Адриан СЕВЕРИН: Демократия егетін дәрі емес...
Жақында бір топ Еуропа Парламенті мен Еуропа форумы өкілдері Қазақстанға арнаулы миссиямен келіп-кетті. Арнаулы делегация еліміздің саяси, экономикалық және әлеуметтік дамуларына қатысты мәліметтер мен деректер жинақтау үшін атбасын бұрған екен.
“Қазақстанды даттауға да, мақтауға да келген жоқпыз. Біздің мақсатымыз – Қазақстанның ЕҚЫҰ-ға төрағалығы аясында атқарылып жатқан нақты тірліктерді көзбен көріп, барлық ақпараттарды бастапқы дерек көздерінен алу”, дейді Еуропарламент өкілдері. Әзірге ресми сапар барысына қатысты қорытынды жасауға асықпай отырған делегация жетекшісі, Еуропарламенттегі социалистер мен демократтардың прогресшіл Альянс тобының өкілі Адриан СЕВЕРИН Қазақстаннан мультимәдени қоғамды құру тәжірибесін алуға болатындығын атап көрсетті.
– Еуроодаққа Орталық Азия өңіріне қатысты саясатын қайта қарау мен өзгертетін кез келді. Бұл аймақта еуропалықтарды тек сауда мен экономика ғана қызықтырады дейтін қасаң қағидаларға қарамастан, Орталық Азия мен Еуропаның өзара қарым-қатынасында саяси ынтымақтастық мәселесі маңызды орында тұр. Бұл контекстегі шешуші рөлді мемлекеттің демократиялық дамуы атқарады. Ал қандай да бір елге демократия сырттан импортталмайды.
– Северин мырза, бірнеше күнге созылған миссиялық сапар, жоғары деңгейдегі кездесулер қандай қорытындыға жетелейді? Дамудың қазақстандық үлгісі мен қазақстандық демократия үрдісі делегацияға нендей ой салды?
– Демократия егетін дәрі емес... Қазақстандағы демократияның “ұрығы” еуропалық емес, Қазақстанның өзінікі болуы тиіс. Біздер өз тарапымыздан тек кеңес түрінде суаруға” “су” ұсынып, талқылаулардың көмегімен тәжірибе алмасып, адам құқығын қорғаудағы демократиялық тетіктерді жақындастыра аламыз. Біз еуропалық демократия моделі кіршіксіз және оны кезек күттірместен Қазақстанға немесе басқа елге енгізу қажет деп айта алмаймыз.
– Алайда, ТМД елдері ұзақ жылдар бойы темір шымылдықтың бер жағында оқшау өмір сүрді ғой. Осының салқыны да сезілмей ме?
– Қазақстандағы демократизациялау үдерісін жүргізу кешегі Кеңес Одағының басқа республикалары сияқты “посткеңестік синдромнан” ада емес және бұл айтарлықтай кедергілер де туғызып келеді. Дегенмен, осыған қарамай, бір мезетте мемлекетті де және ұлтты да құру керек. Элита мен қоғам арасындағы кедергіні жойып, екеуінің ортасындағы айырмашылықты жалғап және өзара әрекетін күшейту – оңай атқарыла салатын міндет емес. Және оған төзімділік пен келісім қағидаларына негізделген көпұлтты қоғамды жасақтау қосылады. Мұның бәрі дәл қазіргі таңда Еуропаның да алдында тұрған ең көкейкесті мәселе. Осы тұрғыдан алғанда Батыс делегаттарына Қазақстанның тәжірибесі аса өзекті.
– “Қазақстаннан табуға болатын қызықты идеялар” дегенде нені меңзеп отырғаныңызды нақтырақ білуге бола ма?
