Тәуелсіздік! Жасампаздықтың 20 жылдығы жақындаған сайын осынау бір ауыз сөздің адам жанына ерекше әсер ететін қасиеті мен құдіретін анық танығандай боласың. Жақсы мен жаманның, асыл мен жасықтың, адал мен арамның парқын айыра білетін жан астарында теңіздей терең мағына, шыңыраудай түпсіз тарих жатқанын және пайымдай алады. 1991 жылға дейінгі қазақ елінің әрбір алға басқан азаттық, теңдік деген ұлы ұғымның аясына сыйып кетерліктей, жатса түсінен, жүрсе есінен кетпеген ата-бабаның сан ғасырлық арманы, жүрген жолы, көрген азабы сол бір ғажайып тәуелсіздікке ұмтылыс емес пе? Қаншама қазақтың хандары, батырлары халқының азаттығы үшін қанын төкті, жанын пида етті! Ақын-жырауларымыз жырларына қосып, күңіреніп өтті. Амал нешік, елінің, жерінің біртұтастығын, бірлігін сақтап, қасық қандары қалғанша соғысса да, бағзы арман күйінде қала берді. Қанатын қомдаған мұзбалақша жауларына шүйліккен Ағынтай батырдың Қарасай батырмен мәңгі достығы жоңғарлар шапқыншылығы кезінде тоғысқан жоқ па? Қос батыр ерлік істерімен аңызға айналды. Оларды өлім де айыра алмады. Елі қос батырын бірге жерледі. Адал достықтың берік символы іспетті олардың бейнелері, ерліктері – бүгін үлгі. Облыс орталығы Петропавл қаласының қақ төрінде ескерткіш қойылып, Айыртау өңірінде күнмен таласқан күмбез орнатылды. Қазақ хандығының тұтастығы мен тәуелсіздігі жолында шау тартқанша аттан түспеген жүрек жұтқан ержүрек, «Ақтабан шұбырынды, алқакөл сұлама» қасіретін «Елім-ай» дастанына арқау еткен арқалы ақын Қожаберген жырау қазақ, ноғай, қарақалпақ халықтарының біріккен әскерін басқарып, жауға қаймықпастан қарсы шапқан. Елім деп еңірегенде етегі жасқа толатын мұндай тұлғалар еліміздің әр қиырынан көптеп шыққан. Екінші дүниежүзілік соғыстың Ұлы Жеңісі – тәуелсіздігімізге жету жолының бірі, ғасырлық ұмытылмас оқиғалардың бірегейі. Ж. Қизатов, Т.Позолотин, Ы. Ыбыраев, Ә. Досмұхамбетов, Е. Дәуітов, Ә. Дәрменов, тағы басқа жерлестеріміз Ұлы Отан соғысы жылдарында ерен ерлік көрсетіп, Кеңес Одағының Батырлары атанды. Олардың есімдері халық арасында зор құрметпен аталады. Тереңнен ойлана қарасақ, халқымыздың барша тарихы тәуелсіздікпен тығыз байланысты екенін көреміз.
Міне, Мемлекет басшысы Нұрсұлтан Назарбаев әлемге айдай танытқан елімнің Тәуелсіздігінің 20 жылдық мерейтойын жұртшылық болып тойлағалы отырмыз. Бұл жай ғана жиын емес, Қазақстанның жеке мемлекет ретінде өсу, өркендеу, даму, төрткүл дүниеге танылу кезеңі. «Дәстүрлі ұлтаралық татулықтың және басқа елдермен тату көршілік, өзара пайдалы қарым-қатынасының қажетті элементі ретінде берік те іргелі бейбітшіліксіз мемлекеттің бақытты болашағы жоқ, болуы да мүмкін емес», деп есептейтін Елбасы өз халқын игі істерге бастап, жол көрсетіп келеді.
