Көлік саласындағы жұмыстар көңілден шықты
Кеше Премьер-Министр Кәрім Мәсімовтің қатысуымен Көлік және коммуникация министрлігінің кеңейтілген алқа отырысы болып өтті. Онда өткен жылы атқарылған жұмыс қорытындылары мен 2011 жылға белгіленген міндеттер қаралды. Аталған жиында негізгі баяндаманы Көлік және коммуникация министрі Әбілғазы Құсайынов жасады.
Көлік және коммуникация министрі Ә.Құсайынов 2010 жыл жаңа ғасырдың алғашқы онжылдығының түйіні іспетті дей келе, сала үшін бұл өркендеу онжылдығы болды деді. Соңғы он жыл ішінде көлік-коммуникация кешенінің негізгі көрсеткіштерінің өсуі байқалады. Дәлірек айтқанда, тасымалданған жүктердің көлемі 1,7 есе, жолаушылар тасымалы 1,8 есе, темір жол желісінің өткізу қабілеті 1,5 есе өскен. Автокөлік құралдарының саны 2,4 есе өсіп, қазір еліміздің әрбір алтыншы тұрғыны жеке көлік иелері атанып отыр.
Он жылда көлік инфрақұрылымына 1,4 трлн. теңге жұмсалған. Мемлекет басшысының халықаралық жоғары беделінің арқасында дағдарыс жылдарына қарамастан, халықаралық қаржы институттарынан 4,2 млрд. АҚШ доллары көлемінде займдар тартылған. Тек өткен жылы ғана министрліктің көлік инфрақұрылымын дамытуға арналған бюджеті 19,6 пайызға өсіп, 313,4 млрд. теңгені құраса, оның 99,1 пайызы игерілген.
2010 жылғы басты жоба – Мемлекет басшысының «Батыс Еуропа-Батыс Қытай» халықаралық көлік дәлізін жаңарту жөніндегі тапсырмасын жүзеге асыруды бастау болды, – деп атап өтті министр.
Үйлесімді ұйымдастырылған жұмыс нәтижесінде, оның ішінде 3 өңірдегі жергілікті атқару органдарының тікелей қатысуымен 2010 жылы жаңа жолдың алғашқы 417 шақырымы салынып, сол арқылы жол қатынасы қамтамасыз етілген. Осы ірі жобаны іске асыру барысында жаңа кәсіпорындар ашылып, еліміздің ондаған құрылыс компаниялары жұмыспен қамтамасыз етілсе, шағын және орта бизнес, соның ішінде қызметтер және тауарларды, соның ішінде құрылыс материалдарын жеткізу саласындағы бизнес іске қосылған.
Сабақтас салаларды қоса есептегенде жобада 34 мыңнан астам адам жұмысқа тартылған. 4,5 мың жол құрылысы техникасы қолданылып, 20 млн. текше метрден астам инертті материалдар және топырақ өңделсе, ал қазақстандық қамтылу 89 пайызды құраған. Өткен жыл жұмыс орындарын ашу жағынан нәтижелі болып, жалпы көлік және коммуникация кешені бойынша 100 мыңнан астам адамға жұмыс орны ашылған.
Ел экономикасында ең қажетті жүк тасымалдау түрі және жолаушылар қозғалысының ең тартымды құралы болып табылатын темір жол көлігі саласының стратегиялық мәні зор. Осы ретте 2 темір жол желісі, атап айтқанда, «Жетіген-Қорғас» және «Өзен-Түркіменстанның мемлекеттік шекарасы» желілері салынуда. Бүгінгі күнге жалпы 162 шақырым жолдың жоғарғы қабаты төселген. Жұртшылықтың жолаушы тасымалына сұранысының ұлғая түсуіне ең алдымен вагон паркінің тозуы мен жетіспеушілігінен тиісті жағдай болмауына байланысты көліктік мәшине жасау саласының маңызы арта түсуде. Қазіргі уақытта жолаушыларды жеткізу уақытын қысқарту мақсатында жолаушы пойыздарының қозғалыс жылдамдығын арттыру жөнінде жұмыстар жүргізілуде.
2010 жыл, әсіресе, азаматтық авиация саласы үшін күрделі болып, дағдарыс авиатасымалдаушылар арасындағы бәсекелестікті ширата түскен. Сондықтан өткен жылы ең алдымен халықаралық талаптарға сәйкес келетін нормативтік құқықтық база жасауға, ұшу қауіпсіздігін қамтамасыз ету, кадрларды даярлау мен негізгі активтерді жаңартуға баса назар аударылыпты.
