Жетісудың табиғи ерекшелігі мен өңірдің логистикалық мүмкіндігі инвесторлардың назарын үнемі аударып келеді. Бүгінде облыста 592 жоба осы жеке компаниялардың қаржысына жүзеге асуда. Яғни 2021-2030 жылдарға арналған инвестиция қоржынына жалпы құны 5,5 млрд теңге болатын қаржы салынады.
Нәтижесінде 45 мың жұмыс орны жаңадан ашылуы тиіс. Соның ішінде 66 жоба биыл толық аяқталып, еңбек нарығына 3500 адамға сұраныс артпақ. Бұған 112,8 млрд теңге жұмсалуда. Енді облыстың инвестициялық қоржынына Дүниежүзілік банктің қаржысы құйылатын күн жақын. Бұл жайында алпауыт қаржы ұйымының Қазақстандағы тұрақты өкілі Жан-Франсуа Мартонның Жетісуға жасаған ресми сапары барысында айтылды.
– Бүгінде ел көлемінде трансұлттық компаниялардың қатысуымен 16 жоба іске асып жатыр. Ал оның ішіндегі 9 жоба біздің Алматы облысында. Өңір агроөнеркәсіптік салада, қант қызылшасы, соя, жүгері өсіруде көшбасшы орында тұр. Ауыл шаруашылығы өнімдерін өңдеуде іргелі жобалар бар. Баламалы энергетикада да жемісті жұмыстар жасалып жатыр. Біз сіздермен осы салаларда, сол сияқты туризм, тұрғын үй-коммуналдық шаруашылық, соның ішінде газдандыру, көшені жарықтандыру, кәріз жүйелерін жаңғырту, сонымен бірге ирригациялық жүйелерді қалпына келтіру бағыттарында ынтымақтастық орнатуға бейілдіміз. Жақын аралықта Талдықорғанда ЖЭО салу жоспарда бар. Бұл да – маңызды әрі қажетті жоба. Алда Дүниежүзілік банк мамандарымен нақты бағытымызды бірлесіп анықтап, жемісті еңбек етуге тәжірибеміз жетеді деп ойлаймын, – дейді облыс әкімі Амандық Баталов.
Жалпы, Дүниежүзілік банктің қолдауымен облыста бұған дейін де бірқатар жоба жүзеге асқан екен. Оның ішінде «Алматы-Қорғас» жолының инфрақұрылымдық жобасы, 2 мектеп пен балабақшаны қамтитын энергия тиімділігін арттыру жобасы, сол сияқты жастарды қоғамдық өмірге тартуға, олардың өмірлік машықтарын дамытуға бағытталған жастар корпусының жобасы бар. Ал банк өкілдері енді ынтымақтастықты одан әрі дамыту мақсатында білім беру, цифрландыру, жол инфрақұрылымы, ирригация, әлеуметтік салаларда, әсіресе, мемлекеттік-жекеменшік әріптестік аясындағы жобаларды қаржыландыруға дайын көрінеді.
– Біз Алматы облысының аумағында бірлесе жұмыс істеуге қызығушылық білдіріп отырмыз. Бұған дейін біз ел Үкіметі арқылы ғана іскерлік байланыс орнаттық. Енді облыс басшылықтарымен тікелей жұмыс істеу үшін бірқатар құжаттарға өзгерістер енгізіп жатырмыз, – дейді өз кезегінде қаржы ұйымының Қазақстандағы тұрақты өкілі Жан-Франсуа Мартон Жан-Франсуа Мартон.
Сондай-ақ әлемге әйгілі қаржы ұйымы өкілдерінің кездесуіне қатысқан Халықаралық қаржы корпорациясының Қазақстандағы кеңсесінің басшысы Екатерина Бенджамин де Алматы облысымен арадағы әріптестік байланыстарын жандандыруға ықыласты екенін айтты.
– Біз облыстың әлеуметтік-экономикалық дамуына оң ықпал ететін ұзақ мерзімдік жобаларды, соның ішінде қалдықтарды жою және ирригация бағыттарындағы жобаларды бірге атқаруға дайынбыз, – деп атап өтті Халықаралық қаржы корпорациясының Қазақстандағы кеңсесінің басшысы Екатерина Бенджамин.
Айтпақшы, биыл Мемлекет басшысы Қасым-Жомарт Тоқаев «Қазақстан Республикасы мен Халықаралық қаржы корпорациясы арасындағы Қазақстан Республикасында офистер құру және олардың қызметі туралы келісімді ратификациялау туралы» Қазақстан Республикасының заңына қол қойған болатын. Екіжақты іскерлік байланыстың жемісі енді Жетісу жерінде нәтиже бермек.