М.Қозыбаев атындағы Солтүстік Қазақстан мемлекеттік университетінде білім алып жүрген қандастарымыздың бірі – Бағдар Асқарбекқызы. Оның айтуынша, Қытай елінде екі миллионға жуық қазақ тұрады. Дәстүрге берік ағайындарымыз атажұрт десе өзектері үзіліп түсе жаздайтын көрінеді. Бойжеткен бүгінде «Foundation» факультетінің дайындық курсының тыңдаушысы. Өздігінен талаптанып, орыс тілін үйрену үйірмесіне де жазылған. Ондағы ойы – солтүстік өңірлерде әлі де басым тұратын халықтың тілін меңгеріп шығу. Қазақстанда бұл тілге сұраныс әлі жоғары екен деген таңданысын жасырмайды.
«Өзге елде сұлтан болғанша, өз елінде ұлтан болуды» арман еткен 30 бауырымыз былтыр климаты қатал, демографиялық құрылымы өзгеше өңірде білім алуды, орнығып, жұмыс істеуді алға мақсат етіп келген. Ендігі тағдырларын тек Қазақстанмен байланыстыруды құп көреді. Кіндік қандары өзге елде тамса да, жүректері қазағым, ұлтым деп соғатын жастар туралы факультет деканы Шалабай Қожаев үлкен ыждағатпен әңгімелейді. Еңселі білім ордасында барлығы 81 шетелдік қазақ баласы оқиды. Қай-қайсысына болсын білімге құштарлық, ізденімпаздық, еңбекқорлық тән. Төте жазуға жүйрік олар үшін кириллицаны үйрену соншалықты қиын емес. Қоғамдық жұмыстарға да белсене араласады.
Моңғолиядан келген Жарқанат Қинауқан білімнің тегін екенін, жайлы жатақханаға орналасқанын, барлық жағдай жасалғанын ризашылықпен айтады. Аяғынан тік тұрып алғаннан кейін атамекенде оқуды, тұруды армандайтын үш бауырын Байөлке жерінен көшіріп әкелмек ниетін айтады. Жастайынан өлең шығарып, Мағжан атасына ұқсағысы келеді.
Қытайдан, Моңғолиядан, Ресейден оқып жатқандардың қатарын «Серпін-2050» бағдарламасы аясында оңтүстік облыстардан келген бір мыңға жуық өрендер толықтырып отыр.
Өмір ЕСҚАЛИ,
«Егемен Қазақстан»
Солтүстік Қазақстан облысы