Опырылған ағаштар өңдеуден өтпек

Алматыда Төтенше жағдайлар министрі Владимир Божко мен қала әкімі Ахметжан Есімовтің қатысуымен мамыр айындағы табиғат құбылыстарының салдарын қалпына келтіру мәселесі туралы жиналыс өтті. Мамыр айында Жетісу жерінде болған жер сілкінісі мен қатты дауылдан кейінгі зардаптарды жою мәселесі сынға ұшырады. Қала әкімі 17 мамырдағы дауыл­дан кейін-ақ құлаған тал мен жабыл­ған жолды жақын күндері қалпына келтіретіндіктерін жеткізген бола­тын. Алайда Медеу, Шымбұлақ жо­лы тазартылғанымен, күні бүгінге дейін тау бөктеріндегі жүзжылдық алып ағаштар сол опырылған қал­пында жатыр. Іле Алатауы ұлттық саябағында құлаған 90 мың ағаш бұл күнде құрт түскенімен қоймай, жазғы өртке де себепші болу қау­пін тудыруда. Осы мәселелерге қа­таң шүйліккен әкімге орман шаруа­шылығы мамандары 20 күннің ішінде олқылықты ауыздық­тай­ты­нын айтты. Ол үшін жұмсалатын қаражат пен еңбек күші, өзге де техникалар көршілес аймақтардан тартылатындығы ескерілді. Жел құлатқан 3178 ағашты түбірімен отап, тиісті жерге жеткізу үшін жергілікті бюджеттен осы уақытқа дейін 75 миллион теңге жұмсалған. Ахметжан Есімов қаланың жол инфрақұрылымына залал келтірмес үшін ендігі жерде қаусаған ағаш­тар­дың маңынан уақытша шағын цех ашып, керексіз қарағайларды өңдеумен және қалдықтарынан ты­ңайтқыш жасауды ұсынды. Жиналыста сөз болған екінші мә­селе – Іле Алатауы ұлттық сая­бағы аумағындағы Кіші Алматы көліне құятын М.Мәметова мұзды­ғының №6 көлі туралы болды. Мамыр ба­сындағы сілкіністен кейін осы өзенде «мұз жарылып, жы­расында қауіпті сы­зат пайда бо­лыпты, су тасқыны болуы мүмкін екен» дейтін алып-қашты әңгіме ел ішін еркін кезген-ді. «Қазсел­ден­қорғау» мемлекеттік ме­ке­ме­сінің мамандары сілкіністен ке­йін-ақ атал­мыш аймақты тексеріп, қауіп тудыратын жағдайдың жоқ екендігін ескерткен. Министр мен әкім жиналысқа кірмес бұрын тік­ұшақ­пен көлдің ахуалын басына барып байқап қайтты. «Қазселденқорғау» мекемесінің бас­тығы Т.Баймолдаев №6 көлде дәл қазір 70-80 сантиметрлік қысқы мұз­дың жатқанын, судың деңгейі был­тыр­ғыға қарағанда 3,5 метрге дейін төмен екендігін айтып, жұрт­шылық­тың үрей­ленуі негізсіз екендігін жеткізді. Жиналыс қорытындысында М.Мәметова мұздығының №6 көліне қалыпты су жинау ісіне жүйелі түрде мониторинг жүргізу және дауыл­дан кейінгі құлаған талдар­дың орнын тез арада толықтыру жұмысын тиянақ­тау шарасы тапсырылды. Қанат ЕСКЕНДІР, журналист. Алматы.