А.Пушкин атындағы Шығыс Қазақстан облыстық кітапханасында Ләйла Ахметованың «1941. Брест бекінісі. Қазақстан» атты кітабының тұсаукесері өтті. Аталған шараға өңір зиялылары, қаламгерлер мен журналистер және жастар қатысты.
Сондай-ақ, кітаптың тұсаукесерін Шемонайха, Бесқарағай, Абай, Жарма, Аягөз және Глубокое аудандық кітапханалары мен Үржар, Мақаншы аудандарындағы ауылдық кітапханалар, Күршім ауданының Теректі ауылдық кітапханасы онлайн жүйесі арқылы көруге мүмкіндік алды. Автормен кездесуге аталған кітапқа есімдері енген қаһарман жауынгерлердің туған-туыстары да келді.
Ләйла Ахметова бұл кітабында аты аңызға айналған Брест бекінісінде соғыс алдындағы кезең мен 1941 жылдың маусым айында болған оқиғаларды баяндайды. Зерттеу еңбегі 1941 жылы фашистердің алғашқы соққысын қарсы алған қамалда қызмет еткендердің тізімі жариялануымен және әрі қарайғы тағдырлары тарқатылуымен құнды. Олардың арасында шығысқазақстандықтар да бар.
– Қырқыншы жылдың ақпан айында Семейден әскер қатарына аттанғандар эшелонмен Брест-Литовскіге бағыт алып, олардың бір бөлігі Брест қамалына бөлінді. Биыл 1 мамырда мен Брест бекінісін қорғауға қатысқан 556 қазақстандықтың есімін таптым. Олардың ішінде 88 семейлік және 10 шығысқазақстандық жауынгер бар. Әрине, іздеу жұмыстары әлі жалғасады. Өйткені, қамалды қорғауға қатысқандар мұнымен шектелмейді. Сол себепті бұл бірінші кітап ретінде жарыққа шықты. Мәселен, Жарма ауданының Балажал кентінің өзінен 30 адам Брест қамалын қорғауға қатысқан. Мен архив құжаттарынан тек екеуін ғана таптым, – дейді әл-Фараби атындағы Қазақ ұлттық университетінің профессоры Ләйла Сейсенбекқызы. Кітап авторының айтуынша, 44-атқыштар полкі бойынша табылған көптеген құжаттарға сәйкес, полктің басым бөлігі Шығыс Қазақстан облысынан жасақталған. Алайда, ұрысқа қатысушылардың көпшілігі тұтқынға түскендіктен, көп жылдар бойы оларды Ұлы Отан соғысының қатысушылары санатына қоспаған.
Ләйла Сейсенбекқызы оқушылар ата-бабаларының соғыста жасаған ерліктерінен хабардар болуы үшін аталған кітаптың өңір мектептерінде көмекші құрал ретінде пайдаланылуын және Пушкин мен Абай атындағы облыстық кітапханаларда есімдері жазылған шығысқазақстандық жауынгерлердің тізіміне туған-туыстарының үн қатып, еңбектің одан әрі толыға түсуі үшін қолда бар деректерімен бөлісуін сұрады. Кездесуге келген майдангерлердің ұрпақтары мен ағайындары кітаптан Балғыбаев, Дмитриенко, Попов және басқа да жауынгерлердің есімін тауып, қуанысып қалды. Бұл ретте кітап авторы Ұлы Отан соғысының қаһармандарын бірігіп іздеуге бағытталған топ құрып, бірге жұмыс істеуге, осылайша іздеусіз кеткен жерлестердің ерлікке толы өмірін паш етуге шақырды. Айта кетелік, Ұлы Отан соғысы жылдарында Шығыс өңірінің өзінен 109 Кеңес Одағының Батыры шыққан болатын.
ӨСКЕМЕН