Ықпалдастық бағытындағы жаңа қадамдар

Достастық елдері үкіметтері басшыларының Санкт-Петербургтегі басқосуынан осындай ой түюге болады Кеше Қазақстан Республикасының Премьер-Министрі Кәрім Мәсімов Тәуелсіз Мемлекеттер Достастығына мүше елдер Үкімет басшылары кеңесінің және Еуразиялық экономикалық қоғамдастықтың Мемлекетаралық кеңесінің кезекті отырыстарына қатысу үшін Санкт-Петербург қаласына келді. Осы орайда 2008 жылдың 10 қазанында Бішкекте мемлекеттер басшыларының қабылдаған шешіміне сәйкес ЕурАзЭҚ-тың Мемлекетаралық кеңесінің Кеден одағының мемлекет басшылары және үкімет басшылары деңгейіндегі ең жоғары органы болып табылатынын айта кету қажет.

Венера ТҮГЕЛБАЙ – Санкт-Петербургтен.

ТМД-ға мүше мемлекеттердің Үкімет басшылары кеңесінің отыры­сы Ресей Федерациясы Үкіметінің Төрағасы Владимир Путиннің, Қа­зақстан Республика­сы­ның Премьер-Министрі Кәрім Мәсімовтің, Ар­мения Республи­ка­сы­ның Премьер-министрі Тигран Саркисянның, Беларусь Республи­ка­сының Премьер-министрі Сергей Сидорскийдің, Молдова Республи­ка­сының Премьер-министрі Вла­ди­мир Филаттың, Украина Премьер-министрі Николай Азаровтың, Қыр­ғыз Республикасы­ның Прези­денті Роза Отунбаеваның, Тәжік­стан Республикасы Премьер-ми­нистрі Акил Акиловтың, Өзбек­стан Республикасы Премьер-ми­нистрі­нің орынбасары Эльер Ганиевтің, Әзірбайжан Республикасы Пре­мьер-министрінің бірінші орын­ба­са­ры Ягуб Эюбовтың, Түр­кімен­стан Республикасы Министрлер кабинеті төрағасының орынбасары Рашид Мередовтің және ТМД Ат­қару комитетінің төрағасы Сергей Лебедевтің қатысуымен өтті. Үкімет басшылары кеңесінің оты­рысында еркін сауда аймағы ту­ралы келісімнің жобасын дайындау барысы мен ТМД елдерінің инно­вациялық қызметтестігінің мемле­кет­аралық мақсатты бағдарлама­сы­ның жобасын әзірлеу мәселелері талқыланды. Сол сияқты зият­кер­лік меншікті құқықтық қорғау, ха­лықты сапалы медициналық қыз­мет­пен қамтамасыз ету мәселелері де жан-жақты әңгіме арқауына айналды. Зияткерлік меншікті қор­ғау тұрғысында тиісті мемлекет­аралық кеңес құру жайы да сөз болды. Сонымен бірге, отырыста 2011-2012 жылдарға арналған гумани­тар­лық қызметтестік саласындағы іс-шаралардың басымдыққа ие жос­парлары, ТМД-ға мүше елдердің өндірісін және энергоресурстарды тұ­тынуын болжау мәселелері төңі­регінде де кеңінен әңгіме өрбіді. Мемлекетаралық кеңестің Үкі­мет басшылары деңгейінде өткен кезекті отырысына Қазақстаннан өзге қоғамдастыққа мүше 6 ел – Беларусь, Қырғызстан, Тәжікстан, Өзбекстан республикалары мен Ресей Федерациясының премьер-министрлері, сондай-ақ қоғам­дас­тыққа бақылаушы мәртебесіне ие Армения, Молдова және Украина ел­дерінің үкімет басшылары қатысты. Бірден атап көрсететін жәйт,  Мемлекетаралық кеңестің Санкт-Петербург қаласында өткен отыры­сында ұйым жұмысын одан әрі же­тілдіре түсуге қатысты бірқа­тар ма­ңыз­ды келісімдерге қол қой­ылды. Басқосуда Еуразиялық эко­но­ми­калық қоғамдастық шеңбе­рін­де Кеден одағын қалыптастыру мәсе­лелері және Қазақстан, Ресей, Бе­ла­русь мемлекеттері арасында Бір­тұтас экономикалық кеңістік құру жө­нін­дегі іс-қимыл жоспа­ры­ның жүзеге асы­рылу барысы тал­қы­ланды. Бұдан өзге күн тәртібінде ЕурАзЭҚ-тың басым бағыттарын дамытуға арнал­ған 2011-2013 және одан кейінгі жылдарға жоспарлан­ған іс-шаралар жобасы, “ЕурАзЭҚ-қа мүше мемле­кеттердің кеден тран­зиті бойынша бір­ыңғай авто­маттандырылған ақпа­раттық бақы­лау жүйесі” мемлекет­аралық мақ­сатты бағдарламасының жобасы, ЕурАзЭҚ-қа мүше мемле­кет­тердің азық-түлік қауіпсіздігі тұжырым­да­ма­сын жүзеге асыру іс-шарала­ры­ның жоспары бар. Сондай-ақ ша­руашылық жүргізуші субъекті­лердің Кеден одағы шеңберіндегі даулы мә­селелер бойынша ЕурАзЭҚ Сотына өтініш беруі және олар бой­ынша сот ісін жүргізудің ерек­ше­ліктері туралы келісімнің жобасы да қаралды. Сол сияқты Мемлекетаралық кеңес отырысында Кеден одағы­ның қызметін жетілдіре түсуге ба­ғытталған бірқатар құжаттарды кү­шіне енгізу туралы шешім қа­был­данғанын да атап көрсету қажет. Біртұтас экономикалық кеңістік құру жөніндегі бүкіл құжаттар бойынша келісімге келу жұмыстары аяқталып келеді. Бүгінгі отырыста қоғамдастық шеңберінде бірқатар маңызды құжаттар қабылданды. Сол сияқты жабық есік жағдайында өткен отырыста көптеген маңызды мәселелер талқыланып, олар бойынша принципті уағдаластыққа қол жеткізілді, деп атап өтті Қа­зақстан Үкіметінің басшысы Кәрім Мәсімов Мемлекетаралық кеңес отырысынан кейін бұқаралық ақ­парат құралдары үшін ұйымдас­тырылған арнайы брифингте. Ал Ресей Федерациясы Үкіме­ті­нің Төрағасы Владимир Путин ЕурАзЭҚ-тың посткеңестік кеңіс­тік­тегі интеграциялық үдерістердің талас тудырмайтын көшбасшысы екендігі­не назар аударды. Өзі өмір сүрген 10 жыл ішінде қоғамдастық сындарлы да ықпалды өңірлік ұйымға айналды, деді ол. Оған мүше 5 ел әлеуметтік, экологиялық бастамаларды ілгері жылжытып, гуманитарлық салада табысты жұмыстар жүргізуде. Өзара іс-қимылдардың қарқыны мен сапасы арта түсуде. ЕурАзЭҚ-тың Мемлекетаралық кеңесі отырысының күн тәртібіне шығарылған маңызды деген құжат­тардың бәріне де қол қойылды.