Бүгінде «Бейбіт жиналыстар ұйымдастыру және өткізу тәртібі туралы» либералды және прогрессивті заң жобасы Сенаттың қарауына ұсынылды.
Ең алдымен, бұл заң жобасы адам құқықтары саласындағы халықаралық пактілерге, атап айтқанда БҰҰ-ның Азаматтық және саяси құқықтар туралы халықаралық пактінің 21-бабына сәйкес келеді. Онда ерік білдіру құқығы қамтамасыз етіліп, «Бейбiт түрдегi жиналыстарды өткізу құқығы танылады. Бұл құқықты пайдалану тек демократиялық қоғамның мемлекеттік немесе қоғамдық қауiпсіздiк пен қоғамдық тәртiп мүдделерiн, жұрттың денсаулығы мен имандылығын сақтау және басқа адамдардың құқықтары мен бостандықтарын қорғау қажет етiлетiн, заңмен көзделген шектеулерден тыс шектелуi тиiс емес» деп жазылған. Сондай-ақ митинг туралы заңда халықаралық пактінің осы нормасын қайталайтын ҚР Конституциясының 32, 39-баптары басшылыққа алынған. Жалпы алғанда, заң жобасы Адам құқықтары мен негізгі бостандықтарын қорғау туралы Еуропалық конвенцияның қағидаттарымен үйлеседі.
Заң жобасында мазмұндалған бейбіт жиналыстар өткізу презумпциясы – ЕҚЫҰ-ның «Бейбіт жиналыстар бостандығы жөніндегі басшылық қағидаттарында» көрсетілген басты қағидаттардың бірі. Бұған қоса «бәрі рұқсат етілген, тыйым салынбаған» деген басқа қағидат та көрініс тапты. Заң жобасы – посткеңестік кеңістіктегі либералды құжаттардың бірі.
Көбі митингтерді тек саяси бағытпен байланыстырып жатады. Олай емес. Бұл – азаматтардың конституциялық құқығын қорғаудың кез келген түріне қатысты мәселе. Мәселен, экономикалық, әлеуметтік, мәдени, білім бағытында болуы мүмкін. Оның бәрін түгендеп шыға алмайсың.
Заң жобасы бойынша арнайы орындар қалалардың орталық тұсында болуы, ұйымдастыру ыңғайлылығы, инфрақұрылым объектілерін пайдалану мүмкіндігі, санитарлық нормалар мен ережелердің сақталуы, жиналыстарды ұйымдастырушылар мен қатысушылардың қауіпсіздігі қамтамасыз етілуі тиіс.
Сонымен қатар заң жобасында арнайы орындардың болуы және жұмыспен қамтылуы туралы ақпараттың ашықтығы мен объективтілігін көздейтін түзетулер енгізілді. Осыған сәйкес әкімдік өзінің интернет-ресурсында осындай орындардың тізбесін және олардың жұмыспен қамтылуы туралы ақпаратты жариялауға міндетті болады.
Заңмен тыйым салынбаған кез келген жерлерде пикеттер өткізу мүмкіндігін бекіту ұсынылды. Ал тыйым салынған орындарға тек стратегиялық маңызы бар объектілер мен қауіпсіздік техникасы ережелерін сақтауды талап ететін объектілер жатады. Мысалы, бұл теміржол, су, әуе және автомобиль көлігі объектілері, магистралдық құбырлар, байланыс желілері сияқты орындар.
Аталған құжаттан журналистердің қызметін реттейтін барлық нормалар алынып тасталды. Сондай-ақ азаматтардың өмірі мен денсаулығына қауіп туғызу, қоғамдық тәртіп пен қауіпсіздікті бұзу, мүлікке зиян келтіру, соның ішінде арнайы орынға шамадан тыс көп жиналу бейбіт жиналыстарды тоқтату негіздері ретінде нақты белгіленген.
Осылайша бәрі түсінікті және демократиялы өтті деуге болады. Көп жұмыс атқарылды. Заң жобасы көптеген кедергіге қарамастан едәуір жетілді. Заң жобасын әзірлеу барысында оның қоғамдық талқысына жұртшылық кеңінен белсенді қатысты. Азаматтық қоғамның заң жобасы жұмысына атсалысуы либералды және прогрессивті құжат дайындауға мүмкіндік берді. Бұл маңызды құжаттың жұмысынан Ұлттық қоғамдық сенім кеңесінің мүшелері де қалыс қалған жоқ. Халықаралық сарапшылар мен халықаралық ұйымдардың өкілдері заң жобасы барлық алаңдарда толық, жан-жақты талқыланғанын көрсетті.
Бейбіт жиналыстар туралы заң қабылдауды Ұлттық қоғамдық сенім кеңесінің отырысында Президент Қасым-Жомарт Тоқаевтың өзі ұсынды. Мемлекет басшысы бастама көтермесе, жаңа демократиялық реттеу болмас еді. Жақын арада жаңа заң қабылданып, көптеген мәселенің түйіні тарқатылады. Барлығы қауіпсіз әрі қолайлы болады. Көпшілік үшін митингтер әдеттегі үйреншікті жағдайға айналады. Оны уақыт көрсетеді.
Коронавирус індетінің әлегінен қашан құтыларымыз белгісіз. Егер қазір бұл заңды қабылдамаса, онда биыл күзге немесе келесі жылға қалып кетуі мүмкін. Онда жұрттың қынжылысын тудырған 1995 жылғы заңның нормалары күшінде қалар еді. Полиция немесе басқа мемлекеттік органдар болсын ескі заңның нормаларына бағдарлануға мәжбүр болады. Күз – саяси қарбалас, парламенттік сайлауға дайындық кезеңі. Оған дейін жаңа заңның қабылдануы оң ықпалын тигізеді. Сондықтан осындай ілгері жылжудың болғаны жақсы.
Марат Башимов,
Еуропалық құқық және адам құқықтары институтының директоры