– Өкінішке қарай, біздерді мәдениеттеріміз ерекшелейді. Өйткені, олардың әрқайсысы өзіндік этностық бірліктерге құрылған. Әрине, түрлі мәдени топтардың күн тәртібі қатар жүріп жатса да, кей-кейде олар қақтығыстарға барып тұрады. Сондықтан да бүгінгі таңда ұлттық тамырға тәуелді болмай, баршамызға бейбітшілік пен үйлесімділікте өмір сүру төтенше маңызды болып тұр. Қазақстаннан табылған “бірнеше қызықты идея” осы мәселеге барып саяды.
Біздің делегация Қазақстан халқы Ассамблеясының, “Нұр Отан” халықтық-демократиялық партиясының жетекшілерімен кездесті. Астанада болған кездесулерде әрбір сағатымыз маңызды үнқатысуларға толы болды. Парламент Сенатының Төрағасы Қасым-Жомарт Тоқаев мырзамен, Еңбек және халықты әлеуметтік қорғау министрі Гүлшара Әбдіқалықова ханыммен және басқа да лауазым иелерімен жүздестік. Сыртқы істер министрлігі, Мұнай және газ вице-министрлерімен, оппозициялық партия өкілдерімен, үкіметтік емес ұйымдармен, журналистермен кездесулер өткіздік.
– Қазақстанға арнайы атбасын тіреген Еуропарламент өкілдерін кімдер құрайды?
– Бұлар – депутаттар, социалистер мен демократтардың прогресшіл Альянсының жетекшілері. Еуропа форумының, ұлттық парламенттер мен партиялардың, олардың ішінде Румыния, Болгария, Нидерланды, Ұлыбритания, Словакия, Грекия, Германия және Шведия өкілдері бар.
– Этномәдени топтардың демократиялық қарым-қатынасы тек алдыңғы кезекке адам және азаматтық қоғам қойылған демократиялық ортада ғана өмір сүре алады дейсіз. Осы Қазақстанда бар ма?
– Қазақстанның ұтып отырған жері осы. Тең құқықтылық қағидатына құрылған мұндай қоғам оның мүшелерінің ұлттық алуандылығынан да жеміс жинай алады. Біз ең болмағанда Еуропада бір мезетте мультимәдени және азаматтық қоғам туралы сөз қозғаймыз. Өйткені, біздің ойымызша, тек азаматтық желілер ғана түрлі мәдениеттерді жалғай алады. Азаматтық және мультимәдени өлшемдерді іздеу жолындағы үйлесімділікті табу үшін еуропалық тарап қазақстандық әріптестермен бірлесіп жұмыс істеуге ниетті. Біздер әрқайсымыз өмірден алынған өз тәжірибемізді бір-бірімізге ұсына аламыз. Және жетілдіруге болатын тұстарды жетілдіре түсеміз.
– Северин мырза, Еуропарламент өкілдері осы үнқатысуды жүргізудегі маңызды тұсқа тап келіп отыр-ау?
– Мұндай үнқатысуды жүргізуде Қазақстанның ЕҚЫҰ-ға төрағалығы таптырмайтын кезең. Алайда, осы міндетті атқарып отырған Астана өзінің ең басты нәтижелерін әлі толық қорытындылаған жоқ. Бірақ, бұл тәжірибе елдің ішкі дамуында болсын және оның әлемдегі ұстанымында болсын міндетті түрде оңды айшықталатын болады.
– Қазіргі Еуропа Қазақстанды саяси картадан қалай салмақтайды?
– Қазақстан нақты тұрғыда біз үшін маңызды. Ол аймақта ғана емес, бүкіл әлем үшін мәнді рөлге ие. Қазақстан Еуропаға, жалпы Батысқа мұнай шикізатының болғандығы үшін ғана емес, сезімтал геостратегиялық ұстанымы үшін де маңызға ие ел болып табылады. Өкінішке қарай, Орталық Азия Еуропа үшін есірткі трафигі мен лаңкестіктің транзиттік нүктесі болып қала береді. Осыған байланысты Еуроодаққа, әсіресе, саяси тұрғыдағы тұрақтылығымен ерекшеленетін аймақтық одақтас керек.
