Отан игілігіне ортақ үлес

Парламент Сенатының Төрағасы Қайрат Мәми Маңғыстау өңіріндегі өрелі істерді оң бағалады Кеше Маңғыстау облысына жұ­мыс сапарымен келген Парламент Сенатының Төрағасы Қай­рат Мәми аймақ активімен кездесті. Біз бүгін Қазақстан Рес­пуб­ликасы Тәуелсіздігінің 20 жылдығының қарсаңында кездесіп отырмыз. 1991 жылғы 16 жел­тоқсанда Президент Нұрсұлтан Назарбаев «Қазақстан Республи­ка­сының мемлекеттік тәуелсіздігі туралы» Конституциялық заңға қол қойды. Осынау тарихи құ­жат­тың қабылдануымен қазақ халқының мемлекет құру туралы ғасырлар бойғы аңсаған арманы жүзеге асты, деп бастады өзінің сөзін Сенат Төрағасы облыс активімен кездесуі кезінде. Егемен даму жолына түскен Қазақстан тәуелсіз 20 жылда ғасырға бергісіз өркендеу жолынан өтті, тамаша табыстар мен жеңістерге жетті. Өтпелі кезеңнің барлық қиын­дықтарын еңсеріп қуатты, өркен­де­ген, әлемдегі беделді мемле­кет­тердің біріне айналды. «Қа­зақ­стандық даму жолы» деп атал­ған, табысты саяси-эконо­ми­ка­лық оң өзгерістер, ең алдымен, Президент Нұрсұлтан Назар­баев­тың салиқалы, сарабдал саясаты­ның, ерекше көрегендігінің, стра­тегиялық тұрғыдан байыпты шешімдер қабылдауының арқа­сын­да мүмкін болды. Президент Н.Назарбаев өзінің сөйлеген сөздерінде Қазақстан үшін ең басты игілік және ең жо­ғары қоғамдық құндылық – тәу­ел­сіздік болып табылатындығын әлденеше рет атап көрсетті, деп жалғады сөзін Қ.Мәми. Сон­дық­тан Қазақстан Республикасы өмір сүре бастаған кезден тәуелсіздік пен егемендікті нығайту мемлекеттік қызметтегі аса маңызды саяси басымдық ретінде қарас­ты­рылды. Бұл мақсатқа қол жеткізу оңай болған жоқ, көптеген қиын­дықтарды еңсеруімізге тура келді, алайда, Елбасы атап көрсет­кендей, біз одан шынығып, шың­далып және Отан игілігін одан әрі үстемелеуге дайын болып шықтық. Сенат Төрағасы келесі ретте Қазақстанның әлемдік қаржы дағ­дарысының зардабын алғаш­қы­лардың бірі болып еңсергеніне екпін түсірді. Бүгінде ол даму қарқынын одан әрі өрістетіп отыр, Үкіметтің бағалауы бойын­ша таяудағы 5 жылдағы эконо­ми­калық өсу 7%-ға жуықтайды. Бұл өсім Президенттің «Нұр Отан» партиясының ХІІІ съезінде сөй­ле­ген сөзінде алға қойған міндеттерімен үндесіп жатыр. Онда Ел­басы былай деген еді: «Біз әлем­нің бәсекеге қабілетті 50 елінің қатарына қосылу мақсатымыз туралы ешуақытта ұмытпауға тиіспіз». Бұл үшін таяудағы он­жыл­дыққа арналған Стратегиялық жоспар шеңберінде 2020 жылға дейін экономиканы 30%-ға дейін өсіру, Ұлттық қордың активтерін ішкі жалпы өнімнің 30%-ына дейін жеткізу, мұндағы шағын және орта бизнестің үлесін кемінде        40 пайызға жеткізу (2009 жылмен салыстырғанда) мақсаты қойы­лып отыр. Мемлекеттің страте­гия­лық құжаттарында белгіленген жоспарларды ескерсек, бұл мақсатқа қол жеткізуге барлық негіздер бар, деді Қ.Мәми. Сон­дай-ақ ол Президенттің «Бола­шақ­тың іргесін бірге қалаймыз!» атты Жолдауында, оның «Нұр Отан» партиясының ХІІІ съезінде және ұлықтау кезінде сөйлеген сөздерінде азаматтарымыздың әл-ауқатын одан әрі арттыру жө­нін­де міндеттер қойылғанын атап көрсетті. Жаңа әлеуметтік сая­сат­тың негізгі басымдықтары қазақ­стандықтардың тұрмысының, олар­­дың денсаулығының, қолже­тімді ыңғайлы тұрғын үйдің жоғары деңгейін қамтамасыз етуге бағытталған. Тәуелсіздіктің жиырма жы­лын­да демократиялық құрылыс саласы айтарлықтай дамыды. Қазақстан саяси дамудың әлемдік үрдістерін және елдің ұлттық мүдделерін оңтайлы ескеруге негізделген саяси жаңғыру моделін ойдағыдай құра білді. Ішкі саяси тұрақтылық және қоғамның топ­тасуы Қазақстанның елеулі жетістіктері болды. Қазақстан әлеу­меттік, этностық және діни жан­жал­дарды болдырмауға, олардың алдын алудың және құқықтық негізде реттеудің тиімді жүйесін жасауға қол жеткізе алды. 140 этностан тұратын халықтың бірлігі Қазақстан мемлекеттілігінің мызғымас қондырғысына айнал­ды. Әлемдік қоғамдастық Қазақ­стан­ды ұлтаралық және конфес­сияаралық бейбітшілік пен ке­лісімнің эталоны деп таныды. Сенат Төрағасы сонымен қа­тар еліміздің сыртқы саяси қыз­мет саласында ірі табыстарға қол жеткізілгеніне жан-жақты тоқ­тал­ды. Осы жылдар ішінде елі­міз­дің жоғары заң шығару орга­ны­ның Президенттің Қазақстан мемлекеттілігін ойдағыдай құру жөніндегі стратегиялық идея­лары­ның қолдаушысы болғанын, Парламенттің 1995 жылдан бастап 1860 заң жобасын қабылдай отырып, мемлекетіміздің норма­тив­тік-құқықтық базасын қалып­тастыру жөнінде үлкен жұмыстар жүргізгенін назарға салды. Парламент өткен сессия кезінде де бел­сенді жұмыс істеді. 