми орталық құрылады. Мұ­ның өзі “Болашақ” бағдарламасы бойынша кей­бір саладағы кадрларды шетел универси­тет­терінде емес, өзімізде дайындауға жағдай жасайды. Денсаулық сақтау саласында Нұрсұлтан Әбішұлының тікелей қамқорлығымен және қатысуымен ашылған медициналық қызмет орталықтары әлемнің дамыған елдерінен еш кем соқпайтын кластердің құрылуына жол аш­ты. Қазір елордада бұрын бізде ешқашан жа­салмаған операциялар  жасау мүмкіндігі туды. Инженерлік инфрақұрылымды дамытуда оларды түбегейлі жаңғырту, жаңа энергия көздерін салу және жөндеу шаралары қолға алынып, сол арқылы елорда энергия тапшы­лығы проблемасын түбегейлі шешпек. Бұл мақсатқа жету үшін ТЭЦ-1-ді реконструк­циялау, ТЭЦ-2-ні кеңейту жалғасып, үшінші жылу-энергия орталығын салу басталады. Соның негізінде коммуналдық шаруашылық нысан­дары, сумен жабдықтау жүйесі дами­тын болады. Тұтыну­шыларға үздіксіз сапалы су, жылу және электр энергиясын беру қам­тама­сыз етіліп, олардың шығыны барынша азаяды. Жаңбыр суы канализациясын және тазарту құ­рылғыларын салу бүкіл қала ау­мағында бас­талып, қаланың абаттандырылуы жоғары деңгейге көтерілді. Елорданың алғашқы кезеңі мен мүшел жасқа қадам басқан қазіргі шағын салыс­тырар болсақ, қаланың орасан қарқынмен өскендігін байқау қиын емес. Мұндай өске­леңдікке көз сүйсініп, көңіл қуанатындығы анық. Сонымен қатар қала тұрғындары сұранысының толық қана­ғаттандырылмай отырған кейбір жақта­рын да білемін. Тех­никалық тұрғыдан қарай­тын болсақ, солар­дың ішінде сапалы көлік қызметіне деген сұраныстың барған сайын өсіп отырғаны және оның толық мәнінде өтелмей отыр­ғаны, сонымен қатар адами тұрғыдан кел­ген­де ата-аналардың балабақша­ларға, мек­теп­терге деген талап-тілегінің орын­далмай келе жатқаны жаныма қатты батады. Өзіміз де ата-анамыз, сондықтан екінші мә­селеден бастайық. Бұрынғы провинция­лық қалада мектепке дейінгі тәрбие меке­мелерінің жетіспеушілігі байқала бермесе, осы жылдары қала тұрғындары санының 3 еседен астамға көбеюі бұл проблеманы барынша өткір қойған­дығы сөзсіз. Былтырғы жылғы Елбасы тапсырмасына дейін де кейбір шаралар қолға алынған болатын. Ал нақты міндет қойылған соң бұл шаруаны қолға мықтап алдық. Шынын айтсам, кейбір тапсырмаларды қуана жүріп орындайтының бар. Дәл сондай жәйт осы балабақшаларды ашуға байланысты болып отыр. Енді бірер жылда жұртшылықтың өтініштері көп ретте қанағаттандырылатынына сенімдімін. Көлік жүйесін техникалық дамыту мә­се­ле­сі көшелер мен көлік инфрақұрылымының ны­сандарын, қаладағы көліктер жай-күйінің жақ­сарғанын және олардың жүруін, халық­тың ав­томобильденуін ескере отырып, түбегейлі мақ­сатты шаралар қабылдау арқылы шешілуі тиіс. Қала көшелеріндегі қозғалысты ұйым­дас­­тыру мен басқаруды нағыз өнер деуге болады. Кез келген адам баратын жеріне ең қолайлы маршрутты таңдап, тезірек жетуді ойлайтыны белгілі. Ал енді сол жерге бір­неше маршрутпен барынша аз уақытта жету мүмкіндігі болса тіпті жақсы ғой. Бұл мін­дет­ті жүзеге асыру үшін 