– Кәрі құрлықтың осы тұрақтылықты тұрлаулы етудегі тәжірибесі қандай?
– Тұрақтылықтың кепілі – құқықтық сауаттылық пен өз еліңнің дамуына мүдделі саяси белсенді азаматтық қоғам. Егер елдің азаматтары өздерін экономикалық жобалардан, саяси мүдделерден көретін болса, онда ол мемлекетке тұрақтылық тән. Қазақстанның Еуропамен қарым-қатынасы осы негізде дами беретініне күмән жоқ. Бұған ЕҚЫҰ-ның алдағы Астана Саммиті де белгілі бір деңгейде септесетініне сенемін. Бұл оқиға Еуропа елдері үшін төтенше маңызды. Өйткені, Еуроодақтың барлық елдері ЕҚЫҰ құрамына кіреді. Меніңше, саммит біздердің саяси мүдделерімізді жүзеге асыру тұрғысынан табысты болады. Қазақстанның төрағалығы барысындағы бұл жоғарғы деңгейдегі кездесу де баршамыз үшін ынтымақтастық пен қауіпсіздікті қамтамасыз етудің әрі қарайғы жолын анықтаудың төтенше мүмкіндігіне айналады.
Айнаш ЕСАЛИ, Алматы.
Суретті түсірген Сергей ХОДАНОВ.
Бұл ата-баба арманы еді
Мұхамбет КӨПЕЕВ, Парламент Сенаты Төрағасының орынбасары.
Міне, тәуелсіздігіміздің он тоғызыншы жылы да өз мәресіне жетуге таяу қалды. Толағай табыстар мен іргелі істерге толы, қиындығы мен ауыртпалығы қатар жүретін әр жылымыз, қорытындылап айтқанда, тарих жылнамасына таңбадай басылып тіркелуде. Әрбір қазақстандық азаматтың ой-өрісі кеңейіп, ізгілікті іс-қимылы заман талабына сай ілгерілей отырып, өркениетке бағытталған тынымсыз тіршілік жылдары ретінде өтіп жатқанына куә болып отырмыз.
2010 жыл қандай сәттермен ерекшеленді?
Бірінші, – егемен еліміз аман, жұртымыз тыныш. Бұл – біздің басты байлығымыз.
Екінші, – осыдан 10 ай бұрын жарияланған “Жаңа онжылдық – жаңа экономикалық өрлеу – Қазақстанның жаңа мүмкіндіктері” атты Қазақстан Республикасының Президенті Нұрсұлтан Назарбаевтың Қазақстан халқына Жолдауындағы көрсетілген бағыттар, ауқымды стратегиялық даму мақсаттары, кең-байтақ қазақ даласындағы әрбір елді мекеннің өзекті мәселелерін шешуге арналған бағдарламалар кезегімен жүзеге асуда.
Үшінші, – Қазақстанның көпвекторлы сыртқы саясатының, ішкі тұрақтылық пен келісімнің, әлемдік дамудың көкейкесті мәселелерін дер кезінде алға тарту шараларының нәтижесінде 2,7 миллион шаршы шақырым жерінің 4 пайызы ғана Европа құрлығында орналасқанына, мемлекетіміздің жастығына қарамастан, әлемдегі Еуроатлантика және Еуразия аумағындағы мемлекеттердің басын қосқан беделді халықаралық ұйым – Еуропадағы қауіпсіздік және ынтымақтастық ұйымына төрағалық етуі біздің егемен елімізді кәрі құрлықтың – Еуропаның төрінен орын алу мәртебесіне ие етті.
Мұны қазақстандықтар үлкен сенім, құрмет және зор жауапкершілік деп қабылдады. Осы тұрғыда мейлінше адал, ашық, тынымсыз жұмыстар жүргізілді. Әлемдік қоғамдастық Қазақстанның ЕҚЫҰ-ға төрағалық қызметіне өте жоғары баға беріп отыр.
