“Интергранитстрой” жауапкершілігі шектеулі серіктестігі облыстың өндірістік картасында 2004 жылы пайда болған еді. Өркенді істерге қадам бастаған ұжым араға көп уақыт салмай заманалық талаптарға сай жаңа тас қашау зауытын пайдалануға қосты. Қазір мұнда гранит, габбро, мәрмәр тастардан жасалған 40 түрлі өнім шығарылуда. Жұмыс италиялық жоғары дәлдіктегі станоктармен атқарылады. Кәсіпорынның облыс аумағындағы бес карьері шикізат қорын үнемі толықтырып отырады. Құрылыс жұмыстарының барлық түрінен тиісті сертификатқа ие зауыттың әріптестері қатарында Қазақстанның, Ресейдің, Еуропаның ірі құрылыс ұйымдары бар. “Интергранитстрой” құрамындағы 48 адам сапа көрсеткіштерін жоғары деңгейде ұстауды мұрат санайды. Оны тұтынушылар тарапынан бірде-бір ескертпенің тіркелмегендігімен де дәлелдеуге болады.
Көкшетаулық кәсіпорынның халықаралық беделі шетелдік әріптестердің де назарын аударып отыр. Жуырда зауыт басшысы Спиридон Джейранов Ұлыбританияның Оксфорд қаласындағы, әлемнің 30 елінің өкілдерін біріктіретін, Еуропа бизнес-ассамблеясының (ЕВА) ХLVІІ салтанатты мәжілісіне қатысып қайтты. Осынау айтулы шараның куәгері болудың өзі үлкен жетістік десек, жерлесіміздің “Оксфорд лидерлерінің саммиті” бағдарламасы шеңберінде, алты номинанттың ішінде “Жылдың үздік топ-менеджері” атанып, ол басқаратын зауыт “Жылдың үздік кәсіпорны” жүлдесін жеңіп алуы өңір өміріндегі елеулі оқиға саналады.
Ежелгі аристократтық дәстүрлер өзегіндегі салтанатта Еуропа бизнес-ассамблеясының бас директоры лорд Джон А. Неттин, Оксфорд мэриясының канцлері лорд Брайн Кин құттықтау сөз сөйлеп, көкшелік кәсіпкерге құрметті айырым белгілерін тапсырды.
Бақберген АМАЛБЕК.
Ақмола облысы.