Қазақстанның атын әлемге танытқан ЭКСПО-2017 Халықаралық көрмесінің аяқталғанына 10 қыркүйек күні бір жыл толды. «Астана ЭКСПО-2017» Ұлттық компаниясының басқарма төрағасы Ербол Шормановпен әңгімелесе отырып, көрмеден қалған нысандардың бүгінгі тыныс-тіршілігін, көрменің бізге не беріп, қандай жәдігер қалдырғанын сұрап, білдік.
– Ербол Әлімқұлұлы, сұхбатымызды бастамас бұрын, бір жылға кері шегініп, тарихқа айналған «ЭКСПО-2017» көрмесін еске алайықшы?
– Ең алдымен айта кететін жайт – Қазақстан посткеңестік елдер арасында осындай халықаралық көрме өткізген жалғыз ел және бұл Президенттің бастамасының арқасында мүмкін болған дүние. Ұзақ таластан кейін 2017 жылғы халықаралық көрменің өтетін орны ретінде Бельгияның Льеж қаласы емес, Қазақстанның елордасы – жас Астана таңдалды.
Естеріңізге сала кетсем, көрмеге бүкіл әлемнен жалпы саны 115 ел мен 22 халықаралық ұйым қатысты. Жалпы, Қазақстан көрмеге 2,5 млн адам келеді деп болжаған. Бірақ, көрмені 4 млн адам тамашалады.
Көрме 93 күнге жалғасты, сол 93 күн бойы көрме аясында әртүрлі мемлекет басшыларының қатысуымен 220 ресми шара ұйымдастырылып, энергетика, құрылыс, инвестиция сияқты салалардағы Қазақстанның іскер және ғылыми-білім орталары көрмеге қатысқан елдермен 39 келісімге қол қойды. Бұл әрине, бүкіл елдің, үкімет пен мемлекеттік органдардың үйлесе, бірлесе жұмыс істеуінің арқасында сәтті өткен көрме болды.
Ал, көрме кезінде Қазақстанның астанасы жаһандық назардың ортасында болды. Олай деуіме себеп жоқ емес. Мысалы, маңызды оқиғалар өткізетін қалалар әлеуетінің рейтингісінде, Қазақстан елордасы ШЫҰ мен ТМД елдері арасында ТОП-5-ке еніп, «National Geographic» журналының «Болашақтың қаласы» атты номинациясына ие болды. Ал, әлемге әйгілі «New York Times» журналы Астананы әлем бойынша барып көруге тұрарлық қалалардың ондығына енгізген.
– Ал осы көрме Қазақстанға қандай да бір мультипликативті табыс бере алды ма?
– Жалпы, мен ЭКСПО-2017 көрмесін дағдарысқа қарсы жоба дер едім және бұл жобаға елдің бүкіл аймақтары қатысты. «Астана ЭКСПО-2017» Ұлттық компаниясы мен облыс әкімдіктері, сондай-ақ, Астана мен Алматы әкімдіктері арасында көрме нысандарының құрылысына отандық тауар өндірушілердің тауарын пайдалану туралы меморандумдарға қол қойылған болатын. Осының нәтижесінде 408 отандық кәсіпорын тапсырыс алыпты. Олардың барлығы бірігіп 414 млрд теңгенің жұмысын атқарған. Осылайша, 50 мың жаңа жұмыс орны, соның ішінде Қазақстан аймақтарында 17 мың жаңа жұмыс орны ашылды. Сондай-ақ көрмеге дайындық кезіндегі жұмыстарға шағын және орта кәсіптегі 1400 субьект тартылды.
Тек қана туризм саласының өзінде туроператорлардың қызметтері 78 пайызға артқан. Әуе және темір жолмен қатынаған жолаушылар саны да 25 процентке көбейген.
– Қазақстан «Болашақтың энергиясы» атты тақырып ұсынудан не ұтты деп ойлайсыз? Біз ұсынған тақырып әлемдегі ғылыми өркениеттің кіндігіне айнала алды ма?
– Әрине, көрме тақырыбы ЭКСПО-2017 шарасының сәтті өтуіне себеп болған факторлардың бірі. Себебі, көрмеге қойылған сан түрлі технологияға қарап, әлем баламалы энергияны тұрақты қолдануға бір табан жақындап қалғанын байқадық. Ал «ЭКСПО-2017» көрмесі болса Қазақстандағы «жасыл экономиканың» ізін салып, жас мамандарға, қарапайым азаматтарға, жастарға осы саладағы идеялары мен ойларын одан әрі дамыту керек деген ой салды. Мына дерекке назар аударайықшы: көрмеде әлем елдері 150 ең озық технологияны әкеп көрсетті. Солардың ішінен таңдалған 115 технология еліміздің аймақтарында іске асырылып жатыр.
– Есіңізде болса, көрменің жабылу салтанатында Мемлекет басшысы Нұрсұлтан Назарбаев ЭКСПО-2017 көрмесі аяқталса да, оның нысандары халыққа қызмет ету керек деп, атап көрсеткен болатын. Бұл тапсырма қалай орындалып жатыр?