Елбасы Нұрсұлтан Назарбаев Қазақстанның ЕҚЫҰ-ға төрағалық формуласын мазмұны мен маңызы жөнінен өлшем мөлшеріне сыймайтын латынның төрт “Т” әрпімен басталатын сөздермен анықтады. Ол: траст, традишн, транспаренси, толеранс – қазақшасы: сенім, дәстүр, ашықтық, төзімділік.
Осы бір төрт аталы сөздер қазақтың кеңпейілділігін, қонақжайлылығын, бауырмалдығын көрсетіп тұрған жоқ па? Көптен бері түйінделген, ұзаққа созылған шиеленістерге ерекше көңіл бөлу, екіжақты кездесулерге көпір болу, көршілес елдердің ортақ мәмілеге келуіне ықпал ету және тағы басқа да шаралар Қазақстанның абыройын асқақтатып, ұлтымыздың ұлылығын әлемге паш етті. Бұған әлемге әйгілі саясаткерлер мен Германия, Түркия, Франция және басқа да елдердің бұрынғы және қазіргі басшыларының Қазақстанның төрағалық етуіне өте жоғары баға беруі дәлел бола алады.
Бұл – Елбасымыз Н.Ә.Назарбаевтың халықаралық аренадағы беделі, бейбітшілік пен қауіпсіздікті нығайтуға, тұрақтылық пен келісімді қамтамасыз етуге бағытталған тапжылмас табандылық пен тағатсыз күн-түндерінің толағай табысы.
Үстіміздегі жылдың сәуір айында АҚШ-та өткен ядролық қауіпсіздік мәселелеріне арналған Мемлекет басшыларының саммитінде Қазақстан Президентінің баяндамасынан кейін “Қазақстандық жол”, “Қазақстандық үлгі”, “Қазақстандық таңдау” сияқты сөз тіркестері сол саммиттің лейтмотиві болғаны ешқашан ұмытылмайды.
Жиырма жыл бұрын географиялық картадан Қазақстанды іздеп әуреге түсетін шетелдіктер бүгінде оны үлгі тұтып, төрінен орын беріп жатса, ол бізге аспаннан салбырап түсе қалған бақ пен құрмет емес. Мұны тәуелсіздік алғаннан бергі жердегі Елбасы Нұрсұлтан Әбішұлының жүргізіп отырған салиқалы, сарабдал саясаты мен мәуелі мақсаттарының жемісі деп ұққанымыз абзал. Мұны қадірлей білу әрбір көкірегі ояу, көзі ашық азаматтың борышы деп білемін.
Таяуда мен Мексикада халықаралық конференцияға қатысып, еліміздегі ұлтаралық татулық туралы сөз сөйледім. Соңынан көптеген конференцияға қатысушылар Қазақстандағы жағдайға қызығушылық танытып, “О, Қазақстан!” “О, Назарбаев!” деп мені құттықтап, қолымды қысып жатты. Бұдан артық Қазақстанды, Елбасының ерен еңбегін мойындаудың қандай үлгісі бар?!
Таяу күндері, 1-2 желтоқсанда Астанада өтетін ЕҚЫҰ Саммитіне 55 мүше мемлекет пен 12 серіктес елдердің мемлекет және үкімет басшылары, 69 халықаралық ұйым жетекшілері, 500-ге жуық үкіметтік емес ұйым өкілдері мен 1000-нан астам журналист қатыспақшы. Бұл халықаралық Ұйым өміріндегі соңғы 11 жылдағы елеулі оқиға болғалы отыр.
Бұл – Елбасымыз Нұрсұлтан Әбішұлы Назарбаевтың жеңісі, бұл – егемен еліміздің, қаһарман халқымыздың жеңісі.
Бұл – ел болуға ұмтылған, бұрынғы өткен ата-бабаларымыздың асыл арманы.
Бұл – 50 жылда бір айналып келетін маңызды шара.
