Еліміз осы уақытқа дейін жемқорлық деңгейін төмендету бағытында елеулі қадамдар жасады. Әлемдік дертке айналған жемқорлықпен күресті одан әрі жандандыру ісін Елбасының тағы бір пысықтауы бекер емес. Себебі, қоғамдық қауіпсіздікті қамтамасыз ету, денсаулық сақтау, білім беру, тұрғын үй-коммуналдық шаруашылығы іспетті күнделікті өмірімізге байланысты салалардағы жемқорлық аса қауіпті. Бұл салалардағы жемқорлық деңгейінің жоғары болуы өз кезегінде мемлекеттік органдарға деген сенімді төмендетеді.
«Қазақстанның Үшінші жаңғыруы: жаһандық бәсекеге қабілеттілік» атты Жолдауда экономикалық қылмыстарды ізгілендіру, айыппұлдар мөлшері мен мерзімін қисынға сай реттеу, кәсіпкерлерді қолдау, т.б. мәселелер көтерілді. Сонымен бірге, жеке меншікті қорғауға, құқық үстемдігіне және баршаның заң алдында теңдігін қамтамасыз етуге бағытталған реформаларды жемісті жалғастыру тапсырылды. Бұған қоса Елбасы әкімшілік және қылмыстық заңдарды одан әрі ізгілендіру қажеттігін де нақтылады. Себебі, соңғы кездері экономикалық қылмыстарға қатысты баптарды ізгілендіру қажеттігі байқалуда.
Қылмыстық кодекстегі экономикалық қызмет саласындағы қылмыстық құқық бұзушылықтарға арналған тарауда реттеуді қажет ететін жайттар бар екенін өмірдің өзі көрсетіп отыр. Мысалы, азаматтың салықтан жалтаруы, кедендік төлем-алымдардың дұрыс төленбеуі, тауар белгісі немесе экономикалық шаруашылықтағы қарым-қатынас, жалған кәсіпкерлік те құзырлы мекеме құзыретінде шешілетін істер. Экономикалық қылмыстарды қылмыссыздандыруды шағын және жеке кәсіпкерлерді қорғап, оларға қолдау көрсетудің бір амалы ретінде бағалауға болады.
Жолдаудағы «Цифрлы Қазақстан» бағдарламасын ерекше атап өткен жөн. Бұл тұрғыда жаңа өндірістерді қалыптастырудың маңызды бір шарты – инновацияларды қамтамасыз ету. Сол себепті, үдемелі индустриалды-инновациялық даму бағдарламасы шеңберінде өндіріс қуаттарын еселеу айрықша маңызға ие. Елбасы 3D принтерлер, электромобильдер іспетті жоғары технологиялық өндірістерді дамытуға басымдық береді. Мұның арқасында бәсекеге қабілеттігіміз артарына талас жоқ. Жоғарыда айтқанымыздай, толайым табысқа жетуде адами капиталдың орны айрықша, демек, жастардың үш тілді қатар меңгеруі ел болашағына ықпал етеді. Яғни, біз шет елдерге білімді, білікті ұрпағымызбен ғана таныла аламыз. Биік мақсаттар барлық деңгейде уақыт пен қордың, оның ішінде кадрлар резервін талап ететіні анық.
Мемлекет басшысы діни экстремизмді насихаттаудың алдын алуға, әсіресе, интернет пен әлеуметтік желіде оның жолын кесуге аса көңіл бөлуге шақырды. Жолдау болашаққа бағдарланған. Оны табысты жүзеге асыру жүгі жас ұрпаққа жүктеледі. Жолдаудың басты мақсаты – «Қазақстан-2050» Стратегиясының міндеттерін жүзеге асыру. Елбасы аталған стратегиялық бастама «100 нақты қадам» Ұлт жоспарының негізінде орындалатынын қадап айтты. Жолдауды тәуелсіз еліміздің тұрақты дамуына жол ашатын, мемлекетіміздің барлық саласына серпін беретін, халқымыздың игілігіне бағытталған, нақты іс-жоспарға негізделген тарихи құжат ретінде бағалаған жөн.
Мансұрхан МАХАМБЕТОВ, Мәжіліс депутаты