Шығыс айналма жолы шаһарға шырай қосты

Жақында газетіміз басшысын қабылдаған кезінде Алматы қаласының әкімі Ахметжан Есімов: “Алдағы Азиадаға дайындық барысында қала біршама көркейіп, қаншама көшелер мен даңғылдар жаңа түрге енді. Айналма Шығыс жолының да негізгі бірінші кезегі аяқталып, қатарға қосылды. Мұның өзінің орталықтағы көлік кептелісі мен қыспағын жеңілдетіңкіреуге әсері сезілуде. Әрі трафик, әрі экология”, деп қуана хабарлаған болатын. Мінеки, кешегі оңтүстік аста­на­ға сапары кезінде Президент Нұр­сұл­тан Назарбаев нақ осы Әл-Фа­ра­би және Достық даңғылдарының қиылысынан басталатын Алматы­ның Шығыс айналма автожолының құрылысында да болды. Әзірге бұл тамаша жолдың Балтабай көшесіне дейінгі бірінші кезегі аяқталған. Осы арада Мемлекет басшысы осы­нау бірегей нысанның макеті­мен танысып, құрылыстың егжей-тегжейіне қанықты. Қала әкімі Ахметжан Есімов осыған бай­ла­ныс­ты жағдайды баяндай келе, ай­налма жол қалаға шеттен келетін кө­лікті айтарлықтай азайтуға мүм­кіндік туғызатынын атап көрсетті. Бұл өз кезегінде ауаның ластануын кемітеді. Ұзындығы 7,8 шақырым бола­тын Шығыс айналма жолы – көлік жүретін күрделі құрылымдық жүйе. Айтар болсақ, басқа да кішігірім жа­санды құрылыстарды қоспа­ған­да, бұл – жолайырық, кіші Алматы өзенінен өтетін жол өткелегі, Луганский көшесі арқылы тар­тыл­ған көпір астындағы айналымдық шеңбер, Горная көшесін көктеп өтетін тоннель, Жарбұлақ сайын­дағы металл көпір, сонымен бірге, ең ақырында, Халиуллин көшесі мен Құлжа күрежолының қиылы­сындағы көліктік шеңбер.  Жолдың басым бөлігі, яғни 5,6 шақырымы салынып болып, қазір ел игілігіне айналып үлгерді. Бұған бөлінген 57,4 млрд. теңгенің 42 миллиарды игерілді. Бір айта кететін жай, Қысқы Азия ойындарына келетін спортшылар мен жанкүйерлер осы автожол арқылы Алматыға соқпас­тан, спорттық нысандарға тіке заулап жете алады. Жолдың қалған бөлігінің құры­лы­сы келер жылдың соңына қарай аяқталады деп ұйғарылған. Дәл осы орайда мынадай проблема да туын­дап отыр: жер телімдерінің иелері соны мемлекеттік мұқтажға сатқан­дары үшін орынсыз жоғары бағалар қойып, көп ақша сұрап, байып қалуды көксеуде. Әңгіме кезінде Елбасы өзі назар аударған кейбір мәселелер бой­ын­ша сұрақтар қоя отырып, нысан­дар­ды тұрғызу барысымен, үй-жайларды бұзу ахуалымен мұқият танысты. Құрылыстың бірінші ке­зегінің алаңында Нұрсұлтан Назар­баев журналистермен шағын бри­финг өткізді. – Біз Алматының экологиясын жақсарту үшін қолдан келгеннің бәрін істейміз, – деді Мемлекет бас­шысы. – Қиындықтарға, атап айтқанда, елді индустрияландыру үшін мемлекетке қаржы керектігіне қарамастан, біз осы ғажап қаланың экологиясын сауықтыруға қажетті қаржы бөлудеміз. Себебі, бұл – зор маңызы бар іс. Нұрсұлтан Әбішұлы сондай-ақ газ отынымен жүретін жүздеген автобустар сатып алуға қыруар қар­жы жұмсалып, жолайырықтар са­лы­нып жатқанын еске салды. Соны­мен қатар, қаланы автокөлік қыспағынан жеңілдету үшін ай­налма жол да қажет. Жер телім­дерін сатуға байланысты Президент мынадай пікір білдірді: – Мен Үкіметке күмәнді жеке­ше­лендіру жүргізген, сөйтіп, телім­дердің құнын көтеріп отырған нақ­ты жер иелері мен жалған жер ие­ле­рін тексеруге тапсырма беремін. Мемлекет мұқтажына қажетті бар­лық жер заңдылыққа сәйкес сатып алынатын болады. Нұрсұлтан Әбішұлы қала тұр­ғындары мен жастарды қоғамдық игілікке қамқор жанашырлықпен қарауға, соңғы жылдары салынған бірегей нысандар мен көшелерді таза ұстауға шақырды. –Тұрғындар өз қаласын көзінің қарашығындай сақтап, аялауы тиіс, – деп түйіндеді сөзін Мемлекет басшысы. Қорғанбек АМАНЖОЛ.