Осынау айтулы оқиға біздің заманымызда, біздің сүйікті Отанымызда өтуі халқымыз үшін қазынаның қайнар көзі, әрі теңдесі жоқ қуаныш, әрі мәртебе екені даусыз. Сондықтан, осы шараны абыроймен атқару, оның өз деңгейінде өтуіне атсалысу – бәріміздің міндетіміз. Тіпті, үйіңе қонақ келерде де аулаңды, үйіңнің ішін тазалап, бар дәмді тағамыңды даярлап, қонағыңның риза болғанын қалайсың ғой.
Астана қаласының басшылары көптеген абаттандыру жұмыстарын орындауда. Осы сәтте елордалықтар үшін де үлкен ұйымшылдықпен қаланың тазалығын сақтап, көшелер мен аулалардың ажарын енгізіп, ұлтымызға тән қонақжайлық пен сабырлылық үлгісін көрсетіп, бірлігі мен ынтымағы жарасқан, мыңжылдық мәдениеті, ата салт дәстүрі сақталған еңселі ел екенімізді паш ететін сын сағаты келді.
Олай болса, іске сәт, ағайын!
Барыс – белестерді бағындыру белгісі
Халқымыз қашанда барыс жылы – табыс жылы болатынына сеніммен қараған. Әріге бармай-ақ, 1986 жылды алайық. 16-18 желтоқсан күндері тоталитарлық жүйеге қарсы тұрып, азаттықты, теңдікті аңсаған қазақ жастары Алматыда көтеріліске шықты. Бұл оқиға кеңестік жүйеге қарсы шерулердің бастауы болды. Желтоқсан оқиғасы тарихта қалды. 1991 жылы ішкі бей-берекетсіздікке ұшыраған Кеңес Одағы тарап тынды. Желтоқсан оқиғасынан кейін тура бес жылдан соң, 16 желтоқсан күні Қазақстан өз тәуелсіздігін жариялады.
Тұрарбек АСАНОВ, Парламент Мәжілісінің Халықаралық істер, қорғаныс және қауіпсіздік комитетінің мүшесі, саяси ғылымдар кандидаты.
1998 жыл – барыс жылы. Барыс жылын табыспен бастау үшін орасан зор қадамдар жасалды. 1997 жылы Қазақстан Президенті Нұрсұлтан Назарбаевтың “Қазақстан – 2030” атты әйгілі стратегиялық бағдарламасы жария етілді. Бұл Елбасының халыққа арнаған тұңғыш Жолдауы болды. Онда барлық Қазақстан халқының өсіп-өркендеуі, қауіпсіздігі және әл-ауқатының артуы көрініс тапқан. Елдің 2030 жылға дейінгі алар асуы, жетер жетістігі сипатталды. Сол кездің көзімен қараған адамға ол армандай болып көрінді. Мемлекет басшысы: “2030 жылы біздің ұрпақтарымыз бұдан былай әлемдік оқиғалардың қалтарысында қалып қоймайтын елде өмір сүретін болады. Олардың Қазақстаны Еуразияның орталығы бола отырып, жедел өркендеп келе жатқан үш аймақтың – Қытайдың, Ресейдің және Мұсылман әлемінің арасындағы экономика мен мәдениетті байланыстырушы буын рөлін атқаратын болады”, – деді. Шынымен де, Қазақстан қазірдің өзінде әлемнің көптеген елдері үшін Еуразия кіндігіндегі саяси тұрақтылығы берік, сенімді стратегиялық әріптестікке лайықты мемлекетке айналып отыр. 1997 жылы-ақ Елбасы 2030 жылы Қазақстан күрделі жолдан ойдағыдай өткен және дамудың келесі кезеңіне нық қадаммен аяқ басқан айшықты ел болатынын айтты.