Тәуелсіздіктің тірегі – оның армиясы, ішкі және сыртқы қорғаныс жүйесі. Аз ғана уақыттың ішінде Қарулы Күштеріміз ірге көтеріп, мемлекет өміріндегі рөлі мен маңызы арта түсті. Республика Қарулы Күштерінің Жоғарғы Бас Қолбасшысы Н. Назарбаев тәуелсіз елдің қорғаныс саласының қалыптасуына тікелей басшылық етіп, замана талаптарына сай жоғары сапада жетілдіру мәселесін басты назарда ұстап келеді. Жаңа үлгідегі армия құрудың заңнамалық негіздерін, тұжырымдамасын бекітіп берді. Қиын кезеңнің өзінде Қорғаныс министрлігі, Республикалық ұлан жасақталды. Әскери мамандар даярлау қолға алынды. Тәуелсіз елдің тұңғыш Ата Заңы қабылданып, адамдардың құқықтары мен бостандықтарын қорғауға ерекше мән берілді.
Орталық Азия аймағындағы геосаяси жағдайдың өзгеруі, қауіпсіздіктің жаңа қатерлерінің пайда болуы, мемлекеттің әскери ұйымдарын нарық жағдайына бейімдеу жаңа әскери доктрина қабылдауға әсер етті. Бұл да тереңнен ойластырылған шешім. Әскери доктрина дегеніміз – мемлекеттің әскери қауіпсіздігін қамтамасыз етуге, соғыстар мен қарулы жанжалдарды болдырмауға, Қарулы Күштерді, басқа да әскерлер мен әскери құрылымдарды дамыту мен қолдануға негіз қалаушы көзқарастар жүйесін білдіретін құжат. Онда бірыңғай мемлекеттік әскери-техникалық саясат жүргізу және мемлекеттік қорғаныс тапсырысын қалыптастыру туралы анық жазылған. Қарулы Күштерді құру және дамыту тәжірибесі келісім-шарт бойынша әскери қызметшілердің, армияның тыныс-тіршілігіне барлық жағынан оң ықпал ететінін көрсетіп отыр. Армияда қатаң тәртіп пен әскери қызметшілердің, сарбаздардың жауынгерлік әзірлігінен басқа, олардың денсаулығы, азық-түлікпен қамтамасыз етілуі, киім-кешегі бүтін болуы шарт. Онсыз армия бекем бола алмайды. Қазіргі заман армиясын құру – техника мен қару-жарақты жаңғырту ғана емес, ең алдымен, заманға лайық әскери қызметші, жаңа кадрлар тәрбиелеу. Кәсіби армия құрудың іргетасы ретінде біліктілігі жоғары әскери кадрларды даярлау Қазақстан Республикасының Қарулы Күштерін жаңарту жолындағы іргелі қадам болды. Бұл тапсырманы біздің алдымызға Жоғары Қолбасшының өзі қойып, іргелі міндеттерін белгілеп берді. Қазір көптеген мемлекеттер Қарулы Күштерін аралас сипатта жасақтауға біртіндеп көшіп жатыр. Олардың қатарында Италия, Франция, ГФР, Оңтүстік Корея және басқа да елдер бар. Біздің әскерімізді де кәсіби деп айтуға болады. Себебі Қарулы Күштердің 70 пайызын офицерлер мен келісім-шарт бойынша қызметкерлерден тұратын кәсібилер құрайды.