– Иә, дұрыс айтасыз, бұндай тапсырма болған. Тіпті, Мемлекет басшысы ЭКСПО-2017 көрмесінің нысандарын көрмеден кейін пайдалану туралы тұжырымдамасын бекітіп берген. Сол құжаттың негізінде көрме базасында «Астана» Халықаралық қаржы орталығы, Халықаралық «жасыл технологиялар мен инвестициялық жобалар» орталығы, «Astana Hub» халықаралық IT-стартаптар технопаркі, IT университет пен бизнес орталығы жұмыс істемек.
Осы нысандардың ішінде «Астана» Халықаралық қаржы орталығы Еуразиялық кеңістіктегі ең озық қаржы орталығы болуды көздейді. Орталықтың ел инвестициясына әкелер пайдасы да зор болмақ. Мемлекет басшысының тапсырмасына сәйкес, бұл орталық Қазақстан экономикасына инвестиция әкелетін негізгі драйвер болу керек.
Елбасы экономикадағы инвестициядан басқа, оның (экономиканың – авт.) цифрлануына да зор көңіл бөледі. Сондықтан, «Astana Hub» Халықаралық IT-стартаптар технопаркі мен IT университет те өте қызықты жоба деп есептеймін. Бұл екі жоба – ел экономикасының сандық форматқа ауысуын жылдамдататын қарқынды қадамдар. Міне, сондықтан да, ЭКСПО-2017 көрмесі артта қалса да, көрме кешені елімізде жаңа инновациялық әрі серпінді технологияларды жүзеге асыруға болатын жаңа экожүйе құрылып жатыр деп айтуға толық негіз бар.
– Өзіңіз айтып отырған жобалардың біразы басталып кетсе, біразы болашақтың еншісіндегі жобалар. Ал көрме аяқтала сала да жұмысын тоқтатпай келе жатқан қандай нысандарды ерекше атап көрсетер едіңіз?
– Бұл жерде әрине, ең алдымен «Нұр Әлем» сферасын айтуға болады. «Нұр Әлем» сферасы көрме аяқталса да жаһандық нысанға айналып, болашақ энергиясының жаңа символына айналды. Және де Қазақстан мен Астана туралы айтқанда, ойға оралатын ең озық нысандардың бірі болып қалды. Бұл жай ғана музей емес екенін түсінуіміз керек. «Нұр Әлем» – күніне мыңдаған адам келіп, жаңа ақпарат ала алатын үлкен ғылыми-танымдық орталық деуге болады.
«Нұр Әлем» сферасында үнемі ашық сабақтар өтіп, әртүрлі тақырыптарда лекциялар оқылып тұрады. Сондай-ақ, Kids & Students Future Energy атты арнайы білім беру жобасы бар. Бұл жобаға еліміздің өңір-өңірінен жыл басынан бері 20 мың оқушы мен студент қатысып үлгерген. Мұндай жобалар «Нұр Әлем» сферасында тұрақты түрде ұйымдастырылып отыратынын айтқым келеді.
«Нұр Әлем» сферасынан басқа, Конгресс-орталық та аса маңызға ие бірегей жоба. Бұл кешеннің ерекшелігі – қызметінің жан-жақтылығында. ЭКСПО-2017 халықаралық көрмесінің ашылу және жабылу салтанаты тура осы Конгресс-орталықта өткен болатын.
Бұл үлкен нысандардан басқа, көрме аумағында «Қазпошта»-ның сандық кеңсесі, Азаматтарға арналған үкіметтің халыққа қызмет көрсету орталығы ашылған. Осы кеңселерде халық диджитал форматында өз өздеріне қызмет көрсете алады.
– Яғни ЭКСПО көрмесінің аумағы халықтың демалып, сонымен қатар, пайдалы ақпараттар ала алатын орнына айналды деп нық сеніммен айтуға болады ғой?
– Біз көрме аумағына келген әрбір адамға ыңғайлы жағдай жасауға тырыстық. Астананың 20 жылдығын тойлау аясында біз әдейі жазғы сахна ашып қойдық. Ол сахнада қазақ эстрада жұлдыздарының қатысуымен үнемі концерттер өтіп тұрды. Кейбір концерттерге тіпті 8 мың адам жиналып жатты. Ал, балаларға арнап ол сахнада арнайы театрландырылған қойылымдар мен цирк шоулары өтіп тұрды. Бұл бастаманы келесі жылы да қолға аламыз деген жоспар бар.
Көрменің аумағында балалар ойнайтын бірегей алаң бар. Ол алаңның бір ерекшелігі – ол жерде мүмкіндігі шектеулі балалардың келіп ойнауына да жағдай жасалған. Сондай-ақ, 6 гектар аумақты алып жатқан жаңа саябақ аумағы бар.
Сөзімді қорыта айтсам, ЭКСПО-2017 көрмесінің арқасында біз енді кез келген деңгейдегі, кез келген форматтағы ірі халықаралық көрмелер мен өзге де шараларды абыроймен өткізе аламыз. Ол үшін тиісті инфрақұрылымның бәрі бар. Ал біздің, яғни, «Астана ЭКСПО-2017» ұлттық компаниясының ендігі мақсат-міндеті – осы жобаларды сәтті жүзеге асыруға барынша ат салысу және көрме аумағындағы инфрақұрылымды тиімді пайдаға жарату.
– Әңгімеңізге рахмет.
Әңгімелескен
Самат МҰСА,
«Егемен Қазақстан»