Әлем өткен аптада

Келісімді мақұлдады Өткен аптаның үлкен бір жа­ңалығы – АҚШ парламентінің се­наты Ресеймен арадағы страте­гия­лық шабуылдаушы қаруды қыс­қар­ту және шектеу туралы шарт­ты ратификациялады. Оны қолдап 71 сенатор дауыс берсе, қарсы болғандар – 26. Бұл мәселе Сенатта біраз тал­қыланып, айтарлықтай тартыс ту­дырды. Мұны, әсіресе, Ресей бұ­қаралық ақпарат құралдары ба­рын­ша даттап баяндады. Дегенмен де, оң шешім қабылданды. Қасиетті ме, қасиетсіз бе? КХДР өздерінің ядролық қа­руды пайдалана отырып қасиетті соғысты бастауға  толық әзір екендіктерін мәлімдеді. Бұл соғыстың қасиетті бола­тынына күмән көп. Оңтүстік Кореямен арадағы қақтығысты аран­датуға бастамашы өздері болғаны өз алдына, бұл соғыс тұтана қал­ған жағдайда, қырылатын кәріс халқы болмақ. Одан Пхеньянның нендей қасиет тауып отырғанын түсіну қиын. Ел тыншыды дегендей Сонау жыл басында басталған Таиландтағы бүліншілік біразға созылды. Сол қақтығысты басу үшін елдің астанасы Бангкокта және біраз провинцияда төтенше жағдай енгізілген болатын. Енді жыл аяғында үкімет бұл тәртіпті тоқтату жөнінде шешім қабылдады. «Қызыл көйлектілер» көтері­лісі аталған қарсылық әрекеттерін жасаушылар қазіргі ел үкіметінің басшысы Апхисит Ветчачиваның орнынан түсуін талап еткен. Көтерілісшілердің талаптарын үкімет орындаған жоқ.