Асқаралы белестерді бағындыру үшін жасалған қадамдардың бірі – Қазақстан елордасының республика орталығына қоныс аударуы. 1997 жылы 10 желтоқсан күні ел астанасы Алматыдан Ақмолаға көшіп келді. 1998 жылы 6 мамырда Елбасының Жарлығымен Ақмола қаласы Астана деген әлемдік атауға ие болды.
Сөйтіп, 1998 барыс жылы табыспен басталған болатын. Сол кезден бастап елдің экономикасы да, әлеуметтік-мәдени жағдайы да өркендеу жолына қадам басты. Астанадан бастап барлық қалаларымыз бен аудандарымыз жаңарып, көркейе түсті. Халықтың ертеңгі күнге деген сенімі нығайды. Жаңа ХХІ ғасырды жарқын көңілмен, асқақ сезіммен қарсы алды. Ел ішіндегі бірлік, татулық, ұлтаралық және дінаралық келісім бірлесе отырып жеңіске жетуге болатынын айғақтады.
Енді, міне, 2010 – барыс жылы да Қазақстан үшін әлемдік қоғамдастықтағы беделінің артуымен табысқа кенелтіп отыр.
Бүгінгі таңда Қазақстан Республикасы Еуропадағы қауіпсіздік және ынтымақтастық ұйымына төрағалық етуде. ЕҚЫҰ-ға мүше мемлекеттердің бірауыздан қолдауымен халықаралық беделді Ұйымға жетекшілік жасау миссиясы елімізге үлкен сеніммен тапсырылды. Бұл міндетті атқарудағы Қазақстанның рөлі, Мемлекет басшысының жүргізіп отырған саясаты, атқарылған ауқымды істер туралы қазір әлем елдерінің саясаткерлері де, танымал сарапшылары да айтып отыр. Біз мұны күн сайын телеарналардан көріп отырмыз, газет-журналдардан оқып, радиодан естіп жүрміз. Үлкен форумдарда, халықаралық кездесулерде Қазақстан тарабына, елдің басшысы Нұрсұлтан Назарбаевтың атына айтылған пайымды пікірлер халқымыздың абыройын асқақтата түсетіні сөзсіз.
Өз сөзінде ел Президенті Нұрсұлтан Назарбаев: “ЕҚЫҰ-ға төраға болып сайлану – Қазақстанға деген еуропалық және әлемдік қоғамдастық тарапынан зор сенімге ие болып отырғанымыздың арқасы”, – деп атап өткен болатын.
ЕҚЫҰ-ға төрағалық ету міндеті – ТМД елдерінен және Азия мемлекеттері арасынан алғаш рет бізге сеніп тапсырылды.
Үстіміздегі жылы қаңтардың 14-і күні Қазақстанның ЕҚЫҰ-ға төрағалық ету қызметіне кірісуіне орай ел Президенті Нұрсұлтан Назарбаев Үндеуін жария етті. Елбасы өз Үндеуінде Қазақстан Республикасы ЕҚЫҰ-ға және бүкіл әлемге ағылшын тілінде алғанда төрт “Т” ұранымен айшықталған құндылықтарды ұсынатынын мәлім етті. Еліміздің төрт негізгі ұстанымы мемлекеттік және ағылшын тілінде: Сенім (Trust), Дәстүр (Tradіtіon), Ашықтық (Transparency), Төзімділік (Tolerance) болды. Бұл бастама бірден қолдауға ие болғанын да айта кеткен жөн.
Бүгінгі таңда ЕҚЫҰ құрамына 56 мемлекет еніп отыр. Атап айтқанда, ол – Еуропаның, Солтүстік Американың, Оңтүстік Кавказ бен Орталық Азияның көптеген мемлекеттерінің басын қосқан ірі өңірлік құрылым.
Қазақстан ЕҚЫҰ-ға 1992 жылдан бері тұрақты мүше болып келеді. ЕҚЫҰ-ға мүше болған жылдар ішінде Қазақстан осы құрылыммен, оның барлық қызметінің саласы бойынша өзара қарым-қатынастарын жоғары деңгейге жеткізу бағытында жұмыс істеді.
