Конституцияның 33 бабына өзгерістер енгізу көзделіп отыр. Мұны еліміздегі бірнеше іргелі бағытты қамтитын бүкіл саяси жүйені жаңарту үрдісі деп айтуға болады.
Бұл – демократияландырудың жолы, суперпрезиденттіктен күшті Парламенті бар президенттік басқару нысанына көшу, сайлау жүйесін жетілдіру, аралас пропорционалды-мажоритарлық модельге көшу, мәслихаттардың өкілеттіктерін күшейту арқылы жергілікті өзін-өзі басқаруды нығайту. Бұл – мемлекеттік басқарудағы жаңа кезең.
Саяси реформалар суперпрезиденттік кездегі олқылықтарды жоюға бағытталған. Президенттің жақын туыстарына саяси мемлекеттік қызметтер мен квазимемлекеттік құрылымдарды басқаруға тыйым салу алдағы уақытта Президент айтқан непотизмді жою және қандай да бір олигархаттың пайда болуының алдын алу мақсатында жүргізіліп отыр. Бұған дейін Президент бизнесмендермен кездесу кезінде еліміздегі бар байлықтың қомақты үлесі 162 адамның ғана еншісінде екенін айтып өткен болатын. Бұл еліміздегі қаржы ресурстарының, байлықтың тепе-тең үлестірілмегенін көрсетеді. Мұның барлығы суперпрезиденттік кезде болған олқылықтарды жою мақсатында жүргізіліп отыр.
Мәжіліс ендігі күні заңды қабылдаушы орган болады, бұған дейін бұл Сенаттың құзыретінде болған. Нәтижесінде, Мәжілістің құзыреті күшейейін деп тұр. Одан кейін мәслихаттардың рөлін күшейту, саяси партияларды тіркеуді күшейтуге байланысты нормаларға өзгерістер енетін болады. Жалпы, президенттік өкілеттікті шектеу, біріншіден, ол өкілеттікті Парламентке көбірек беру, яғни Парламентті және жергілікті өзін-өзі басқаруды нығайту мақсатында жасалып отыр.
Шын мәнінде, Конституция кез келген азаматтың құқығының сақталуын білдіреді. Сондай-ақ Адам құқықтары жөніндегі уәкілдің лауазымы конституциялық деңгейде бекітілетінін атап өткен жөн. Бұл – уәкілетті органның құқықтары нақты белгіленген жаңа норма. Ол есеп бермейді, керісінше барлық мемлекеттік органдар мен лауазымды тұлғалардан тәуелсіз болады.
Конституциядағы өзгерістерді зор оптимизммен қабылдаймын және олардан Қазақстан қоғамы үшін айтарлықтай оң нәтиже күтемін.
Қазбек МАЙГЕЛДИНОВ,
Қазақстандық қоғамдық даму институтының басқарма төрағасы