Қазақстан мұсылмандары діни басқармасы мен Орта Азия мүфтилер кеңесінің төрағасы, Бас мүфти, шейх Әбсаттар қажы Дербісәлі хазрет Мәскеу мемлекеттік лингвистикалық университетінің арнайы шақыруымен аталмыш оқу орны ұйымдастырған «Дінтанушылар лаңкестікке қарсы» атты екі жақты кездесуге қатысты. Сондай-ақ осы оқу орны мен ТМД елдерінің тілдер және мәдениеттер жөніндегі базалық мекемесінің ұйымдастыруымен Орта Азия мен Кавказда лаңкестік идеологиясына жол бермеуге арналған Қазақстан Республикасы мен Ресей Федерациясының діни жетекшілері мен теологтарының кездесуі өтті.
Қазақстанның дінбасы кездесуде «Ислам лаңкестікке қарсы» атты негізгі баяндаманы жасаумен қатар, осы шараның бас ұйымдастырушысы, аталмыш оқу орнының ректоры Ирина Халлееваға кездесуге құрметтеп шақырғаны үшін ризашылық білдіріп, «Қазақстан мешіттері мен медреселері», «Ислам қайраткері» және орыс тіліндегі «Ислам – религия мира и созидания» атты жақында жарыққа шыққан туындыларын тарту етті.
Қазақстан Республикасының және Ресей Федерациясының діни жетекшілері мен теологтары, екі жақты кездесуге қатысушылар, Орта Азия мен Кавказ аймақтарында тұрақтылық пен қауіпсіздікті сақтау мүддесінде бірге қызмет етуге, лаңкестік пен экстремизмді болдырмауға, лаңкестік идеологиясын таратуға бірлесіп қарсы әрекет етуге дайын екендерін білдіре келе, экстремизмнің, лаңкестік пен этносаралық алауыздықтың кез келген көріністерін айыптай отырып, оған қашанда қарсы тұратындықтарын мәлімдеді. Дінаралық комитеттің тең төрағасы Шафиг Пшихачев мырза осы тұрғыда қазақ елінің атқарып отырған жемісті жұмыстарына тоқталып, Қазақстан Президентінің әлемде бейбітшілік пен тыныштықтың салтанат құруына қосып отырған үлесін ерекше атап көрсетіп, алғыс айтты. Орыс православ шіркеуінің қоғам мен шіркеу арасындағы қарым-қатынас жөніндегі Синодальдық бөлім басшысының орынбасары Георгий Рощин өз сөзінде: «Ислам мен православие арасында жақсы үнқатысу қалыптасты. Бұл үлкен жетістік. Ислам мен православие ежелден достас діндер. Қазақстанның Президенті Астанада 3 рет Әлемдік және дәстүрлі дін жетекшілерінің үш съезін де зор табыспен өткізді. Ол да әлемде бейбітшіліктің сақталуына қосқан үлес» – десе, Ресейдегі еврейлер конгресінің төрағасы Зиновий Коган: «Дінаралық достық, әріптестікке жол Қазақстанда, Алматыда басталған еді. Бұған Қазақстанның діни басқармасы үлкен үлес қосты. Сол алғашқы қадам, қазіргі күні биік белестерге көтерілді», – деп Қазақстан дінбасына ризашылық білдірді.
Ал Орта Азия мен Кавказда лаңкестік идеологиясын таратуға қарсы әрекет мәселелеріне арналған екі ел діни жетекшілері мен теологтарының кездесуінде аталған аймақтарда тұрақтылық пен қауіпсіздікті сақтау мүддесінде бірге қызмет етуге, лаңкестік пен экстремизм жолын кесіп, лаңкестік идеологиясын таратуға қарсы әрекет етуге қашанда дайын екендерін білдіре келіп, экстремизмнің, лаңкестік пен этносаралық алауыздықтың кез келген көріністеріне қатаң айыппен қарсы тұратынын бір ауыздан мәлімдеді.
Қабылдаған мазмұндамада Қазақстан мен Ресейдің басқа да діни жетекшілерін саяси, экономикалық, әлеуметтік, конфессияаралық, ұлтаралық және өзге мәселелерді шешу құралы ретінде лаңкестікті пайдалануды айыптауға және болдырмауға және ТМД елдерінің діндарларын және барлық тұрғындарын лаңкестікті айыптауға және өз дінінің бейбіт қағидаларын ұстануға шақырған. Ресей Федерациясында, оның ішінде Солтүстік Кавказда әлеуметтік-экономикалық мәселелерді шешуге қажетті жағдайлар, оның ішінде ар мен дін еркіндігі құқығын қамтамасыз ету мәселелері шешілген.
Қазақстан Республикасы мен Ресей Федерациясы дін қызметкерлері мен дінбасыларының бірлесіп халықтарына жемісті қызмет етудің бірнеше ғасырлық бай тарихы мен тәжірибесі бар. Ислам мен христиан діндерінің жаңаруы, кездесуге қатысушылардың ортақ пікірінше, азаматтық қоғам өмірінің рухани-адамгершілік бастамаларын нығайтуға әсер етеді, діндарлардың құқықтарын жүзеге асыру мүмкіндіктерін кеңейтеді, Орта Азия мен Қауқаз халықтарының алдында тұрған көптеген өзекті мәселелерді шешуге көмектеседі. Исламның зорлық және экстремизммен байланыстырар ортақ ештеңесі жоқ. Қасиетті Құранда жер бетінде біреудің абыройын төгіп, басқаға әділетсіздік жасағандар сұмдық азапқа душар болады делінген («Шура» сүресі, 42-аят). Біздің қоғамда жиһадқа, қарулы қақтығысқа шақыруға ешқандай да негіз жоқ.
Мәскеу мемлекеттік лингвистикалық университетінің ректоры, профессор Ирина Халеева ханым Қазақстанның жүргізіп отырған бейбітсүйгіш саясаты мен дүниежүзілік қауымдастық алдындағы беделін ескеріп, аталмыш басқосуды бірлесе өткізуді ұйғарғандығын айтты. Қазақстан дінбасының ТМД елдерінің тілдер және мәдениеттер жөніндегі базалық мекемесінің бастамаларын қолдап, басқосуға қатысып, баяндама жасағаны үшін ризашылық білдірді.
Қазақстан мұсылмандары діни басқармасының баспасөз қызметі.