«Ел ішіндегі береке-бірлік бәріміздің ортақ байлығымыз», – дейді әр ұлт өкілдері
Ақтөбе облысы Достық үйі 2009 жылдың 10 қыркүйегінде Президент Н.Назарбаевтың қатысуымен салтанатты түрде ашылды. Елбасы Достық үйінің тұсауын кесті. 17 этномәдени бірлестік қоныс тепкен ғимарат өзінің айшықты келбетімен көз тартады. Жалпы көлемі 4150 шаршы метр аумақты алып жатқан үш қабатты ғимаратта этномәдени бірлестіктердің өз тілі мен ділін, төл мәдениетін дамытуына толық мүмкіндік жасалған. Бірінші қабатта бірлестік басшыларының кабинеттері, жоғарғы қабаттарда үлкен концерт залы, 300 орындық салтанат залы, хореография залы, мәжіліс өткізетін конференц-зал, музей, компьютер сыныбы және дайындық өткізетін бөлмелері орналасқан. Елбасы жүргізіп отырған саясаттың бір тіні ұлтаралық татулық екені мәлім. Соның арқасында көп ұлтты Қазақстанда «ыдыс-аяқ сылдыры» естілген емес. Барлық ұлт бір үйдің баласындай тату-тәтті өмір сүруде. Ақтөбедегі Достық үйі соның айғағы болып табылады. Соңғы жылдары Ақтөбе облысына жақын және алыс шетелден көшіп келіп жатқандар баршылық. Алғашында Достық үйінде 16 этномәдени бірлестік орналасады делінсе, кейін тағы 2 чех және дағыстан этномәдени бірлестіктері де «отау тігіп», қасиетті ұяны жылыта түсті. Біз орталық жетекшілерінің бірқатарының лебізін ұсынғанды жөн көрдік.ДОСТЫҚ ҮЙІ – ЫНТЫМАҚ ҮЛГІСІ
Ғалымжан НҰРЫШЕВ, Ақтөбе мемлекеттік педагогикалық институтының ректоры, халықаралық «Қазақ тілі» қоғамы облыстық ұйымының төрағасы.
Бір отбасындай тату-тәтті өмір сүріп жатқан қазақстандықтарға өзге ел қызыға да, қызғана да қарайды. «Бірлік бар жерде тірлік бар» деген қағидаға сүйенген елімізде әр ұлттың өз тарихы мен мәдениетін насихаттауға мүмкіндік беріліп, жағдай жасалған. Осыған дәлел – Достық үйі. Халықтар арасындағы достықты насихаттап, ұлттар арасындағы қарым-қатынасты нығайтуға көңіл бөліп, сарабдал саясат ұстанып отырған Елбасына алғыс айтамыз. * * *Павел МАГЛЕЛИ, Болгар этномәдени бірлестігінің жетекшісі.
Біздің бірлестігіміз 1996 жылы құрылды. Облыста мыңнан астам болгар тұрады. Негізінен Алға ауданының Болгарка селосында шоғырланған. Қалғандары Әйтеке би, Мәртөк ауданы, Ақтөбе қаласында тұрады. Достық үйінде барлық ұлттың өкілдері бас қосып, араласады. Лингафон кабинетінде өз тілдерімізді, мемлекеттік тілді үйренеміз. Компьютер сыныбы да бар. Мұнда біздің балаларымыз үйірмелерге қатысады. Біз осындай бірлігі жарасқан Қазақ елінде тұратынымызды мақтан етеміз. * * *Даази ОМАРОВ, Дағыстан этномәдени бірлестігінің жетекшісі.
