Ыстық ықылас, шынайы көмек

Әлеуметтік жағдайы төмен отбасылары жайлы айтқан кезде, ең алдымен, ойымызға мықты ден­саулық, өте жақсы білім,  дұ­рыс тамақтану және үй жағ­да­йында жақсы күтім деген сынды өмір­лік маңызы бар тіркестер ора­­латыны сөзсіз. Денсаулық жә­не білім алу – әл-ауқаттың негізгі құ­рамдас бөлігі екені де рас. Үкі­мет халықтың негізгі бөлігінің білім алуға, медициналық қыз­мет­терге қолжетімді болуы үшін бар­лық мүмкіндіктер жасауда. Әри­не, бұл қуанарлық жағдай. Десек те әлеу­меттік жағдайы төмен от­басы­лардың жақын маңда орна­лас­қан медициналық мекемелерге баруға да жағдайы бола бермейді десем, артық айтқандық емес. Бұл жағдай мектептерге де тән. Өкі­нішке қарай, қазіргі уақытта ақ­ша­сыз ар­тық қимылдауға бол­майды. Тіпті, тегін болып табыла­тын ме­дици­налық немесе білім беру ор­та­лықтарына бару үшін де ата-ана­лар балаларына кем дегенде жо­лы­на не тамағына ақша беруі қажет. Қазақстан Республикасының 2007 жылғы 27 шілдедегі «Білім ту­ра­лы» Заңын іске асыру мақ­сатында Үкіметтің 2008 жылғы 25 қаң­тардағы №64 қаулысында әлеу­мет­тік жағынан қорғалмаған білім алу­шылар мен күнкөрісі төмен отбасы­лардан шыққан білім алу­шы­ларға қаржылай және ма­териал­дық көмек көрсетуге бө­лі­нетін қара­жатты жұм­сау ережесі бекітілген. Үкімет қаулысын басшылыққа ала отырып, ата-анасының қам­қор­лығынсыз қалған балаларға, аз қамтылған, мүгедек, көп бала­лы отбасысынан шыққан бала­ларға жыл бойы көмек көрсеті­леді. Осы қаулыға сәйкес жұ­мыс­тар  біздің, М.Дулатов атын­дағы № 136 жалпы білім беретін мектепте де атқарылып жатыр. «Мектеп әкімшілігі тарапы­нан, әлеуметтік жағдайы төмен отбасынан  шыққан балалардың жаз­ғы демалыстарын тиімді әрі қы­зықты өткізуі үшін,  біздің мектепте әр түрлі спорт түрлері бо­йынша  жарыстар өткізіліп тұра­ды. Әсем қаламыз Алматының көрікті жерлеріне  саяхаттар ұйым­­дастырамыз. Сонымен қа­тар, әлеуметтік жағдайы төмен отбасынан  шыққан балалар асханадан  тегін тамақпен, кітапханадан оқулықтармен қамтамасыз етіледі», - дейді мектеп дирек­торы Е.Қуатбеков. Әлеуметтік маңызы бар осы жұмыспен мектебімізде жеті ұс­таз­дан құралған комиссия айна­лы­сады. Балаларға жұмсалатын  қар­жылай  және материалдық көмек үшін бөлінетін қаражаттың жұм­салуын сараптау осы комис­сияға  тапсы­рыл­ған.  Ата-анасы­ның қам­қор­лы­ғын­сыз қалған ба­ла­ларды, көп бала­лы отбасынан шыққан, өмір­лік қиын жағдайға тап болған, девиант­ты балаларды, тәр­биесі қиын­дарды, берекесі жоқ  отбасы­ларды анықтау, олар ту­ра­лы мәлі­меттер жинау, құжат­тарымен жұ­мыс істеуде осы ко­миссияның негізгі міндеті. Оқушылардың  тиісті уақы­тын­да демалып, оқу жүктемелері нормадан аспауы, денсаулық­та­ры­­на зиян келтірмеуі қадаға­ла­нып отырылады. Мектеп оқу­шылары өз еріктерімен мектепшілік, қалалық, республикалық, халықаралық білім сайыстарына, өзге де іс-шараларға үлкен қы­зығушылықпен қатысады. Сонымен қатар, біздің мек­тептің оқушылары  Алматы қала­сының әкімі А. Есімов пен аудан әкімінің ұйымдастыруымен жыл сайын қала сыртындағы жазғы демалыс лагерьлеріне барады. Мұ­ның өзі осы балаларға деген ыс­тық ықылас пен шынайы көмек. Гүлжан  ҚҰРМАНАЛИЕВА, М.Дулатов атындағы № 136 жалпы білім беретін мектептің әлеуметтік-педагогы. Алматы.