Оралмандар мәселесі талқыланды

Кеше «Нұр Отан» ХДП Парламентаризм институты және БҰҰ ДБ қолдауымен «Мемлекеттің оралмандарға қызмет түр­ле­ріне қол жеткізуді қамтамасыз ету саласындағы әлеуметтік саясаты» деген тақырыпта  «Нұр Отан» ХДП Парламент Мә­жі­лісіндегі фракциясы жанындағы Әлеуметтік кеңестің оты­ры­сы өтті. Басқосуды Әлеуметтік кеңес төрайымы Айткүл Са­мақо­ва жүргізді, деп хабарлады Мәжілістің баспасөз қызметі. Онда БҰҰ ДБ Қазақ­стан­да­ғы Тұрақты өкілінің орын­ба­са­ры Екатерина Паниклова құт­тықтап,  Еңбек және әлеуметтік қорғау министрінің орынбасары Серік Ахметов пен Ішкі істер ми­нис­тр­лігінің Миграция поли­циясы комитетінің төрағасы Патрис Нокин  баяндама жасады. Алқалы жиында қандастары­мыз­ға қолдау көрсетіп, қам­қор­лық жасаудың нақты жолдары туралы пікірлер ортаға салын­ды. Депутаттар У.Қа­лижанов, Б.Тілеухан, Г.Сейіт­ма­ғанбетова, С.Оспанов, А.Смайыл, Н.Өнер­бай баяндамашыларға жа­рыса сұрақ берді. Тәуелсіз мемлекет құрып, жаңа өмірге бет бұрғандағы «Нұр­лы көштің» жөні бөлек. Бұрын кет­кен ағайынды қайта табыс­тыр­ған  көш болып отыр. Тәуел­сіз­дікпен бірге атажұртқа баста­ған көшке де биыл 20 жыл толды. Атамекенге 20 жыл ішінде 300 мыңға жуық отбасы көшіп келді. Осылайша ел халқының саны 1 миллионнан астам адаммен то­лық­ты. Әлемде өз қандастарын еліне шақырып,  қыруар қаражат бөлген үш-ақ мемлекеттің біреуіміз. Олар – Қазақстан, Германия және Израиль. Қазақстан өзінің тәуелсіздігін алғалы бері этностық қазақтарды тарихи отанына қайтару сая­са­тын жүргізіп келеді. Көші-қон үдерістерін реттеу мақсатында Қазақстан Республикасының 2007-2015 жылдарға арналған кө­ші-қон саясатының тұжырым­да­ма­сы, ағымдағы жылы «Халық­тың көші-қоны туралы» жаңа заң қабылданды. Еңбекке қабілетті оралмандар Қазақстан эконо­ми­ка­сына өз үлестерін қосуда. Олардың үштен екісі өндірістің әр түрлі салаларында жұмыс жасаса, әрбір төртіншісі ауыл шаруашылығында жұмыс істейді. Әлеуметтік кеңестің отыры­сына қатысушылар Еңбек және әлеуметтік қорғау, Экономикалық даму және сауда, Білім және ғы­лым, Денсаулық сақтау, Бай­ла­ныс және ақпарат, Әділет және Сыртқы істер министрліктеріне талқылау  қорытындылары бой­ын­ша тиісті ұсынымдар жасады.