23 көлік жолай­рығын, 156 шақырым автомобиль жолдарын төсеу мен реконструк­ция­лау, 25 жерасты және жерүсті жүргіншілер өткелдерін салу арқылы жүзеге асырмақпыз. Сәулет және қала құрылысы басқармасы мен “Астана қаласының бас жоспары ғылыми-зерттеу жобалау институты” МҚК бірлесіп, Астана қаласының 2040 жылға дейінгі көлік стратегиясын әзірлеуді бастады. Мұнда тіпті ғимараттар мен үйлердің құрылысын  қала көшелері желісінің мүмкіндіктерін негізге ала отырып салу айқындалған. Қазірдің өзінде ат­қарылған шаралар арқылы Астана көше­леріндегі жүрісті реттеу және өткізу қабілетін арттыру мүмкін болды. Қысы суық, жазы ыстық, жауын-ша­шы­ны да аз емес қала көшелерін асфальттаудың да мәселелері жетіп артылады. Қазіргі кезде қиыршық тастар негізгі каркас болып, оның аралығы ұсақталған құммен және целлюлоза минералдық ұнтағымен араластырылған битуммен толтырылады. Қазір елордада жолаушылар тасымалы көліктің төрт түрімен жүзеге асырылады. Олар – автомобиль, темір жол, әуе және су көлік­тері. Ал қаланың серпінді дамуы және жол инфрақұрылымы дамуының төмен қарқыны осы заманғы инновациялық жедел жүрісті көлік жүйесінің қажеттігін туын­да­тып отыр. Шаһарды дамытудың бас жос­парына сәйкес “Астана қаласының жаңа көлік жүйесі” жоба­сын іске асыру қолға алынды. Бұл жобада эста­кадалық нұсқадағы жедел жүрісті жеңіл рельсті көлік жүйесін салу көзделіп отыр. Осы мақсатқа сәйкес былтырғы жылы Астана қаласының әкімдігі мен француздың “Альс­том” компаниясы арасында жаңа көлік жүйесі жобасын әзірлеу мен қаржыландыруға бай­ланысты меморан­думға қол қойылды. Қазіргі кезде Фран­ция­ның Экономика минис­трлігінің грантына “Egіs ВСЕОМ Іnternatіonal” ком­па­ниясы ұзындығы 27,9 шақырым шеңбер жол жобасының бірінші кезеңінің техника­лық-экономикалық негіздемесіне түзету енгізуде. Елордаға жоғары дәрежедегі басшылар жиі келеді. Елбасы Нұрсұлтан Назарбаев сол мәртебелі меймандардың қала құрылысына қатысты инвестиция салу, нақты мәселе­лер­ге сол елдердің компанияларын тарту ісін үне­мі назарда ұстайды. Мәселен, былтырғы жылы Астанаға ат басын тіреген Франция Пре­зиденті Николя Саркозидің сапары да сондай тұрғыда пайдалы болды. Жоғарыда айтқан шаралар сол негізде жүргізілгені белгілі. Астанаға сапармен келген Ресей, Қытай, Түркия, араб елдері басшыларының қала құрылысына атсалысқанын мақтанышпен айта аламыз. Бұл тұрғыда Сенат пен Мәжіліс ғимараттарының, орталық мешіттің, басқа да кешендердің тұрғызылғанын атауға болады. Астананың салынуы және қарыштап дамуы Қазақстанға ғана емес, басқа да шет мемлекеттерге пайдалы болып отырғанын атап өткен жөн. Қазіргі нарық заманында салынған инвестиция оны салған ел үшін пайда келтіретінін ұмытуға болмайды. Бұл орайда Астана инвестициялық форумының да тиімділігі зор. Ал осы жылдың 7 маусы­мын­да “Astana Іnvest 2010” халықаралық инвестиция­лық форум болды. Бұл шара қолайлы инвестициялық ахуалды жақсартуға және Астана экономикасына тартылған отандық және шетелдік инвестициялар