Біздің бірлестіктің ашылғанына жарты жыл ғана болды. Құжат бойынша бірлестік кұрамында 30-дан астам мүше бар. Әрине, облыста дағыстандар көп. Сондықтан енді қатарымыздың көбейе түсетіні анық. Өзім 1973 жылдан бастап Қазақстанда тұрамын. Әрине, тарихи отанымыз Дағыстанмен де байланысып тұрамыз, ол жақта туыстарымыз бар. Бірлік пен келісім бар жерде халық та тату болмақ. Қазақстан – Отанымыз, біз Отанымызды көркейтуге күш жұмсаймыз.ТАТУЛЫҚ ТІНІ
Шығыс Қазақстан облысында Достық үйі 1992 жылы құрылған. Бұл Қазақстан жерінде бой көтерген алғашқы Достық үйі болатын. Кейін шығысқазақстандықтардың тәжірибесі ескеріліп, Қазақстан Президенті Әкімшілігінің ұсынысымен еліміздің өзге облыстарында да достық үйлері бой көтере бастады. Қазіргі таңда Шығыс Қазақстан облысында облыстық және облыс қалалары мен аймақтарында 7 достық үйі, 82 этномәдени бірлестік жұмыс істейді. Өскемен қаласында – 22, Семейде – 14, Риддерде – 11, Курчатовта – 3, Абай ауданында – 1, Бесқарағай ауданында – 1, Бородулиха ауданында – 6, Глубокое ауданында – 4, Жарма ауданында – 3, Зайсан ауданында – 2, Зырян ауданында – 6, Шемонайха ауданында 9 этномәдени бірлестік жұмыс істейді. Сол жағалаудағы этнографиялық кешенде, 37 га аумақты алып жатқан алаңда этномәдени бірлестіктердің 16 дәстүрлі үйі бой көтерді. 2010 жылдың 6 қыркүйегінде елімізде теңдесі жоқ өзгеше этноауылдың бірінші мәртебелі қонағы Қазақстан Президенті Нұрсұлтан Назарбаев болды. Әртүрлі этнос өкілдері Мемлекет басшысын өздерінің бар сән-салтанатымен, ән-билерімен, асқан қошеметтерімен қарсы алды. Этномәдени бірлестіктерінің өкілдері Қазақстанда татулық пен бейбітшілік тіні орнығып, осында мекен ететін барлық этностардың көп ғасырлық салт-дәстүрлері мен мәдениетінің сақталуы мен жандануына өлшеусіз үлес қосқаны үшін Президентке шексіз алғыстарын жеткізді.БАУЫРЛАСТЫҚ БАСТАУЫ
Қостанай облыстық Достық үйі 2006 жылдың 7 қыркүйегінде ашылды. Бұл күні қостанайлық этномәдени орталықтар өкілдерін қоныс тойларымен құттықтау үшін Елбасы Н. Назарбаев Достық үйіне арнайы атбасын тіреді. Президент этномәдени бірлестіктер жетекшілерімен кездесіп, Қостанай облысында Достық үйінің негізі қалануына күш салған облыс әкімі жұмысына жоғары баға берді. Әмбебап архитектуралық ғимараттың жалпы аумағы 1024 шаршы метрді алып жатыр. Достық үйі өзінің шаңырағының астына 16 этномәдени бірлестікті шоғырландырып отыр. Этномәдени бірлестіктер – қоғамдық ұйымдар. Сондықтан, әрбір этномәдени бірлестік барлық қажетті құрал-жабдықтармен жабдықталған арнайы кабинеттермен қамтамасыз етілген. Достық үйі 9 жексенбілік мектептің жұмыс істеуіне де жан-жақты жағдай жасап отыр. Бұл мектептерде 300-ге тарта адам дәріс алады. Олар өздерінің ана тілдерімен қоса, мемлекеттік тілді де меңгеруде. Этномәдени бірлестіктердің құзырында 116 орындық мәжіліс залы мен айшықты көрме залы бар. Мәселен, көрме залында облыстың қалалары мен аудандарынан келген жас қылқалам иелері мен фотографтардың көрмелері ұйымдастырылады. Облыстық Достық үйінің негізгі қызметі Қазақстан халқы Ассамблеясы стратегиясын жүзеге асыруға, түрлі мемлекеттік бағдарламаларды орындауға бағытталған. Олардың ең негізгілері – мәдени-рухани кеңістікті қазақстандық патриотизм рухы, қазақ ұлтының мәдениеті мен мемлекеттік тілі негізінде байыту, облыстағы түрлі этностардың салт-дәстүрлерін, мәдениетін, тілін сақтап, дамытуға бірлесе күш салу. Біз төменде түрлі этнос өкілдерінің облыстағы Достық үйі турасындағы пікірлерін ұсынып отырмыз.Юрий ИВЛЕВ, Қостанай облыстық Орыс қоғамының төрағасы.
Қостанай облыстық Достық үйі Қазақстан халқы Ассамблеясымен бірлесіп, Қазақстан халқы Ассамблеясы стратегиясында көзделген мақсат-міндеттерді жүзеге асыруға күш салып келеді. Достық үйі 16 ұлттық-мәдени орталықты біріктіреді. Оның басты мемлекеттік миссиясы бар. Ол – ұлтаралық келісімді одан әрі дамыту, түрлі этнос өкілдерінің мәдениетіне деген құрметті қалыптастыру, елдегі бейбітшілік пен достықты сақтау.Ромуальда ГИЦЕВИЧ , Қостанай облыстық «Надея» поляк этномәдени бірлестігінің төрағасы.
Достық үйі облыстағы этномәдени бірлестіктер өкілдері үшін шын мәнісіндегі туған үйге айналды. Бұл жерде біз өзіміздің көкейімізде жүрген барлық мәдени іс-шараларымыз бен жоспарларымызды жүзеге асыра аламыз. Достық үйінде жексенбілік мектеп бар. Мұнда барлық қызметкерлерге әдістемелік және тәжірибелік тұрғыда үлкен көмек көрсетіледі. Болашақта мұндай игі істер өз жалғасын табады деген сенімдемін.