141 заң қабылданып, оның ішінде 76 ха­лықаралық келісімдер ратифика­ция­ланды, бюджет және салық сая­сатын, сот жүйесін, құқық қол­дану саласын, әлеуметтік қам­сыз­дандыруды және еңбек мәсе­ле­лерін, әкімшілік рәсімдерді жетілдіруді, көші-қон саясатын және басқаларды реттейтін барлығы 52 заңға өзгерістер мен толық­ты­ру­лар енгізілді, деді Қ.Мәми. 1 қыр­күйекте өз жұмысын бас­тайтын Парламенттің алдағы жоспар­лары туралы қысқаша айтып өтті. Қазақстанның 20 жылдығы ме­рейтойын лайықты қарсы алу мәселесін тағы да ерекше атап өткім келеді. Осы атаулы оқи­ға­ның айрықша маңызына орай, Парламент Тәуелсіздіктің жи­ыр­ма жылдығы декларациясын қа­былдауды жоспарлап отыр. За­мандастарға және болашақ ұр­паққа арналған осы салтанатты саяси-заңдық құжатта Қазақ­стан­ның егемендік жылдары қол жеткізген басты жетістіктері атап көрсетіледі.  Парламентте алдағы уақытта қабылданатын Тәуелсіз­діктің жи­ырма жылдығы деклара­ция­сы барша Қазақстан халқының жаңа, жарқын жеңістері мен жетістіктері үшін берік негіз қа­лай­ды. Оны маңғыстаулықтар кеңі­нен қолдады, деп атап өтті Төраға. Еліміздің барлық аймақтары­ның ортақ күш-жігері мен табыс­тарының нәтижесінде Қазақстан мол жетістіктерге қол жеткізгені даусыз. Олардың ішінде Маң­ғыс­тау облысының алатын орны ерек­ше екені де шындық. Осыны айтқан Сенат Төрағасы қазақ хал­қының рухани тамырлары мен осы заманғы үдемелі дамуының қызу қарқыны нақ осы жерде тоғысып жатты, деп бір қайырды. Мыңдаған тарихи ескерткіштер, ұлтымыз ұлықтаған Бекет ата мешіті, Шақпақ ата, басқа да әу­лие­лер жатқан жерлер Каспий айма­ғын­дағы барлық елдердің мұсыл­ман­дары кие тұтқан орынға ай­нал­ды. Сонымен бірге, Маң­ғыс­тау – алдыңғы қатардағы иннова­циялық аймақ, мұнай өндіру жө­ніндегі жетекші өлкелердің бірі, біздің теңіздегі басты қақпамыз, деді. Әйтсе де, мұнай-газ сала­сындағы еңбек құқықтарының бұзылу фактілеріне жұмыс берушілер тарапынан жол берілуі жұмысшылардың наразылығын тудырып отырғаны байқалады. Бұған облыс басшылығы мен жұ­мыс берушілердің еңбеккерлер­дің мұң-мұқтажына дер кезінде көңіл бөлмейтіндігі, нақты шешім қабылдамайтындығы себеп болып отыр деп ойлаймын. Бұл мәселелер негізінен заң аясында шешілуі тиіс. Ол кейбіреулердің саяси ойынына айналып, қол­шоқ­пары болмауы керек. Тәуел­сіз­діктің 20 жылындағы ең бас­ты жетістігіміз – мемлекет ішін­дегі саяси тұрақтылықтың сақталуы. Тұрақтылықты шай­қал­туға жол берілмеуі керек. Жұ­мысшылар мен жұмыс берушілер арасын­дағы жанжал саясаттан­ды­рылмауы тиіс, деді Қ.Мәми. Сенат басшысы алда назар аударуды қажет ететін мәселелер туралы да кеңінен әңгімелей келіп, сөзін былай қорытты: – Маңғыстау – мемлекеттік сая­сатты белсенді және тұрақты іске асыратын орнықты дамыған облыс. Мұнайлы өлкенің алдағы уақытта да осы қалыптан айны­майтынына сенеміз. Сіздердің Пре­зидент алға қойған стратегия­лық міндеттерді табысты жүзеге асырып, тәуелсіз, демократиялық және өркендеп келе жатқан Қа­зақстанды нығайтуға лайықты үлес қоса беретіндеріңізге сенім білдіремін. Сөзімнің соңында бүгінгі кездесуге қатысып отыр­ған облыстың активі мен бас­шы­лығына ризашылығымды жеткізгім келеді. Сондай-ақ біздің ор­тақ Отанымыздың игілігі жолын­да баршаңыздың еңбектеріңіздің табысты болуын тілеймін. Сапар аясында Сенат Төр­ағасы Ақтау теңіз портында, Ақ­тау-Сити жобасындағы «Аққу» шағын ауданының құрылыс ала­ңында, облыстық қан құю орта­лығында, кедендік бақылау департаментінде болды. Қ.Мәмимен бірге Сенат Төр­ағасының орынбасары А.Судьин, депутаттар М.Бортник және Есеп коми­те­тінің мүшесі Ж.Сәрсен­құлов болды. Жоламан БОШАЛАҚ.