Бурабайда Халықаралық орман жылына арналған үкіметаралық ІІІ ғылыми-практикалық конференция өтті. Оның жұмысына Қазақстан, Ресей, Қырғызстан, Өзбекстан және Тәжікстан өкілдері қатысты.
Халықаралық конференцияны құттықтау сөзбен ашқан Ауыл шаруашылығы министрлігінің Орман және аңшылық шаруашылығы комитетінің төрағасы Ерлан Нысанбаев осы жиынның Қазақстан Тәуелсіздігінің мерекелі жылында өткізілуі оның салалық қана емес, әлемдік саясаттағы маңызын да арттыра түсетіндігін атап көрсетті. Орман ресурстарын орнықты басқару мен сақтауды қамтамасыз ету, климаттық ауытқушылықтарға әсер қуатын арттыру мақсатында БҰҰ Бас Ассамблеясы 2011 жылды Халықаралық орман жылы деп жариялады. Құрылықтың 31 пайызын орман көмкеріп жатса, соның 13 пайызы ерекше қорғалатын табиғи аумақта орналасқан. Ормандар жер жүзінің 1,6 миллиард тұрғынының табысын қамтамасыз етіп, дүниежүзілік экономикада маңызды орын алады. Алайда, ормансыздану үдерісі тоқтаусыз жалғасып, жылына 50 мың шаршы километр аумақты қамтуда. Осы орайда, ТМД Үкіметаралық кеңесінің жұмыс жоспарына енгізілген Бурабайдағы басқосу халықаралық қауымдастықтың алаңдаушылығын туғызып отырған мәселелерге қатысты тұжырымды ой-пікір қозғағанын айтқымыз келеді.
Орман және аңшылық шаруашылығы комитетінің бас сарапшысы Серік Тұрымбаев өз баяндамасын «Қалың елім қазағым – қара орманым» деген қағидат сөзбен бастауының өзіндік мәнісі бар. Мемлекеттік орман қорының жалпы көлемі 2011 жылғы 1 қаңтардағы мәлімет бойынша 28,7 миллион гектарға немесе ел аумағының 10,5 пайызын құрайды. Бұл республикамыздың ормандануы 4,5 пайыздың айналасында екенін көрсетеді. Сондықтан, табиғат байлығымыздың ауқымын кеңіту мемлекеттік басымдыққа ие және бұл бағытта елеулі жұмыстар атқарылуда. Мемлекетіміз 1993 және 2003 жылдары дербес Орман кодекстерін қабылдап, 2004 және 2006 жылдарда қабылданған салалық заңдар негізінде қызмет өрісін кеңітті. Экономиканың орман секторындағы заңнамалық-нормативті актілері жетілдірілді. Осының нәтижесінде Қазақстанның тәуелсіздігі жылдарында орман қорының алқабы 4688 мың гектарға (19,6 %), оның ішінде орман көмкерген жерлер 2044,1 мың гектарға (19,9 %) ұлғайды.
Президенттің халыққа Жолдауынан туындайтын тапсырмаларды орындау бағытында 2005-2007 жылдарды қамтитын «Жасыл ел» бағдарламасы іске асырылса, қазір 2010-2014 жылдарға арналған «Жасыл даму» атты жаңа бағдарлама жұмыс істеуде. Осының арқасында соңғы 5 жылда орман алқабын дамыту 1,5 есе өсіп, 2010 жылы 51,1 мың гектарға ұлғайды. Мемлекеттік бақылау мен ведомствоаралық үйлесімді қызметтің жақсаруы ағашты заңсыз кесуді 1,8 есе, орман өртін 4 есе азайтуға мүмкіндік берді. Сондай-ақ, Елбасы Н.Назарбаевтың бастамасымен 1997 жылдан бері Астананың жасыл белдеуін құру жұмысы қарқынды жүргізілуде. Қазірдің өзінде 55 мың гектарлық көкжелек жайқалып тұрса, оның көлемі 2015 жылы 80 мың гектарға жеткізілмек.
Конференцияда экологиялық жүйені тұрақты дамыту жолындағы түйткіл мәселелер өткір көтерілді. Әлемдік тәжірибе айрықша қорғалатын аймақтар көлемі ел аумағының 10 пайызын қамтуы қажеттігін алға тартады. Бұл бағытта қыруар істер атқарылғанымен, оның ауқымы қазір 22 миллион гектар болып отыр. Яғни, әлгі 10 пайыздық деңгейге, екі сатылы кезеңмен, 2020 жылы қол жеткізуге болатын көрінеді.
Конференцияда Қазақ орман шаруашылығы ҒЗИ директоры Болат Мұқановтың, Бүкілресейлік орман шаруашылығы мамандарының біліктілігін арттыру институтының ректоры Анатолий Петровтың, К.Тимирязев атындағы Мәскеу мемлекеттік ауыл шаруашылығы академиясының кафедра меңгерушісі Виталий Хлюстовтың, Өзбекстан бау-бақша және орман шаруашылығы ғылыми-өндірістік орталығының сектор меңгерушісі Зиновий Новицкийдің, Қырғызстан ҰҒА Орман институтының зертхана меңгерушісі Шаршеналы Бикировтың тақырыптық баяндамалары тыңдалып, салалық ғылыми таныстырылымдар өткізілді.
Халықаралық конференцияға қатысушылар Бурабай мемлекеттік ұлттық табиғат паркіндегі «Қазақстан Тәуелсіздігінің 20 жылдығы» аллеясында ағаш көшеттерін отырғызды.
Бақберген АМАЛБЕК.
Ақмола облысы.