Жұлдызды жиырма күн
Ел бірлігі – кемел келешек кепілі
Тәуелсіздік алған 20 жыл бойында еліміздегі этносаясат күрделі өзгерістерді бастан кешіргені мәлім, бірақ оның негізгі қағидалары, басты бағыттары әрқашан мүлтіксіз әрі мұқият сақталып отырды. Бұлар: Қазақстан халқының бірлігі; қазақ халқының ұйыстырушы рөлі; толеранттылық және жауапкершілік; Қазақстан этностарының мәдениеттері мен тілдерін дамыту үшін барлық жағдай жасау; этностық, конфессиялық, мәдени және тілдік әралуандық. Енді осы қағидаларды таратып айтып өтейік. Қазақстан халқының бірлігі қағидасы – бұл Қазақстан Республикасы қызметінің конституциялық қағидасы, қоғамдық келісім, саяси тұрақтылық және қазақстандық патриотизмді жүзеге асырудың негізгі ережесі ғана емес, ең алдымен ел Тәуелсіздігін баянды етудің негізгі қайнар бастауы, барша ел игілігі үшін экономикалық және әлеуметтік дамуды жемісті іске асыру мүмкіндігі. Бұл қағиданың экономикалық даму деңгейі мен саяси жүйесінің сипатына қарамастан, кез келген полиэтносты қоғамда іске асатынын тарих дәлелдеп берді. Ел бірлігіне қол жеткізген елдер қандай да болмасын қолайлы геосаяси және геоэкономикалық жағдайсыз-ақ, жоғары даму деңгейіне қол жеткізіп отырғаны баршаға мәлім. Ал керісінше этностық белгі бойынша жіктелу бар кез келген мемлекет тұрақсыздыққа ұшырап, өз дамуына тосқауыл қояды. Сондықтан да, өзіне тән тарихи жолы бар, экономикасы тиімді нарықтық үлгіге негізделген, демократиялық қоғам құрушы мемлекет ретінде Қазақстанды қалыптастыруда таңдаудың әуелден «бір ел – бір тағдыр» қағидасына түсері айдан анық еді. Қазақ халқының ұйыстырушы рөлі қағидасы – Қазақстан қазақ халқының көп ғасырлық мемлекеттігінің бірден-бір құқықтық және тарихи мұрагері және саяси әрі мемлекеттік дәстүрлерін жалғастырушы екендігіне, сондай-ақ оның этностық аумағында құрылғандығына негізделген. «Қазақ КСР мемлекеттік егемендігі туралы» Декларацияда және «Қазақстан Республикасының мемлекеттік Тәуелсіздігі туралы» Конституциялық заңда егеменді ұлттың әрі қарай ұйысуының негіздерін айқындаған екі қағидат жария етілді: біріншіден – Қазақстан мемлекетін құрудың алғышарты болып табылатын қазақ халқының өз тағдырын өзі таңдау құқы; екіншісі – елдің барлық азаматтары үшін жасалатын тең мүмкіндік. Осы орайда, «менің тілім – менің халқым – менің елім – менің жерім» сияқты ортақ ұғымдар этносына қарамастан барша Қазақстан азаматтарына бірдей тән. Өткен ғасырда қазақ даласына 1,2 миллионнан астам түрлі этнос өкілдері күштеп қоныс аударылды. Онда да қазақтың дархандығы шешуші рөл атқарып, бөтен жұрт өкілдерін өгейсіткен жоқ. Нәубет жылдарында этностардың басына түскен трагедия түрлі ұлт пен ұлыстың қарым-қатынастарына, түсіністігіне үлкен әсер етіп, зұлматты бірге көтеруіне септігін тигізді. Халықтар достығы сол кездің өзінде іргетас болып қаланған еді. Яғни, қасаң заманда қазақ жерінде қалыптасқан құндылықтар мен бүгінгі елдік бірлік пен татулықтың арасында тікелей байланыс бар. Бүгінде этностық топтар осындай берік негізден бастау алып, қазақ ұлтының айналасына жұмылып, ортақ Отанымыз – Тәуелсіз Қазақстанды құру ісіне үлестерін қосуда. 