Бірақ, өкінішке қарай, Жамбыл ауылдық аумағында Жаңатаң, Әйтей шағын ауылдарын қосқанда бар-жоғы 1267 адам қалыпты. Тұрғындар санының азайып кетуіне орай, қазір аудан әкімдігі оңтүстік облыстарға барып, ауылдарына сол жақтан отбасыларды көшіріп әкелу жұмыстарын қолға алыпты.
Елге ел қосылса құт. Осындай игі тілекпен біз де жуырда ғана Лебяжі ауданына барып қайттық. Негізі, аудан облыс орталығына жақын орналасқан. Ауылдары, аудан орталығы Омбы-Майқапшағай бағытындағы Семей арқылы Қытайға жететін халықаралық жолдың бойында. Биыл үлкен жол жаңарып, жарқырап жөндеуден өтіпті.
Жолсапар барысында ауданның Жамбыл, Ямыш, Қызыләскер деп аталатын ауылдарында атқарылып жатқан әлеуметтік-тұрмыстық сала жұмыстарымен таныстық. Жалпы, өңір бойынша асқабақтың, қарбыздың түрлі сорттарын өсірумен аты шыққан ауылдар да бар. Аудан орталығы Аққулыда, Бесқарағай, Черное, Малыбай ауылдарына орталықтандырылған су құбыры тартылыпты.
– Бұдан басқа, Шарбақты, Шабар, Ямышев және Тілектес ауылдарында KБM қондырғылары жұмыс істеп тұр. Орталық су жүйесіне қосылмаған 13 ауылда ауыз су қоры нақтыланды. Шарбақты, Шабар, Шақа ауылдарына орталықтандырылған су құбырын тарту үшін облыстық бюджет қаражаты есебінен жобалау-сметалық құжаты әзірленді, қазір сараптамалық комиссияның қарауында, – дейді аудан әкімі Ернұр Әйткенов.
Айтса айтқандай-ақ, Жамбыл ауылына келгенімізде жақында ғана пайдалануға берілген су құбыры нысанына барып көрдік. Құрылыс барысында су тартқыш 2 мұнара, ұзындығы 9000 метрді құрайтын, диаметрі 110 мм негізгі құбыр, 118 негізгі темір-бетон құдық, 114 үйге су жеткізу құдығы салыныпты. Су тазарту, су алу құрылғылары орнатылған алаң қоршалып, сырланған, электр қуаты тартылыпты. Ауылдың 3 тұрғыны тұрақты жұмысқа орналасыпты. Ауылда үйге су жеткізіп берген мұндай құрылыс өмірі болмаған деп те жатыр тұрғындар.
Құрылыс биылғы жылдың сәуір айында ғана басталыпты. Жергілікті «АйСу Мелиорация» ЖШС-мен құны 330 миллион 375 мың теңгеге келісімшарт жасалған. Ауыл әкімдігінің ақпаратынша, 283 миллион 361 мың теңге игерілді. Оның ішінде 217 миллион 450 мың теңге республикалық бюджеттен, 65 миллион 911 мың теңге жергілікті бюджеттен бөлінген.
Біз қаладағыдай су келіп, ас бөлмеде ыдыс жуып жатқан Қадиша Жұманбаеваның үйіне келіп, құтты болсын айтып шықтық. Қадишадан басқа бірқатар отбасы барлық құрылғыларын орнатып алыпты, үйлеріне су келіп тұр. Қалған тұрғындар да үйлеріне су тарту жұмыстарын алдағы көктемге жоспарлап отыр. Жақсы-ақ. Бірақ, аудан орталығының іргесінде тұрған Жамбыл ауылының ішінде, кіреберіс көшесінде жинақылық, ұқыптылық жоқтығы, назарда тыс қалғаны байқалады.
– Қазір аудан әкімдігі оңтүстік облыстардан көшіп келушілерге алдын-ала осылай әлеуметтік жағдайлар жасаудамыз. Ауданда 13 мыңдай халық тұрады, 23 ауылдық аумақ бар. Осы ауылдарға көшіп келетін отбасыларды орналастырамыз. Биыл жыл соңына дейін Ямышев ауылындағы су құбырының құрылысы аяқталады. Жобалар іске қосылғанда, тұрғындарды орталықтандырылған ауыз су жеткізу көрсеткішін 52,7 пайыз болмақ, – дейді аудан әкімі.
Фарида БЫҚАЙ,
«Егемен Қазақстан»
Павлодар облысы,
Лебяжі ауданы