Байыпты байланыстар бағдары

Кеше Астанада Премьер-Министр Кәрім Мәсімов пен Литва Республикасының Президенті Даля Грибаускайтенің қа­ты­суы­мен екі ел кәсіпкерлерінің бизнес-форумы өтті. Сонымен қа­тар, оған «Атамекен» Қазақстан ұлттық экономикалық па­ла­та­сы­ның төрағасы Абылай Мырзахметов пен Литва Өн­ді­ріс­шілер конфедерациясының президенті Бронислав Лобис қа­тысты. Аталмыш шара Литва Республикасының Президенті Д.Гри­бау­скай­тенің елімізге ресми сапары аясында өткізілді. Бизнес-форумда Үкімет бас­шы­сы Кәрім Мәсімов экономи­ка­лық тұрғыдан алып қарағанда Қа­зақстанда және Литвада өзара қолдау көрсету, сонымен бірге қос елдің бизнестері арасында екеуара толықтырып отыру үшін мүмкіндіктер молынан екенін жеткізді. «Литва Еуропалық Одақ мүшесі болып табылады. Еліміз үшін аталған одақпен тығыз қарым-қатынас орнату маңызды. Литва тарапынан Қазақстанмен ын­тымақтастыққа барынша қол­дау көрсетілетініне үмітіміз мол. Оның ішінде жақын арада Бү­кіл­әлемдік сауда ұйымына енуге Еуропалық Одақ жағынан қолдау боларына да үміттіміз», – деді ол. Сондай-ақ Премьер-Министр елі­міз тарапы да тиісті қолдау ша­раларын атқаруға дайын екенін айта келе, екі мемлекеттің кө­лік әлеуетін пайдалану шеңбе­рінде Литваға Қазақстан жағы Кеден одағы бойынша қолдау көрсете алатынын тілге тиек етті. Премьер-Министр форумда со­нымен қатар бюрократиялық кедергілерді азайтуда литвалық компанияларға көмек көрсе­туде­міз және көрсете береміз, бұл шаралар литвалық компанияның қыз­меті мен инвестициялары елімізде қомақты болуы үшін ат­қарылуда дегенді де назардан тыс қалдырмады. Бұл ретте Литва аумағында да Қазақстан инвес­ти­циясына осы тақылеттес қарым-қатынас болатынына үмітті екенін жеткізді. Форум сан тақырыптағы бірнеше саланы қамтыды. «Атамекен» Қазақстанның ұлттық эко­но­микалық палатасы мен Ли­тва­ның Өндірісшілер конфедера­ция­сы Қазақстан-Литва іскерлік ке­ңе­сін құру туралы келісімді бекітсе, еліміздің Көлік және коммуникация министрлігі мен Лит­ва­ның Көлік министрлігі өзара түсіністік туралы меморандумға қол қойды. Қазақстан мен Литва арасын­да­ғы сауда-экономикалық байла­ныс­тар нығайып келеді. Статис­ти­калық мәліметтер екі ел ара­сындағы тауар айналымы өткен жылы 176,5 млн. АҚШ долла­ры­на жеткендігін көрсетуде. Ал би­ылғы жылдың алғашқы жарты­сы­нда ғана бұл көрсеткіш 165,3 млн. долларға жеткен. Оның 106,6 млн.-ы экспорт болса, 58,7 млн.-ы импорт болып отыр. Сөйтіп өткен жылдың сәйкес мер­зімімен салыстырғанда тауар айналымы екі есеге жақын ( 89,0 млн. доллар) артқан. 2011 жыл­дың 1 қыркүйегіне дейін респуб­ликамызда литвалық капиталдың қатысуымен 160 бірлескен кәсіп­орын тіркелсе, оның 91-і бүгінгі таңда жұмыс істеуде екен. Олар негізінен көтерме және бөлшек сауда, өңдеуші өнеркәсіп, байла­ныс және ақпарат, көлік және логистика салаларында қызметтер атқарады. Көлік транзиті ынты­мақ­тастығы қос елдің өзара іс-қимылындағы маңызды бағыт болып табылады. Литва тарапы Қазақстанның көлік са­ласына инвестиция құюға, Клайпеда пор­тына Қазақстан бизне­сі­нің қайта оралуына және екі ел­дің темір жол құрылымдарының ынты­мақтаса түсуіне мүдделілік танытуда. Бизнес-форумдағы негізгі әңгіме де осы байланыс­тар­ды әрі қарай дамыту бағытында өрбіді. Әбдірахман ҚЫДЫРБЕК.