БЕЙБІТШІЛІК – БАСТЫ БАЙЛЫҒЫМЫЗ
Қазақстан Президенті Нұрсұлтан Назарбаевтың биылғы «Болашақтың іргесін бірге қалаймыз» атты Қазақстан халқына арнаған Жолдауында бірлік пен тірлікке үндеген өсиеті өте көп. «Ырыс – ынтымаққа жолығады, дәулет – бірлікпен толығады». «Көптілді және көпконфессиялы қоғамдағы бейбітшілік пен келісім бұл сіздер мен біздің еңбегіміз, құрметті қазақстандықтар». «Алдымызда атқарылар қыруар істер бар. Бұл жолда біздің басты құндылығымыз – берекелі бірлігіміз. Мен ауызбіршіліктен айнымайтын ақжүрек жұртымның қуатты ұлтқа, шуақты ұлысқа айналарына кәміл сенемін. Халқымызда «Бақ берерде елге ырыс қонады, ұстанған жолы дұрыс болады» деген даналық сөз бар», – деп ағынан жарылады Елбасымыз. Айтса айтқандай, 130 ұлт пен ұлыс мекендейтін кең-байтақ елімізде шынайы татулық пен достық орныққан. Осы орайда Қазақстан халқы Ассамблеясының атқарып отырған жұмысы ұшан-теңіз екенін де тілге тиек еткеніміз жөн. Ұлысымыздың ұйытқысы саналатын оңтүстік өңірінің жұртшылығы да бір ата-ананың баласындай тату-тәтті ғұмыр кешуде. Бір-бірімен қыз алысып, қыз берісіп, құда-құдандалы болып жүрген жағдайы да бар. Қаймағы бұзылмаған халқымыздың әдет-ғұрпы мен салт-дәстүрін сыйлап, құрметтеп жүрген барша ұлт пен ұлыстың өкілдеріне алғыстан басқа айтарымыз жоқ. Өркениетті 50 елдің қатарына енуді басты мақсат-мұрат тұтқан егемен еліміздің үшінші қаласы саналатын шырайлы Шымкент шаһарында да басты байлығымыз – бейбітшілік пен келісімге баса көңіл бөлініп келеді. Дауылпаз ақын Сәкен Сейфуллиннің есімін иеленген Достық үйі Оңтүстік Қазақстан облысын мекендейтін барлық ұлттар мен ұлыстардың басын біріктіретін рухани киелі орда іспеттес. Қазіргі таңда 20 облыстық этномәдени орталық және олардың 48 филиалы жұмыс істейді. Олардың біразының басшылығы осында орналасқан. Халық достығын нығайтуды басты мақсат еткен бұл орталықтардың жұмыс жоспарлары ауқымды. Мәдени-көпшілік іс-шаралар мен ұлттық мерекелерді бірге өткізу игі дәстүрге айналған. Әсіресе, Қазақстан халқының бірлігі күні ерекше тойланады. Қазақ пен өзбектің «Наурыз мейрамы» мен «Хосил байрами», орыстың «Масленица», «Медовый спас», татардың «Сабантуй», «Чак-чак байрами», ұйғырдың «Узум сәйлиси», гректің «Пасха», еврейдің «Рош-а-Шана», «Песах», чешендердің «Нена мот», поляктардың «Волканот», «Рождество», корейлердің шығыс күнтізбесі бойынша Жаңа жылы, тағы басқа да түрлі мерекелер шымкенттіктерге шат-шадыман қуаныш сыйлауда. Сонымен қатар, этностардың бірлескен халықаралық «Қазақ романсиадасы», «Играй, гармонь!». «Офарин», «Аскиячилар» сияқты өнер сайыстары, фестивальдері өткізіліп тұрады. Этномәдени орталықтардың бәрі облыс пен қала деңгейінде өтетін барлық ресми іс-шараларға белсенді қатысады. Сонымен қатар орталық көркемөнерпаздары әскери бөлімшелер, қарттар, мүгедектер, балалар үйлеріне жиі барып, қызғылықты концерттер қойып тұрады. Достық үйінде сан-алуан үйірмелер, жексенбілік мектептер, көркемөнерпаздар ұжымдары жұмыс істейді. Онда ән-би үйретіп қана қоймастан, өздерінің ана тілімен қоса мемлекеттік тілді меңгеруге де барлық жағдайлар жасалған. Бүгінде халықтар достығы үйінде – 14, соның ішінде 6 жауапты қызметкер жұмыс істейді. Біз өткізетін игілікті іс-шараларымыздың бәрін облыс әкімімен, Оңтүстік Қазақстан облыстық Қазақстан халқы Ассамблеясымен, облыстық ішкі саясат басқармасымен келісе отырып жүргіземіз. Облыс басшысы Асқар Мырзахметовтің тікелей қолдауымен «Көңілді тапқырлар клубының» облыстық, аймақтық, республикалық жарыстарын өткізіп жүрміз. Асқар Исабекұлы енді 2000 шаршы метр ғимаратымыздың жанынан қосымша құрылыс салу үшін қомақты қаржы бөліп отыр. Қала әкімі Арман Жетпісбаевтың КТК кубогін өткізуі де жақсы дәстүрге айналған. Біз де жұмысымызды барынша жандандырып, басты байлығымыз – халықтар достығы, бейбітшілік пен келісімді нығайтуға сүбелі үлес қоса беретін боламыз.Айдынғали СЫДЫҚОВ, С.Сейфуллин атындағы Достық үйінің директоры.
