Ел Тәуелсіздігінің өткен жиырма жылындағы тындырылған көп жұмыстардың бірі сыбайлас жемқорлыққа қарсы күрес болды. Бәрін айтпағанда, соңғы жылдары Елбасы Нұрсұлтан Әбішұлы Назарбаевтың тапсырмасы бойынша ЭЫДҰ тарапынан (Экономикалық ынтымақтастық және даму ұйымы) берілген ұсыныстардың көбін жүзеге асыруға және ұлттық заңнаманы халықаралық стандарттарға сәйкестендіруге бағытталған қарқынды реформалар жүргізілді. Олардың қатарында жемқорлыққа қарсы тұру саласындағы ұлттық саясат пен заңнаманы жетілдіру, оған қоса мемлекеттік қызмет пен қаржылық бақылаудың ашықтығын қамтамасыз ету бойынша бірнеше ұсыныс жасалған. Солардың денін Қазақстан орындаған көрінеді. Бұл туралы кеше сарапшылардың мониторинг тобының басшысы, ЭЫДҰ кеңесшісі Дмытро Котляр хабардар етті.
Сыбайлас жемқорлық көріністері әлемнің кез келген елінде кездеседі, дейді сарапшылар. Бірақ оның деңгейі әр елде әр түрлі екендігі де белгілі. Себебі мемлекеттің экономикалық қауіпсіздігіне тікелей қауіп төндіретін мұндай кеселден құтылу үшін әр ел жемқорлықпен күресті күшейтуде түрлі амалды да қолға алып отыр. Осы орайда озық елдердің оң үрдістері мен ұсыныстарына ден қою күрмеуі күрделі түйіндердің сәтті шешімін табуда көмегін тигізетіні анық. Бұл бағытта сыбайлас жемқорлықтың ең қауіпті кесел екендігін ерте аңғарған мемлекетіміз ТМД елдерінің арасында бірінші болып сыбайлас жемқорлыққа қарсы заң қабылдады. Соның арқасында бірқатар іс тындырылды. Алайда заңның да жүз пайыз жүзеге асуы үшін озық елдердің озық амалдары заң тетігіне дем беруі керек. Бұл орайда Экономикалық қылмысқа және сыбайлас жемқорлыққа қарсы күрес агенттігі төрағасының орынбасары А.Лукиннің айтуына қарағанда, біздің еліміз сонау 2004 жылы Экономикалық ынтымақтастық және даму ұйымының Шығыс Еуропа және Орталық Азия мемлекеттеріне арналған сыбайлас жемқорлыққа күрес жөніндегі Ыстамбұл жоспарының мүшелігіне енген. Оның штаб-пәтері Париж қаласында орналасқан. Осы жоспар аясында 2005 жылы Қазақстанға сыбайлас жемқорлыққа қарсы тұру саласындағы ұлттық саясат пен заңнаманы жетілдіру, оған қоса мемлекеттік қызмет пен қаржылық бақылаудың ашықтығын қамтамасыз ету үшін 34 ұсыныс-кеңес берілген. 2007 жылы өткізілген мониторингтің 1-кезегінің нәтижесінде сарапшылар сыбайлас жемқорлыққа қарсы мекемелерді құру және күшейту, оған қоса мемлекеттік қызмет пен қаржылық бақылаудың ашықтығын қамтамасыз ету бойынша Қазақстанның қабылдаған шараларына оң баға берді.
Ағымдағы жыл барысында халықаралық сарапшылармен агенттіктің және мемлекеттік органдардың қолдауымен сыбайлас жемқорлыққа қарсы тұру саласындағы Қазақстан заңнамасының халықаралық стандарттарға сәйкестілігіне жүргізілген мониторингінің 2-кезегі өткізілді. Аталған жұмыстың нәтижесінде 2011 жылғы 29 қыркүйекте Париж қаласында Қазақстан бойынша есеп қабылданды. Мұнда 2008 жылы Қазақстан БҰҰ Сыбайлас жемқорлыққа қарсы конвенциясын ратификациялады, сыбайлас жемқорлық қылмыстар үшін қылмыстық жауапкершілік күшейтілді және толықтырылды, «Заңсыз жолмен табылған табыстарды заңдастыруға және лаңкестікті қаржыландыруға қарсы тұру туралы» заң қабылданды және қаржылық барлаудың ұлттық бөлімшесінің қызметтерін атқаратын Қаржылық министрліктің Қаржылық мониторинг комитеті құрылды, 2011-2015 жылдарға арналған Сыбайлас жемқорлыққа қарсы тұру бойынша cалалық бағдарламасы бекітілді және жүзеге асырылғаны қуатталды.
Енді алдағы уақытта сыбайлас жемқорлыққа қарсы заңнаманы одан әрі жетілдіру мақсатында 3 салада: сыбайлас жемқорлыққа қарсы саясат, сыбайлас жемқорлыққа қылмыстық жауапкершілік және сыбайлас жемқорлықтың алдын алу бойынша 17 жаңа ұсыныс жасалды. Қазіргі таңда агенттік Президент Әкімшілігі, Үкімет және мүдделі мемлекеттік органдармен бірлесе отырып, азаматтық қоғам субъектілерін тартумен аталған ұсыныстарды жүзеге асыру бойынша жұмыс басталғанын айтты.
Александр ТАСБОЛАТОВ.