Алматыда Түркітілдес мемлекеттер ынтымақтастығы кеңесінің саммиті аясында бизнес-форум және Түркітілдес елдердің іскерлік кеңесінің алғашқы мәжілісі болып өтті. Алқалы жиынға Түркия, Әзербайжан, Қырғызстан және Қазақстан мемлекеттерінің өкілдері қатысты. Халықаралық форум жұмысының күн тәртібіне бірқатар маңызды мәселелер қойылды. Сонымен қатар, онда Түркітілдес мемлекеттердің іскерлік кеңесін құру туралы келісімге де қол қойылды.
Түркітілдес елдердің іскерлік кеңесінің алғашқы мәжілісінде сөз алған «Атамекен» Қазақстан ұлттық-экономикалық палатасының басқарма төрағасы Абылай Мырзахметов жиналғандарға түбі бір туыс, бауырлас елдер арасындағы ынтымақтастық байланыс келешекке жарқын жол ашатындығын тілге тиек етті.
– Көпшілікке белгілі, бүгінгі күннің жоғары талабына орай ұлттық бизнесті одан әрі дамытып, өркендетуге арналған жаңа жолдарды іздестіріп табу ең басты мәселелердің бірі. Іскерлік кеңесінің бүгінгі алғашқы отырысына қатысып отырған Түркия, Әзербайжан, Қырғызстан және Қазақстан мемлекеттеріндегі ұйымдардың жетекшілерінің де бизнес саласындағы болашақтағы жобалары, міне, осындай міндеттерден туындайды.
Біздің мемлекеттеріміздің арасындағы ежелден қалыптасқан достық, дәстүрлі қарым-қатынас, сондай-ақ еліміздің орналасуындағы географиялық жақындықтың көпшілікке берері мол. Анығырақ айтқанда, мұндай мүмкіндік мемлекет экономикасын қарқынды дамыту бағытында бірлесіп, жемісті еңбек етуге ықпал ететіндігі сөзсіз. «Ынтымақ бар жерде – ырыс бар» деп халқымыз айтқандай, барлығымыз бірлесіп, кәсіпкерлер мүддесіне орай, іскерлік кеңесінің жұмысын өркендететінімізге менің сенімім мол, – деді Абылай Мырзахметов өз ойын ортаға салып.
Қазақстанның Түркі тілдес мемлекеттер ынтымақтастығы кеңесіне енетін елдермен арасындағы байланысы уақыт өткен сайын арта түсуде. Ал, сыртқы экономикалық қатынаста тауар айналымының 40 пайызға өсуі де көп нәрседен хабар берсе керек.
«Атамекен» палатасының мәліметтері бойынша, Қазақстанның Түркиямен арадағы тауар айналымы және инвестиция бойынша тығыз байланыс орнаған. Мәселен, елімізде түрік әріптестермен бірлескен бір мыңға жуық кәсіпорын құрылған. Сондай-ақ, Әзербайжанмен, Қырғызстанмен арадағы іскерлік байланыстар да одан әрі дами түсуде. Халықаралық форумда Әзербайжан Республикасының кәсіпкерлер ұйымы ұлттық конференциясының президенті Мамед Мұсаев, Қырғызстан Сауда-өндірістік палатасының президенті Марат Шаршекеев және басқалар күн тәртібіндегі мәселелер төңірегінде өз пікірлерін ортаға салды.
Түркітілдес мемлекеттер ынтымақтастығы кеңесінің бас хатшысы Халил Акынджи өз кезегінде кедендік қызметтегі түйткілдер төңірегінде ой қозғады.
– Мемлекеттер арасындағы сауда айналымы туралы сөз қозғалғанда кедендік мәселе, сондай-ақ транзиттік құжаттар алу мәселесі алдан шығатындығы ақиқат. Сондықтан, барлығымыз бірлесіп біздің елдерімізге арналған іскерлік қатынастың жеңілдетілген жүйесін құруымыз қажет. Сонымен бірге, іскерлік кеңес аясында көлік және байланыс агенттігін құрудың төрт мемлекет үшін де берері мол, – деді бас хатшы.
Бизнес-форумда төрт мемлекеттің кәсіпкерлері екі жақты кездесулер өткізді. Жиынды ұйымдастырушылардың пікірінше, мұндай жүздесулер жаңа келісім-шарттарға жол ашып, ынтымақтастықты ұлғайтпақ.
Бақыт БАЛҒАРИНА.
Алматы.