22-23 қараша күндері М.Әуезов атындағы Оңтүстік Қазақстан мемлекеттік университетінде облыс әкімдігімен бірлесе отырып ұйымдастырылған “Қазақстанның ЕҚЫҰ-мен ынтымақтастығы: жетістіктер және дамудың келешегі” атты халықаралық ғылыми-практикалық конференция өтті.
Халықаралық дәрежеде өткізілген конференцияның көздегені санаулы күндерден кейін Астана қаласында басталатын ЕҚЫҰ Саммитінің өтуін қолдау, Елбасының бейбітшілікті нығайту жолындағы ерен еңбегін мойындау болды. Сондай-ақ, М.Әуезов атындағы ОҚМУ-де аталмыш конференция қарсаңында Елбасына арнап мұражай ашылды. Ондағы мақсат Елбасын жастарға үлгі ете отырып, олардың отансүйгіштік қасиетін арттыра түсу болып табылды.
Конференцияға аталған тақырыптар бойынша ғылыми зерттеулерде нәтижелі көрсеткіштерге қол жеткізген профессор-оқытушылар құрамы, барлық жоғары оқу орындары мен Қазақстанның ғылыми зерттеу институттары және ТМД мен алыс шетел ғалымдары, саясаттанушылар мен белгілі журналистер шақырылды.
Конференция үш секция бойынша – ЕҚЫҰ және Қазақстан: Батыс және Шығыс арасындағы үнқатысу; ЕҚЫҰ Қазақстан жастарының көзқарасымен; ЕҚЫҰ және халықаралық қауіпсіздік секциялары бойынша жұмыс істеді.
“Егемен-ақпарат”.