Су көлігінде Ақтау теңіз портын солтүстікке қарай кеңейту жобасы бойынша концессиялық негізде құрғақ жүк терминалдарын салу мәселесі қарастырылуда. Бұл 2015 жылға қарай порттың құрғақ жүктер бойынша жобалық қуатын 4 млн. тоннаға жеткізуге мүмкіндік береді. Бүгінгі күннің өзінде қазақстандық порттардың үлесі Каспийдегі жүк айналымының жалпы көлемінің 31 пайызын құрайды.
Қазіргі уақытта еліміздің ең перспективалы және тиімді нүктелерінде транзиттік дәліздердің ажырамас бөлігі ретінде сауда, көп функциялы және көліктік-логистикалық орталықтар белсене қалыптасуда. Ал, министрлік өз тарапынан қажетті көліктік инфрақұрылыммен қамтамасыз ету бағытында, атап айтқанда, «Батыс Еуропа-Батыс Қытай» халықаралық транзиттік дәлізін салу, «Қорғас- Жетіген» жаңа темір жол желісін және басқа да инфрақұрылымдық жобаларды жүзеге асыру бағытында жұмыс жүргізуде.
Көлік және коммуникация саласының 2010 жылғы маңызды шараларының бірі Көлік инфрақұрылымын дамыту жөніндегі 2010-2014 жылдарға арналған салалық бағдарламаның қабылдануы дер едік. Бағдарлама аясында жалпы сомасы 2,8 трлн. теңге 58 инфрақұрылымдық жоба басталып, іске асырылмақ.
Өткен жылдың заманалық маңызы бар оқиғасы Қазақстанның төрағалығы шеңберінде елімізде ЕҚЫҰ- ға қатысушы мемлекеттер басшыларының Саммитін өткізу екені белгілі. Тарихи Саммитке әзірлену және өткізу аясындағы Елбасы тапсырмалары орындалып, атап айтқанда, Астана қаласының әуежайында қауіпсіздіктің тиісті деңгейін қамтамасыз ету және Саммитке келушілерді қабылдау бойынша іс-шаралар кешені толық орындалған.
Азаматтық авиация саласында нормативтік- құқықтық базаны одан әрі жетілдіру, елімізде ұшу қауіпсіздігін бақылау бөлігінде ИКАО аудиті ескертпелерін жою бойынша және қазақстандық авиатасымалдаушыларды 2011 жылғы сәуірде және қарашада Еурокомиссияның «қара тізімінен» шығару жөнінде шаралар жүзеге асырылмақ. «Эйр Астана» және «SCAT» авиакомпанияларының операциялық лизинг шарттары бойынша 11 әуе кемесін сатып алуы да алдағы жоспар еншісінде. Кадрларды даярлау мен біліктілігін көтеру, республика әуежайларының бәсекеге қабілеттілігін арттыру, сонымен қатар, маршрут жүйесін кеңейту және қолданыста бар авиажелілердегі рейстерді көбейту бағытындағы жұмыстар жалғаспақ. Су көлігі саласы бойынша да инфрақұрылымдық жобаларды іске асыруды жалғастыру, теңіз мамандарын даярлау жүйесі мен теңіз порты әкімшілігін құру жоспарланған.
Елдің транзиттік әлеуетін дамыту мақсатында тарифтік саясатты жетілдіру және бизнеске қатысты әкімшілік кедергілерді қысқарту, сондай-ақ көліктік-логистикалық орталықтарды тиісті көлік инфрақұрылымдарымен қамтамасыз ету көзделуде.
Алқа мәжілісі соңында министрліктің 2010 жылғы атқарған жұмыстарына баға берген Үкімет басшысы Кәрім Мәсімов Көлік және коммуникация саласының болашағынан үлкен үміт күтуге болатындығын, соңғы 3-4 жылда және дағдарыс кезеңінде республикалық және жергілікті бюджеттен бөлінген ауқымды инвестициялар экономиканың қажеттіліктеріне толық жауап бергенін айта келіп, дағдарыстан кейін бөлінген қаржылар негізінде атқарылған шаралардың талапқа сай болмай тұрғанын да қаперге салды. Осы ретте Премьер-Министр мемлекет пен жеке меншік әріптестігін қамтамасыз ету басты назарда болуы тиіс екенін, бұл тұрғыда Үкіметтің Мемлекет басшысының тапсырмасы негізінде дайындаған жаңа заң жобасын тиімді пайдаланған жөн дегенді де айрықша атады. Сондай-ақ ол министрлік алдына бірқатар міндеттер жүктеді.
Отырысқа қатысушылар алқа мәжілісі аясында отандық өндірушілердің жол-құрылыс материалдарының, арнайы техниканың, сондай-ақ темір жол мәшинелерін жасау саласы өнімдерінің көрмесін тамашалады.
Әбдірахман ҚЫДЫРБЕК.