Біздің елімізде сыртқы экономикалық байланыстардың негізі болып табылатын экономикалық дипломатия бекіп, нығайған. Соның нәтижесінде, мемлекетімізде индустриялық-инновациялық бағдарламалар іске асырылып, сол мақсатта тікелей шетел инвестициялары мен жаңа технологиялар тартылып, жағымды сыртқы байланыстардың ауқымы артуда. Осылайша, Қазақстан ширек ғасырда әлемдегі өз ұстанымын нығайтып үлгерді. Тәуелсіздіктің алғашқы сәтінен басымдық беріліп, дұрыс таңдалған көпқырлы сыртқы саясатының арқасында ширек ғасыр ішінде Қазақстан экономикасына 130 миллиардтан астам доллар тартылып, жан басына шаққандағы табыс 10 мың долларды құрады. Қазақстан – Орталық Азияға келген барлық сыртқы инвестициялардың 80 пайыздан астамының қабылдаушысы. Әрбір іске асырылған инвестициялық жоба – ұлтымыздың және Қазақстанның әрбір жеке азаматының әл-ауқатының кепілі. Инвестициялар мен инновациялар жаңа мыңжылдықтағы жаңа Қазақстанның қозғалтқышына айналған. Халқымыздың әл-ауқатының өсімі үшін ел экономикасына инвестицияларды, инновацияларды және жаңа технологияларды тарту ісі бойынша отандық дипломатия айтулы нәтижелерге қол жеткізіп, жұмысты табысты жалғастыруда. Қазақстанның географиялық және геосаяси тұрғыда Еуразия кеңістігінің қақ ортасында, әлемнің жетекші державаларымен көршілес орналасуы сыртқы саясатымызға әсер етпей қоймауы мүмкін емес. Сол себепті, Тәуелсіздіктің алғашқы күнінен бастап, Қазақстан Ресей Федерациясымен және Қытай Халық Республикасымен екіжақты қарым-қытынастарға стратегиялық басымдық беріп, оны үнемі дамыту үстінде. Стратегиялық әріптестік дәнекерлері Қазақстанды Америка Құрама Штаттарымен байланыстыруда. Тәуелсіздік жылдары ішінде Еуроодақпен белсенді саяси үнқатысу сақталуда. «Еуропаға жол» мемлекеттік бағдарламасын іске асыру нәтижесінде Қазақстан Еу- ропаның негізгі мемлекеттерімен жан-жақты ынтымақтастықты аса жоғары деңгейге шығара білді. Еуропалық одақ елдері бүгін Қазақстанның әлемдегі басты сауда және инвестициялық әріптесі болып табылады. Елдің индустриялық-ин-новациялық даму стратегиясын іске асыру мақсатында Еуропалық одақ елдерінен озық техниканы және технологияларды тарту Қазақстанның сөзсіз жетістігіне айналды. Еуропалық бағытта қол жеткізілген табыстар Қазақстан сыртқы саясатының азиялық векторын күшейту туралы шешім қабылдауына мүмкіндік берді. Бұл өз кезегінде Тәуелсіздік жылдарында Қазақстанның Орталық Азиядағы өз ұстанымдарын нығайтты. Отанымыз өңірлік экономиканы белсенді инвестициялау мен қазіргі кездегі сынақтар мен қатерлерге бірге қарсы тұруда Орталық Азия елдерінің күш-жігерін біріктіру бойынша саясат жүргізуде. Қауіпсіздік, су-энергетикалық ресурстарды тиімді пайдалану, еңбек миграциясы проблемалары мен өңір өмірінің басқа да өзекті мәселелері назардан тыс қалған емес. Қазақстан аумағынан халықаралық терроризм, есірткі трафигі, діни экстремизм қатерлері шығатын Ауғанстанның тұрақты және орнықты дамуына мүдделі. Елімізде ауған жастарын оқыту үшін 50 млн АҚШ долларын бөлу жөніндегі бастаманы қоса алғанда, Қазақстанның Ауғанстанға гуманитарлық көмек көрсету туралы шешімі де әлемдік қоғамдастық тарапынан айрықша атап өтілді. Еліміз ЕҚЫҰ-ға төрағалығы барысында ұйымға мүше елдердің назарын Ауғанстан мәселесіне бұрып, оның тек аймақ мемлекеттеріне қатысты емес екендігін түсіндірді. Сондай-ақ, әлемге ортақ бұл түйткілді бірге шешуге қатысты нақты ұсыныстар жасады. Еліміздің жаһандық мәселелерді шешуге атсалысудағы нақты қадамдары мен сыртқы саясатындағы жетістіктерінің нәтижесінде 2017-2018 жылдары БҰҰ Қауіпсіздік Кеңесінің тұрақты емес мүшелігіне сайлануы да біздің үлкен жетістігіміз. Бұл – Қазақстанның әлемдік қоғамдастық алдындағы саяси салмағының өсуі әрі ел дипломатиясының негізгі жеңісі.
Нұрлан СЕЙДІН,
саясаттанушы