ЕҚЫҰ-ға төрағалық ету туралы ниетін Қазақстан 2003 жылы білдірген болатын. Осы ниетке Елбасының 2005 жылғы “Қазақстан экономикалық, әлеуметтік және саяси жедел жаңғыру жолында” атты халыққа арнаған Жолдауында арнайы басымдық берді. Қазақстанның ЕҚЫҰ-ға төрағалық етуіне 2005 жылы Қазан қаласында ТМД басшыларының саммитінде қолдау көрсетілді. Ал 2007 жылы 30 қарашада Мадрид қаласында өткен ЕҚЫҰ-ға мүше мемлекеттер Сыртқы істер министрлерінің кеңесінде Қазақстанның ЕҚЫҰ-ға 2010 жылы төрағалық етуі туралы мәселе шешімін тапты. Ұйымға мүше елдердің барлығы бірауыздан қолдау білдірді. Сол күннен бастап еліміз осы миссияны аса жауапкершілікпен атқару жолындағы дайындыққа кірісті. Н.Назарбаевтың бастамасымен “Еуропаға жол” мемлекеттік бағдарламасы қабылданды. Оның ішінде мемлекетіміздің ЕҚЫҰ-ға жетекшілік ету жолындағы мақсаты мен міндеттері айқын көрініс тапты. Осы бағдарламаның арқасында Қазақстанның Еуропа елдерімен әлеуметтік-саяси ықпалдасуы, гуманитарлық ынтымақтастығы жаңа арнаға түсті. Бұл Еуроодақ елдерімен ынтымақтастық байланысымызды жаңа деңгейге көтеруге бастаған сындарлы қадам болды.
Астана жаңа ғасырдан бастап әлемдік маңызды іс-шараларды өткізудің орталығына айналды. Мол тәжірибе жинақтады. Бірнеше халықаралық форумдар болып өтті.
Соның бір мысалы ретінде айтар болсақ, Қазақстанның елордасында Әлемдік және дәстүрлі діндер көшбасшыларының съезі үш рет табысты өткізілді. Ол әлемге ұлтаралық және діндераралық келісімді қалай жүргізу керектігін паш етті. Осы жолдағы Қазақстанның ұстанған саясаты үлгі ретінде жоғары бағаланды.
Елбасымыздың Астанада ЕҚЫҰ Саммитін ұйымдастыру туралы ұсынысы да ЕҚЫҰ-ға мүше мемлекеттер тарапынан бірауыздан қолдау тапты. Желтоқсан айының 1-2-сі күндері Астанада өтетін ЕҚЫҰ-ға мүше елдер Мемлекет басшыларының Саммитіне шамамен 5 мыңға жуық шетелдік қонақ келеді деп болжануда. Астана әлем назарында болмақ.
Сондықтан Астана қаласында ЕҚЫҰ Саммитін өткізу – үлкен жауапкершілікті талап етіп отыр. Бүгінгі таңда қаламызда қызу дайындық жүріп жатыр. Барлық саланы әлемдік деңгейге келтіру – оңай шаруа емес. Кезінде Алматы қаласында да осындай халықаралық маңызды шаралар жиі өтіп тұрды. Мұндай шараны өткізу қала басшылығы үшін аса жауапты. Қазір Астана қаласы әкімдігінің құрылымдары ЕҚЫҰ Саммитін өткізуге толық әзірлігі туралы дайындық төлқұжаттарын алуда. Астана қалалық мемлекеттік санитарлық эпидемиологиялық қадағалау департаменті, көлік және автомобиль жолдары департаменті, төтенше жағдайлар департаменті мен өртке қарсы қызметтер, барлық аудан әкімдіктері, туризм және спорт басқармасы, елордалық туризм қауымдастығы, мемлекеттік сәулет-құрылыс қадағалау басқармасы дайындық төлқұжаттарын алып үлгерді.