Оңтүстік Қазақстан облысы.
КЕЛІСІМ ДІҢГЕГІ
Солтүстік Қазақстан облысының жергілікті мемлекеттік органдары, облыстық Қазақстан халқы Ассамблеясы мен этномәдени бірлестіктер өңірдегі этносаралық бірлік пен келісімді сақтау мен нығайтуға айтарлықтай үлес қосуда. Облыстағы Достық үйінде 22 этномәдени бірлестік пен «Ассамблея» корпоративтік қоры орналасқан. Жалпы аумағы 1079,9 шаршы метрді алып жатқан Достық үйінде 154 адамға арналған акт залы мен мәжіліс залы бар. Көп функциялы бұл ғимаратта этносаралық және конфессияаралық келісімді сақтау мен ел ішіндегі тұрақтылықты нығайту, Қазақстанда тұратын барлық азаматтарға ортақ тарихи-мәдени құндылықтар мен мұраларды, мәдениет пен салт-дәстүрді сақтау бағытында ауқымды жұмыстар атқарылуда. Достық үйінде көрмелер, тіл үйрену үйірмелері тұрақты түрде жұмыс істейді. Әртүрлі фестивальдер, байқаулар ұйымдастырылады. Бүгінгі күнге дейін облыстың көптеген аудандарында ауқымды іс-шаралар мен жобалар жүзеге асырылды. Солардың қатарына «Солтүстік Қазақстан облысын мекендейтін этностардың дәстүрлері мен салттары» атты электронды нұсқасы бар кітапты жатқызуға болады. Облыс аудандарындағы этномәдени бірлестіктерді қолдау бағытында да біраз жұмыстардың басы қайырылған. Олар өңірлердегі күрделі әлеуметтік мәселелерді оңтайландыруды, жастармен жұмысты жандандыруды, мемлекеттік тілді дамытуды, салт-дәстүрлерді сақтауды көздейді. «Этноауыл-Имантау» жобасы жүзеге асырылып, ол қоғам мен мемлекеттік органдардың назарына ұсынылды. Құны 100 млн. теңгені құрайтын бұл жоба ағартушылық-иммидждік және танымдық туристік бағытты дамытуды басшылыққа алған. Бүгінде «Қамбар-Ата», «Ұста» секілді бірқатар жобаларды жүзеге асыру жолға қойылған. «Намыс» философиялық-әдістемелік клубы мен «Жас ұрпақ» жастар қанаты да облыстағы этномәдени бірлестіктер жұмыстарын жандандыруға ықпал етуде. Биылғы жылдың маусым айында Петропавл қаласында ауылдық этномәдени бірлестіктердің облыстық байқауы өтті. «Бір ел – бір тағдыр» деген атаумен өткен бұл шара Қазақстан Тәуелсіздігінің 20 жылдығына орай ұйымдастырылды. 6 шілде – Астана күні осы байқаудың жеңімпаздарын марапаттау, Қазақстан халқы Ассамблеясының алғыс хаттарын тапсыру рәсімі өтті. Байқаудың қорытындысында Тимирязев, Ақжар және Айыртау аудандарының этномәдени бірлестіктері жеңіске жетті. Шара жеңімпаздарына тағайындалған 200 мың теңге корпоративтік қор қаражатынан бөлінді. Бүгінде облыста этностарды жұмылдыру мен олардың арасындағы келісімді нығайту бағытында бірқатар жоба-бастамалар қолға алынуда. Биылғы жылдың маусым айында облыстық «Салт-Дәстүр» фестивалінің бірінші кезеңінің өткізілуі – осының айғағы. Бұл шара аясында жергілікті жерлердегі этномәдени бірлестіктерге облыстық Қазақстан халқы Ассамблеясы мен «Ассамблея» корпоративтік қоры тарапынан тәжірибелік және әдістемелік қолдау-көмек көрсетілді. __________________________Айқарма беттің материалдарын ұйымдастырған Ләйла ЕДІЛҚЫЗЫ.