Туелсіздік жылдарының мәртебелі биігі

Президент поштасынан Мемлекет басшысының атына көрнекті жазушы Шерхан Мұртаза мен Қазақстанның еңбек сіңірген қайраткері, жазушы Несіпбек Дәутайұлынан және Жамбыл облысының әкімі Қанат Бозымбаевтан хат келіп түсті, деп хабарлады Қазақстан Республикасы Президентінің баспасөз қызметі. Хат авторлары ЕҚЫҰ-ның VII Саммитінің қорытындыларына де­ген зор қанағаттанушылық сезімдерімен бөлісе отырып, осы­нау халықаралық форумда Астана декларациясының қабылдануы Ота­нымыздың абырой-беделін та­ғы да биіктете түскенін мақ­танышпен баяндайды. Өз хатында Қазақстанның ха­лық жазушысы Ш.Мұртаза: «2010 жылдың 2 желтоқсаны – қазақ та­рихына енетін күн. Бұл – Тәуел­сіздіктің 19 жылының мәртебелі биігі. Қазақтың қаперіне кіріп пе еді мұндай мәртебе, бұрын-соң­ды. Түсіне де енбеген. Армандап та көрмеген. Енді, міне. Айың туып оңыңнан, күнің туып со­лың­нан дейтін бақытты күнге жеттік. Ендеше, Президент Нұрсұлтан Назарбаевты – азамат ердің ба­ласы асып туған демегенде, не дейміз», деп толғанады. Көрнекті жазушы, Қазақ­стан­ның еңбек сіңірген қайраткері Несіпбек Дәутайұлының хатында еліміздің ЕҚЫҰ-ға төраға бо­луына және жоғары деңгейдегі ЕҚЫҰ-ның Саммитін табысты өткізуге, соның нәтижесінде тарихи мәні зор Астана деклара­циясының қабылдануына әлемдік деңгейдегі қайраткер, Елбасы Н.Ә.На­зарбаевтың зор үлес қос­қа­ны атап өтілген. Одан әрі Н.Дәутайұлы: «Бұл тарихқа Нұр­сұлтан Назарбаевпен бірге тұ­тастай қазақ деген халықтың ке­меңгерлігі мен кісілігі болып енеді. Мұны Тәуелсіздіктің жеткізген ұлы жеңісі, қазақ халқының жа­сампаздығы деп білеміз», дейді. Жамбыл облысының әкімі Қанат Бозымбаев өз хатында «Аса мәртебелі Нұрсұлтан Әбішұлы! Біз, жамбылдықтар, ЕҚЫҰ Саммиті жұмысының қоры­тын­ды­ларын орасан қанағат­танушылық сезіммен қабылдадық. Бұл жо­ғары деңгейдегі кездесулер Сіз­дің көп жақты саясатыңыздың көре­генділігі мен айқындылығын, әлем­дік қоғамдастықтағы Қазақ­станның беделін тағы да қуаттап берді», деп жазады. Қ.Бозымбаев Жамбыл облысының жұрт­шы­лығы Астана Саммитінің табысты өткеніне аса қуанышты екенін жеткізіп, Елбасы Н.Ә.Назар­баев­қа зор денсаулық және ел мүддесі жолындағы қызметіне табыс тілеген.