17 қарашада Премьер-Министр Кәрім Мәсімов Астана қаласының маңындағы аймақтарды дамыту мәселелері бойынша кеңес өткізді, деп хабарлады Премьер-Министрдің баспасөз қызметі.
Кеңес барысында Президент тапсырмасы бойынша әзірленген, 2011-2013 жылдардағы Астана қаласының маңындағы елді мекендердің әлеуметтік-экономикалық дамуының кешенді жоспарының жобасы қаралып, бекітілді. Кешенді жоспар ең өзекті әлеуметтік және инфрақұрылымдық проблемаларды шешуге, Ақмола облысының Аршалы, Целиноград және Шортанды аудандарындағы бірқатар ауылдық елді мекендердегі тұрғындардың өмір сүру деңгейі мен сапасын арттыруға, сондай-ақ астананың шоғырландырылған өңірін қалыптастыру үшін жағдай жасауға бағытталған.
Кеңес жұмысына орталық мемлекеттік органдардың басшылары, Ақмола облысының әкімі Сергей Дьяченко және Сенат депутаты Светлана Жалмағамбетова қатысты.