Кеше Қазақстан қоржыны тағы сегіз алтын жүлдемен толықты. Таңертеңнен кешке дейін қымбат жүлдені алу оңай емес, әрине. Азиада басталысымен бір күнде осыншама алтын медальды санай алмай жүрген бізге каратэ-додан 60 кило салмақта сынға түскен Дархан Ассаділов пен 67 кило салмақтағы Ринат Сағындықовтың, оның алдында 400 метрге жүгіруде Ольга Терешкованың, үш қарғып секіруде Ольга Рыпакованың, онсайысшы Дмитрий Карповтың, көркем гимнастикадан Қазақстанның әйелдер құрамасы мен боксшы Серік Сәпиевтің, жеңіл атлетикада 800 метрге жүгіруде мәреге бірінші жетіп, алтын жүлдені мойнына таққан Маргарита Мацконың бұл ерліктері расымен де еліміздің мерейін бір өсіріп тастағаны сөзсіз.
Сөйтіп, қазір Қазақстанның Азиаданың 14 күнінде жинағаны 15 алтын. Елден шыққандағы межеміз 25 алтын медаль болатын. Қалған екі күнде осыған қол жеткізсек нұр үстіне нұр болар еді. Соңғы күндер еккен егіннің әр дәнін санайтын қоңыр күз. Спорт басшылары да жатып та, тұрып та алтын медаль санап жүр. Біз де санаймыз. Әуелде 30-ға жеткізіп қойып едік. Мынау Қазақстанның несібесі деп майлы жілік ұстатайын деп тұрған ешкім жоқ. Мұнда қырық серкеш санап беретін нағашы қайда.
Кеше бокстан 4 жігітіміз финалға өткенде көңіліміз көл болып келе жатып Қазақстан делегациясы құрама командасының баспасөз хатшысы Ардақ Тоғымов екеуміз 24 қараша күні алуға тиісті алтындарды санағанбыз. 14 күнде жинаған алтынмен пара-пар түсу керек болатын. Деп ойлағанбыз. Олай емес екен. Сөзсіз алтын алады деп сенген балуанымыз Таймураз Тигиев (96 кг) бірінші кездесуінде үнді Канриды балшықтай илегенімен, иран Уаданидан аса алмады. Күші жетіп-ақ тұр. Тактикалық қателік жіберді. Оның үстіне төреші де Иран балуанына ашық жақ тартты. Тигиевтің ұпайын бермей қойды. Секүнданты Аманжол Бұғыбаев наразылық білдіргеннен кейін қазылар қайта қарап ұпай берді. Таймураздың мінезі қойдай тастарды домалататын селдей ғой. Иранның қабағын жарып жіберді. Кілем үстінде қойғыласудан кетәрі емес. Төрешінің де іздегені осы. Ұпайын тартқызды. Жалпы Иран құрамасы алынбайтын қамал болып тұр. Леонид Спиридонов (66 кг) Абасаммидан ұтылды. Каратэшіміз Халид Халидов тағы да сол иран Рорхавқа жол берді. Қалған кездесулерде қарсыластарын түріп шыққан жігіттеріміз алтын медальға есепте болатын. Тек шоқпар жұдырық боксшыларымыз ғана ирандықтарға бесінші бұрышты іздетіп жатыр. Нұржан Қатаевтың екі дүркін Олимпиада чемпионы өзбекстандық Артур Таймазовтан (120 кг) аса алмайтыны белгілі еді. Осетин жігіті бұл жолы да сауатты күресті. Ал Өзбекстанның атынан кілемге шыққан ұлты қазақ Серік Мейірбеков алтын жүлде алды. Еркін күрестегі үміт енді Е.Шалыгина (63 кг) мен Г. Маюровада (72 кг) ғана қалды.
Каноэ мен байдаркадан екі қола және күміс медаль алдық. Бұл жерде де алтын аламыз деген үмітте едік. Қазіргі бессайыста бойжеткендер командалық сында қола жүлдені місе тұтты. Осындай сәтсіздіктерді айтпағанда, онсайысшы Дмитрий Карпов спорттың бес түрі бойынша сәрсенбі күні бірінші орынға шыққан. Кеше ядро лақтыруда өзіне ешкімді шендестірген жоқ. Денесі ауырлау жігітімізге сырықпен секіру қиынға түсе ме деп ойлап едік. Дмитрий жігіт екен. 4 м. 40 см. Биіктікті місе көрмеген отандасымыз 4 м. 80 см. бағындырып төбемізді көкке жеткізді. Ал, Анна Алябьева мен Мария Петракова сынды көркем гимнасшы қыздарымыз командалық есепте алда келеді. Ертеңгі жеке жарысты қосқанда құдай қос көрсе қос қызымыз екі күнде екі алтынды қолымызға ұстатпақ. Ольга Рыпакова үш қарғып секіруде алтын жүлдені жеңіп алды. Ал су добынан ерлер командасы Қытай құрамасымен алтынды сарапқа салады. Гандболшы қыздарымыз жартылай финалда алаң қожайыны Қытай құрамасымен, волейболшы қыздарымыз финалға шығу үшін Оңтүстік Кореядағы әріптестерімен сынға түседі.
Азиадада спортшылар осылай сынға түсіп жатқанда бессайысшымыз Галина Долгушина жарақат алып қалды. Ол мінген ат кедергіден секіре бере сүрініп, жығылды. Ертоқымнан жерге ұшып түскен Галина басымен құлап, есінен танып қалыпты. Осыдан кейін ол Гуанчжоудағы ауруханалардың біріне жеткізілді. Қазір оның жағдайы жаман емес, өзіне өзі келді. Ал жылқы жануардың мойны қайырылып, сол жерде мерт болды.
Азиадада допингке қарсы тексерулер қатты жүріп жатыр. Өзбекстанның тағы бір спортшысы допинг-тестен өтпей қалды. Сынақта сыр берген балуан Жахонгир Муминов жарыстан шеттетілді. Бұған дейін өзбекстандық дзюдошы Шокир Муминов допинг қолданғаны үшін күміс жүлдеден қағылып, екі жыл мерзіміне ресми жарыстарға қатысудан шеттетілген еді.
Қазір Қазақстан 15 алтын, 18 күміс, 32 қола жүлдемен бесінші орынға көтерілді. Алдымызда 19 алтын, 11 күміс, 23 қола жүлдені иеленіп отырған Иран келеді. Ал біздің өкшемізді басып келе жатқан Тайваньда 12 алтын, 12 күміс, 33 қола, жетінші орында тұрған Өзбекстанда 10 алтын, 17 күміс пен 20 қола медаль бар.
Кеше Лаос, Непал, Сирия елдері Азиададағы алғашқы қола жүлделеріне ие болды.
Бет қатталып жатқанда Азиадағы тілшіміз Бақтияр Тайжан телефон арқылы боксшы Иван Дычко мен жеңіл атлетикада 100 метрге жүгіруде Наталья Иванинскаяның күміс, еркін күресте Дәурен Жүмағазиев, Леонид Спиридонов пен Ермек Байдуашовтың қола жүлдені иеленгенін, ал волейболшы қыздарымыздың үшінші орын үшін таласуға мүмкіндігі бар екендігін хабарлады.
Бақтияр ТАЙЖАН, “Егемен Қазақстан” – Гуанчжоудан (Қытай).