100-ден астам этнос өкілдері тұратын, түрлі этностық топтар арасында тұрақты қарым-қатынас қалыптасқан Қазақстан үшін толеранттылық пен жауапкершілік ерекше маңызды. Қазақстанда Тәуелсіздіктің 20 жылында «толеранттылықтың» өзіндік түсінігі қалыптасып, Қазақстан халқы Ассамблеясының негізінде этносаралық толеранттылық пен қоғамдық келісімнің бірегей үлгісі қалыптасты. Егер дәстүрлі, батыстық тұрғыда толеранттылық дегеніміз – заң ережелері мен саяси дәлдік талаптарына негізделген төзімділік деген ұғымды білдірсе, Қазақстан үшін толеранттылық, ең алдымен халық жадындағы жазылмаған ереже, этносаралық қатынастардың ақиқаты мен қоғамдық адамгершілік қағидалары. Елімізде толеранттылық ұғымы сенім, өзара құрмет, ынтымақтастық және мәдениетаралық диалог арқылы түсіндіріледі. Оның негізінде дәстүр мен патриотизм, жаңару, жасампаздық және жеңіс мұраттарына негізделген мүмкіндіктердің теңдігі және ұлттық рух құндылықтары жатыр. Бүгінде мемлекеттік тіл – қазақ тілі Қазақстан халқын біріктіруші аса маңызды фактор, тәуелсіздік пен егемендікті қамтамасыз етудің тетігі, ерекше белгісі, нышаны болып танылады. Ол адамның қандай да бір мемлекеттің азаматтығын таңдауының негізі. Мемлекеттік тіл – әркімнің азаматтық және саяси құқықтарын толық іске асыруының, елдің қоғамдық саяси өміріне толыққанды етене араласуының кепілі, жеке бәсекеге қабілеттілігі мен тиімді әлеуметтік қарым-қатынасының факторы. Тәуелсіздікті баянды етуде және қазақ жерінің амандығы мен бейбітшілігін қамтамасыз ету үшін басты жауапкершілік қазақ халқына жүктеледі. Осы тарихи жауапкершілікті орындау мақсатында этносаралық толеранттылық пен қоғамдық келісімнің өзіндік үлгісін қалыптастыра отырып, Қазақстан этностардың мәдениеті мен тілдерін дамыту үшін жағдай жасауды қамтамасыз етеді. Мемлекеттік этносаясаттың осы қағидасы өзінің сипаты бойынша бірегей институт болып табылатын Қазақстан халқы Ассамблеясы қызметінде ерекше орынды иеленеді. Президент Н.Ә.Назарбаевтың бастамасымен 1995 жылы құрылған бұл институт 16 жыл ішінде этносаралық қатынастар мәселесі бойынша азаматтық қоғам мен мемлекет арасындағы өзара іс қимылды қамтамасыз етудің әмбебап тетігі ретінде, парламенттік өкілділігі бар институт ретінде, сондай-ақ қоғамды тұтастырып, ел бірлігін қалыптастырушы құрал ретінде өзінің сан қырлы әлеуетін аша түсуде. Осы орайда, Мемлекет басшысының елдегі этносаралық қатынастар мәселесіне ерекше ықыласына Тәуелсіздіктің жиырма жылы ішінде Қазақстан халқы Ассамблеясына қатысты Қазақстан Республикасы Конституциясына түзетулер енгізіліп, «Қазақстан халқы Ассамблеясы туралы» арнайы Заңның, Қазақстан Республикасы Президентінің жеті бірдей Жарлығының қабылдануы, Ассамблеяның орта мерзімге арналған (2011 жылға дейінгі) стратегиясының іске асырылуы, өзінің ұйыстырушы әлеуеті жөнінен бірегей құжат болып табылатын, біздің полиэтностық қоғамның даму басымдықтары туралы стратегиялық бағдарламалық құжат – Қазақстанның ел бірлігі Доктринасының қабылданып, іске қосылуы айқын дәлел бола алады. Сонымен қатар, егер Тәуелсіздік жылдары Қазақстанда мемлекеттiк сәйкестiлiгiн қалыптастыру, тіл саясаты, «Қоғамның идеялық ұйысуы Қазақстанның өсіп-өркендеуінің шарты» тұжырымдамаларының, 1997 жылғы «Қазақстан Республикасындағы тілдер туралы» Заңның, Шетелде тұратын отандастарды қолдау, Этносаралық және конфессияаралық келiсiмнiң қазақстандық моделiн жетiлдiру, Тілдерді қолдану мен дамыту мемлекеттік бағдарламаларының әзірленіп, іске асырылғанын ескерсек, этносаралық келісім мәселесі елімізде қоғам мен мемлекет назарында орталық орынға ие екендігін аңғару қиын емес. Қазақстан халқы Ассамблеясының құрамына республикалық, аймақтық деңгейдегі 820-дан аса этномәдени бірлестіктер енген. Сондай-ақ оның институционалды құрамы тек этностық мәселелер шеңберімен ғана шектеліп қалған жоқ. Бүгінде оның айналасында журналистер қауымдастығы, ғылыми қоғамдастық, гендерлік және кәсіпкерлік ұйымдардан тұратын азаматтық қоғамның сан салалы құрылымдары жұмыс істеуде. Осы айтылғандар негізінде Қазақстан халқы Ассамблеясы қоғамдағы әлеуметтік сұраныстарды қанағаттандыруға жауап беретін