ағынын одан әрі ынталандыруға, Қазақстан елордасының әлемдік рыноктағы имиджін ілгерілетуге ар­налған. Форумға қатысқан әлеуетті инвестор­лар Астанада бизнес жүргізудің экономикалық, құқықтық және басқа жағдайларын зерттеп, инвестициялық жобалардың тұсаукесері бары­сында қаланың ин­вестициялық әлеуеті­мен та­ны­су мүмкін­дігіне ие болды. Форумда жалпы құны 7 млрд. долларлық 113 жобаның тұсаукесері өтті. Оның 51 жобасы құрылыс нысандары бол­са, 42 жоба кәсіпорындарға, 20 жоба мем­лекеттік-жекеменшік әріптестікке арналған. Қорытындысында жалпы сомасы 2 млрд. долларлық 8 меморандумға қол қойыл­ды, 3 меморандум бойынша қазіргі кезде не­сиелік келісім-шарт жасалуда. Шетелдік капи­талға орасан зор құрылыстар жүргізіп, кәсіп­орын­дарды іске қосу бүкіл әлемде орныққан үрдіс. Астана әкімдігі алдағы кезде де бұл ба­ғыт­­тағы шараларды жалғастыра беретін болады. Шаһар экономикасын дамытудың бір жолы оның имиджін көтеріп, туристік әлеуе­тін арттыру деп білеміз. Қазіргі кезде елі­міздің барлық өңірлерінен асқақ Астананы тамаша­лауға келушілер көбейіп отыр. Сол секілді шет елдерден келушілерді көптеп қызықтыру да маңызды саналады. Қаланың мұндай келбетін айшықтай түсуге оның әуежайынан, қонақ үйлерінен бастап барлық қызмет түрлері әсер ететінін жақсы білеміз. Біз үшін қаланың атын әлемге жайып отыр­ған “Астана” велошабан­доздарынан, “Ба­рыс” хоккей клубынан, үздік баскетбол клу­бы­нан бастап өнер саласындағы майталман­дары­мызды қоса алғанда бәрі де қызмет ететіндігі сөзсіз. Өзінің мүшел жасына қадам басқан Аста­на­ның қалай өркендеп, қалай даму керектігін жақсы білеміз. Мұны елорданы тұрғызушы, оның бас сәулеткері Нұрсұлтан Әбішұлы әр­дайым есімізге салып отырады. Еліміз тәуелсіздік алып, Қазақстанның төрт бұры­шындағы облыс атаулары арқылы елдің тұтас аумағын белгілеген кезден бастап Елбасымыз­дың күндіз ой-санасында, түнде түсінде көре­тін елордасын сол мақсат-міндеттерге сәйкес өркендете білсек, бұл олжадан келгеніміз. Қазіргі барлық қызме­тіміз сол мақсатқа бағындырылған. Елорда мен Елбасы егіз ұғымға айнал­ғалы да талай уақыт болды. Бүгінде хал­қымыз елорданы Елбасының ерен ерлігі, елі­нің ертеңін ойлап жасаған ұлы шешімі деп біледі. Сол үшін де құрмет тұтады. Астана ауыстыру туралы шешім кезінде Елбасының туған күнінде қабылданған. Бұл – ұлы күн. Бұл күн біздің халқымызға ғасырлар бой­ғы өкінішінің өтеуіндей етіп Нұрсұлтан Назар­баевты сыйлады. Бұл күн біздің халқымызға тәуелсіздіктің тамаша табысына айналған тамаша шешімді сыйлады. Өркениетті әлемде мұндай даталар бө­лекше ардақталады. Мысалы, АҚШ-та елдің тұңғыш президенті Джордж Вашингтон туған күн – 22 ақпан Президент күні — мем­лекеттік мереке ретінде аталады. Біздің елі­мізде де 6 шілденің бүкілхалықтық мереке бо­лып белгіленуінде әрі жарасымды заң­ды­лық, әрі ғажайып тарихи әділеттілік жатыр. Туған күніңмен, еңсеcі биік Елорда! Туған күніңізбен, елі сүйген, елін сүйген Елбасы! Иманғали ТАСМАҒАМБЕТОВ, Астана қаласының әкімі.