Батыс Қазақстан облысында «Бизнестің жол картасы-2020» мемлекеттік бағдарламасы шеңберінде «Урал-лес» шаруа қожалығы құны 98,9 миллион теңге тұратын цементті-жоңқалы тақта өндірісі жобасын жүзеге асыруға кірісті. Ширек ғасырдан бері облыс рыногында ағаш өңдеумен айналысатын бұл шаруашылық жаңа жобаны іске қосып, қалдықсыз өндіріс үрдісіне қол жеткізбек.
Шаруа қожалығы шикізатты Ресейден алып отыр. Оны өңдеп, одан алынған құрылысқа қажетті ағаш өнімдерімен ішкі сұранысқа қоса Атырау облысын да қамтуда. Мұнда тұрғын үй құрылысына қажетті еден тақтайынан бастап, төбе шатыры ағашына дейінгі барлық түрлерін өндіреді. Енді жаңа жоба бойынша ағаш өңдеуден қалған қалдық жоңқа кәдеге асырылмақ. «Кеңестік заманда цементті-жоңқалы тақта өндірістері болғаны есімізде. Бүгінде соның барлығы ұмытылды, рынокты изовер, минералды мақта «жаулады». Бұлардың химиялық, жасанды материалдар екенін біреу білсе, екіншісі біле бермейді. Ал ағаштың жөні бөлек, ол – табиғи материал. Цементті жоңқалы тақта (ЦЖТ) өндірісіне негізінен ағаш жоңқасын, осының бәрін біріктіріп ұстап тұратын аздаған желім, аздаған цемент пайдаланылады. 10 сантиметрлік қалыңдықтағы материал жылуды жібермейтін төбе жабыны, ал 20 сантиметрлігі құрастырмалы үйлерде жылу ұстайтын қаптама материал ретінде құрылысқа пайдаланады», – дейді «Урал-лес» шаруа қожалығының жетекшісі Виктор Мартьянов. Оның айтуынша, мұндай өнімге ауа райы құбылмалы Орал өңірінде сұраныс зор болмақ.
Жоба авторлары келешекте цементті-жоңқалы тақтадан құрастырмалы тұрғын үй жасауды жоспарлап отыр. Жоңқалы тақтаны ғимараттарды реставрациялауға және жаңа құрылыстарды салуға пайдалануға болады. Бұл материалдың басты артықшылығы өрт қауіпсіздігінің жоғары деңгейде сақталуында. Өйткені, мұндай материал отқа жанбайды және химикаттарға, табиғаттың тосын жағдайларына шыдайды. Жел, су өткізбей, жылуды сақтайды. Жәндіктерге, кеміргіштерге, ылғалға, шіруге бой алдыра қоймайды. ЦЖТ материалы шапшаң өңделеді, оның құрамында канцерогендік және улы заттар жоқтығы да оның бәсін биіктетеді. Биылғы көктемгі су тасқыны кезінде саз балшықты кірпіштен салынған тұрғын үйлер суға езіліп, бұзылып жатқанда, ағаштан құрастырылған үйлер міз бақпады десе де болады.
– Цементті-жоңқалы тақтадан жасалатын құрастырмалы тұрғын үйлеріміздің қаңқасы өзге өндірушілердің құрастырмалы үйлеріне қарағанда әлдеқайда арзан болады. Өйткені, біз материалды ағаш қалдығынан аламыз, көп шығын болмайды. Біз негізінен әлеуметтік жағдайлары төмен, әлжуаз топтарға арналған өнімдер шығарамыз. Сондықтан да біздің жобамызды облыс әкімдігі қолдап, «Бизнестің жол картасы-2020» бағдарламасы бойынша мемлекеттік қолдауға ие болдық», – деді Виктор Мартьянов. Айтса айтқандай, аталмыш бағдарлама аясында шаруа қожалығының Еуразиялық банктен жобаны іске асыру мақсатында алынған несиесінің пайыздық мөлшерлемесінің жартысын мемлекет өтейді.
Шаруашылықта 30 адам жұмыспен қамтылған. 2013 жылы жаңа жоба толық іске қосылғанда, 15 адамға тұрақты жұмыс орны ашылмақ. Өзін егемен еліміздің отансүйер азаматы санайтын кәсіпкер Щапов ауылы маңындағы қараусыз қалған 30 гектарлық алма бағын қарамағына алып, оны түлетуді қолға алды. Қазір шаруа қожалығының Деркүл ауылы жағындағы базасында жаңа цехтың құрылысы жүргізілуде.
Гүлбаршын ӘЖІГЕРЕЕВА.
Батыс Қазақстан облысы.