барлық азаматтық қоғам институттарының басын біріктіретін, ұйыстырушы орталық болуы мүмкін деген ой туындайды. Мұндай тұжырым жасауға 2010 жылғы сәуірде Мемлекет басшысы мақұлдаған Қазақстанның ел бірлігі доктринасының ережелері де себеп болады. Бүгінде Доктринаны іске асыруға Қазақстан Үкіметі, 12 министрлік, 6 республикалық агенттік, Жоғарғы Сот, Бас прокуратура, барлық жергілікті атқарушы органдар тартылған. Доктринаны іске асыру еліміздегі идеологияның дамуына, ел бірлігін нығайтуға, Қазақстанның 2020 жылға дейінгі стратегиялық жоспарының жүзеге асуына қосылған өлшеусіз үлес болып табылады. Бұл құжат қоғамды, барша азаматтар үшін ортақ құндылықтар мен қағидалар жүйесін тануға негізделген қоғамдық ұйысудың жаңа деңгейі – ел бірлігіне қол жеткізуге бастайды. Ол Тәуелсіздікті және қазақ жерінде құрылған мемлекеттікті дамытуды біздің ең басты құндылығымыз деп паш етеді. Доктринада ел бірлігіне қол жеткізудің барлық бағыттары бойынша мынадай міндеттер айқындалған: халық тұтастығының объективті негізі ретінде экономиканы жаңартуға және тиімділігін арттыруға қол жеткізу, ел бірлігі мен қоғамдық тұрақтылықтың берік әлеуметтік негізін жасау мақсатында орта тапты қалыптастыру және Ұлт Рухын дамыту, нығайту, осыны еліміздегі әрбір азаматтың өмірлік бағдарына айналдыру. Осыған орай, Мемлекет басшысының тапсырмасымен Қазақстанның 2020 жылға дейінгі стратегиялық даму басымдықтарымен байланысты еліміздің жедел индустриялық-инновациялық даму бағдарламасын іске асыруға, қоғамды әлеуметтік жаңартуға, әлеуметтік жауапкершілікті арттыруға және қазақстандық этносаясатты ғылыми ой елегінен өткізуге бағытталған Ассамблея қызметінің жаңа бағыттары қалыптасты. Тәуелсіздіктің 20 жылдығына арналып өткізілген Қазақстан халқы Ассамблеясының әлеуметтік жауапкершілік форумы бұл салада Ассамблея әлеуетінің ашылмаған қырларын көрсетіп берді. Форумға ауыл шаруашылығы өнімдерін өндіру, қайта өңдеу, көмірсутектерді қайта өңдеу, көлік және коммуникация, құрылыс және құрылыс материалдары, энергетика, металлургия, химия өндірісі, нана технология, қызмет көрсету экономикасы салалары бойынша 61 индустриялық-инновациялық жобалар ұсынылды. Қазақстан халқы Ассамблеясы және Индустрия және жаңа технологиялар министрлігі арасында экономиканы индустриялық-инновациялық дамыту саласындағы әріптестік жөнінде ынтымақтастық туралы меморандумға қол қойылды. Ең бастысы, форум Қазақстан азаматтарын нақты істердің айналасында біріктіруге қол жеткізді, бұл экономикалық мүдделер, өмірлік мақсаттар мен құндылықтарға арқа сүйейтін нағыз бірлік болмақ. Ал оның артында әлеуметтік жауапкершілік пен қоғамды әлеуметтік жаңартуға талпыну тұр. Ассамблеяның XIV сессиясында Мемлекет басшысы осы мақсаттарға қоғамдық қолдауды тарту жөнінде міндеттер қойған болатын. Ол өз сөзінде «іскер адамдардың тұрақтылыққа қолдау көрсетуі, бұл ең алдымен олардың өзінің мүдделеріне сәйкес және бұл біздің болашағымызға салынған инвестиция» деп атап көрсетті. Тәуелсіздіктің 20 жылдығы қарсаңында ел бірлігін нығайтуға, Қазақстан халқының тұтастығын бекітуге бағытталған батыл да анық қадам жасалды – Мемлекет басшысы Қазақстан халқы Ассамблеясының даму стратегиясына мемлекеттік бағдарлама мәртебесін беру туралы тапсырма берді. Бүгінде стратегия жобасымен жұмыс жүргізілуде. Этномәдени бірлестіктер мен ғылыми-сарапшылық қауымдастықтардың әлеуетін тарта отырып, жасалған жаңа құжат жаңа идеялардың түйіні, біздің еліміздің жарқын келешегінің кепілі – ел бірлігін нығайтудың жаңа дүмпуі болады деп сенеміз. Ералы ТОҒЖАНОВ, Қазақстан халқы Ассамблеясы Төрағасының орынбасары – Хатшылық меңгерушісі.