Мен құрметті еңбек демалысындамын. Егемен еліміздің сонау өтпелі кезеңдердегі қиындықтарын бір кісідей білемін. Тәуелсіздігіміз тұғырлы болған 25 жылда әлеуметтік сала қарыштап дамыды. Алыс ауылдардағы ауруханалардың материалдық-техникалық базасы жаңартылып, жабылып қалғандары қайта ашылды. Көптеген денсаулық сақтау мекемелері пайдалануға берілді. Облыста тек «100 аурухана, 100 мектеп» мемлекеттік бағдарламасы аясында ғана ондаған ірі нысан салынды. Қазір қай елді мекенге барсаңыз да, сыңғырлаған мектеп, ақшаңқан аурухана мен дәрігерлік амбулатория алдыңнан шығады.
Тіпті, бір кездері жекенің қолына өтіп кеткен Мәдениет үйлері мен клубтар да күрделі жөнделіп, ауыл тұрғындарына қызмет етуде. Жаңадан салынғаны да жетерлік.
Облыс орталығында жаңадан пайдалануға берілген ауруханалар мен емханалар осы заманғы озық медициналық қондырғылармен жабдықталған. Соның арқасында облыста бұрын-соңды жасалмаған бүйрек ауыстыруға, жүрекке ота жасауға қол жетті. Бұл – денсаулық саласына Елбасы Н.Назарбаевтың қолдау көрсетуінің арқасы. Облыста бауыр ауыстыру да қолға алынды.
Қазір өңірдегі апатты және үш ауысымды мектептерді жаңарту бағытында тиянақты жұмыстар жасалуда. Таяу жылдары бұл мәселе де шешімін табатынына сенім мол. Себебі, биылдың өзінде қалада бірнеше орта мектеп, балабақша салынды. Мемлекеттік-жекеменшік әріптестік негізінде ондаған бала бақша ашылды.
Соңғы жылдары бала туу көрсеткіші арта түскені аңғарылады. Бұл қуанарлық жайт. Демографиялық жағдайымыз жақсарып келеді. Елімізде өмір сүру деңгейі көтеріліп, 73 жастан асты.
Шыны керек, әлеуметтік саладағы даму анағұрлым жоғары. Қазіргі мектеп пен ондағы құрал-жабдықтар, компьютерлік техника мен интерактивті тақталар біздің кезімізде түсімізге де кірмейтін. Осының өзі еліміздің экономикалық қуаттылығының айқын көрінісі.
Манаш ТАСЕМЕНОВА,
зейнеткер-ұстаз
АҚТӨБЕ