1991 жыл, 16 желтоқсан! Әр қазақстандықтың есінде ерекше сақталатын тарихи оқиға, қуанышты күн! Бұл жылы мен Боралдайдағы әскери бөлімнің үгіт отрядының командирі қызметінде едім. Офицерлер арасында қазақ жігіттері аз. Бірге қызмет етіп, күліп-ойнап жүрген басқа ұлт офицерлері елдеріне қайтарда: – «Сендер әскери қызмет істейміз дейсіңдер, арнайы кадр жоқ қой», – дегені. Өздерінше мұқатқан түрлері. Шүкіршілік, 20 жылдың ішінде біз басқа мемлекеттерден еш кем емес жоғары білімді әскери кадрлар шоғырын тәрбиелеп шығардық. Қару-жарағымыз да, әскери техникамыз да талапқа сай. Қазіргі таңда қазақстандық әскери қызметшілер әлемнің жетекші 55 әскери оқу орындарында 160-тан астам мамандық бойынша білім алады. 1996 жылдан бастап күні бүгінге дейін Қазақстан Республикасының 3600-ден астам әскери қызметшісі Ресей Федерациясының әскери және азаматтық оқу орындарын, сондай-ақ академиялық және офицерлердің курстарын тәмамдады. Ресейдің 42 әскери оқу орындары мен оқу орталықтарында оқудың толық бағдарламасы бойынша және қысқа мерзімді курстарда мыңнан астам қазақстандық әскери қызметші даярлықтан өтуде. Біздің армия туралы беделді әскери шолушылардың бірі В.Литовкин әскери жаттығуларды көргеннен кейін «Качеством призывного контингента может похвастаться не каждая страна. Быть офицером и солдатом в Казахстане престижно», деген екен. Қазір бәріміздің маңызды мақсатымыз – мемлекеттің әскери қауіпсіздігін қамтамасыз ету, агрессияны немесе әскери жанжалдар тұтандыруды болдырмау, қоғамды қорғау, еліміздің саяси және экономикалық мүдделерін іске асыру үшін қолайлы жағдай жасау. Сондықтан әлемдік стандарттар бойынша қазіргі заманғы қару-жарақпен және техникамен жарақтандырылған жоғары кәсіби армияның болуы Қазақстан Республикасының өмірлік маңызы бар ұлттық мүдделерін сенімді қорғау шарттарының бірі болып табылады.
1997 жылдан бастап елімізде халықаралық әскери жаттығулар өткізіліп келеді. Осы жылы «Ортазбат» жаттығуына 6 елдің әскери қызметшілері мен әскери атташелері қатысты. Ол кезде Тәуелсіздік алғанымызға 6-ақ жыл болатын. Содан бері «Рубеж-2006», «Дала қыраны», «Әскери достастық-2011», «Шығыс-2011», «Өзара іс-қимыл», т.б. бірлескен жедел-тактикалық оқу-жаттығулар өткізілді. Елбасы Қазақстан халқымен болған тікелей желіде «Қазіргі әлемде саны көп армиялардың қажеті шамалы. Ыңғайлы, ұтқыр, жақсы жабдықталған, әзірлігі мол армия керек. Армия халқымыз мақтанатындай болсын. Өйткені, ол – Қазақстан халқының армиясы. Армиямыздың беделін арттыра түсейік», деген болатын.
Қазақстан – бүгінде даму әлеуеті қарқынды мемлекет. Қазақтың маңдайына біткен хас батыр Бауыржан атамыздың абырой туралы айтқан мынадай пікірі бар: «Абырой – жеке адамның ар-намысын ұғыну деген сөз. Абыройды жоғары моральдық рухты сақтау жолында өз өмірін қиюға дейін баруға ниет ету намыс деп аталады». Біздің департаментте әскер қатарына алынушыларды шығарып салу шаралары жүйелі өткізіледі. Ондағы мақсат – отансүйгіш қасиеттерге тәрбиелеу. Бүгінгі күні әрбір қазақстандық азамат – қазақ елінде туғанын мақтаныш етіп, өз жерінің патриоты болуға тиіс. Ғасырлар бойы ұмтылған басты байлығымызды – ел тәуелсіздігін сақтауға үлес қосу – әр қазақстандықтың абыройлы міндеті. Бақыт – еліміздің тыныштығы мен біртұтастығында. Елбасымыз Н.Ә. Назарбаев айтқандай, бәріміз жұмыла еңбек етіп, қызмет жасауымыз керек, сонда біздің елімізді, Отанымызды қаншалықты сүйетінімізді көрсете білеміз. Отанға деген сүйіспеншілік, яғни бейбіт өмірде халыққа адал еңбек етіп, еліміздің жарасымды одан әрі алпауыт мемлекет болуына күш салу. Сондықтан әрбір қазақстандық өз еліне, Отанына деген құрметі мен сүйіспеншілігін іспен дәлелдей білуі керек. Ол – әрбір азаматтың қасиетті парызы.
Мұратбек ЗЕЙНУЛЛИН, Солтүстік Қазақстан облыстық қорғаныс ісі жөніндегі департаменттің бастығы, полковник.