Қазақ халқының қонақжайлығын паш ету мақсатында қонақтарды қарсы алу, мәдениетті қызмет көрсету шаралары жолға қойылды. Шетелдік қонақтарды жоғары деңгейде қарсы алу үшін “5 жұлдызды” қонақ үйлер іріктеліп алынды. Шет елдер тілдерін тереңдетіп оқыту курстары өткізіліп, жүздеген маман даярланды.
Жуырда Қазақстан Президенті Нұрсұлтан Назарбаев ресми сапармен Бельгия Корольдігіне және Францияға барып келді. Аталған мемлекеттер басшыларымен өткен жоғарғы деңгейдегі кездесулерде екі елдің ынтымақтастық байланыстары туралы, сонымен қатар, Қазақстанның ЕҚЫҰ-ға төрағалық етуі, Астанадағы ЕҚЫҰ Саммитіне дайындық жөнінде әңгіме өрбіді.
Франция астанасында өткен Париж Хартиясының 20 жылдығына және Қазақстанның ЕҚЫҰ-ға төрағалығына орай ұйымдастырылған конференцияда Қазақстан Президенті Нұрсұлтан Назарбаев: “Қазақстан Астанада ЕҚЫҰ Саммитін өткізу дайындығына аса жауапкершілікпен қарайды. Біз ЕҚЫҰ-ға мүше мемлекеттер басшылары тарапынан біздің жас мемлекетімізге, жас демократиямызға көрсеткен зор сеніміне алғыс айтамыз. Біз Саммиттің табысты болуы үшін қолдан келгеннің барлығын жасап жатырмыз, қазіргі заманның жаңа сұраныстарына жауап бере алуы үшін біз қабылдағымыз келетін барлық құжаттар келісілді”, – деді.
“Астана Саммитінің ЕҚЫҰ қызметінің жаңа сатысының бастауы болатынына сенімдімін. Ол стратегиялық бағыттарды және Ванкуверден Владивостокқа дейінгі біртұтас және бөлінбейтін “жол картасы” үдерісі жүйесін белгілейді”, – деп атап өтті Мемлекет басшысы.
Қазақстан Президенті Нұрсұлтан Назарбаев “Қазақстан-2030” Стратегиялық жоспарында Азияның ең кедей елдерінің кейбірі отыз жыл ішінде қайыршылықтан оңалып, индустриялды мемлекеттерге айналғанын, оның ішінде алғашқылары Корея, Тайвань және Сингапур болса, кейін оларға Малайзия, Индонезия және Тайланд қосылғанын жазған. Соңғы жылдары Қытай мен Үндістан қарқынды дамып келе жатқанын атап өткен. Ресейдің де әлеуеті жоғары екенін айтты. Сингапур өз тәуелсіздігін алған кезде жан басына шаққанда 200 долларға жетпес табысы бар кедей ел болса, қырық жыл ішінде жедел дамып, адам басына шаққанда 20 мың доллардан асатын табысы бар Азия жолбарысына айналған. Осы ойларды мысалға ала отырып, Елбасы: “2030 жылға қарай Қазақстан Орталық Азия Барысына айналады және өзге дамушы елдер үшін үлгі болады деп сенемін”, – деді.
Ойымызды қорытындылай келгенде айтарымыз, барыс жылы еліміз үшін табысты болып отыр. Биыл еліміз дүние жүзіне жақсы танымал болды. Іргелі саясатымыз бен халқымыздың мәдениеті мен өнер саласы да жан-жақты насихатталуда. Жер шарының тұрғындары Қазақстанды, қонақжай қазақ халқын білді. Сондықтан 2010 жыл мемлекетіміздің жаңа кезеңге аяқ басуының қарышты қадамы ретінде бағалануда. Ендеше, бірлігі мен ынтымағы жарасқан еліміздің алдағы уақытта алар асулары да асқақ болып, абыройы арта берсін дегім келеді.