Ел Тәуелсіздігінің 25 жылдығына арналған «Тәуелсіздік толғауы» жаңа пьесалар байқауы өз мәресіне жетті.
«Тарихта ізі қалған дара тұлғалармен кездесудің киелі орны – театр сахнасы» деп ұлтымыздың айтулы классигі Ғ.Мүсірепов айтқандай, қазақтың тілі мен тарихын, мәдениеті мен өнерінің мәйегіне айналған театр сахнасын көркейтетін жанр қашанда драматургия екені даусыз. Соған орай уақыт талабы мен жаңарған қоғамдағы көрерменнің талабына сай дүниелерді сахналауға, сондай-ақ, кәсіби мамандар сарабынан өткен пьесаларға жылдан жылға сұраныстың арта түсуі заңды құбылыс. Драматургияның бағытын айқындап, бағдарынан жаңылдырмайтын мамандардың әділ сынынан сүзілген шығармалардың театр сахнасына жол тартуы кейінгі жас буын қаламгерлерді таныту мен ұлттық драматургияны дамытудың мүмкіндігі саналуда.
Тәуелсіздік туының егемен ел көгінде желбірегеніне 25 жыл толуына орай өткізілген байқаудың мақсаты – театр репертуарларын тәуелсіз Қазақстанның бүгінгі келбетін бейнелейтін шығармалармен толықтыру, ұлттық театр өнеріне, өңірден шыққан талантты драматургтерге қолдау көрсету, олардың көркем шығармаларын насихаттау, жас драматургтерді анықтау болатын.
Сарапшылар назарына еліміздің түкпір-түкпірінен 28 пьеса келіп түсті. Байқаудың ережесіне сәйкес, қатысушыларға бұрын-соңды театр сахнасында қойылмаған, тәуелсіздік жылдарында жазылып, осы жылдардағы оқиғаларды қамтитын, көркемдік деңгейі жоғары шығармалар қабылданатыны атап көрсетілген болатын. Республикамыздың әдеби әлемінде қарымды қаламымен танылған белгілі драматургтер мен жазушылар қазылық еткен байқау өз межесіне жетіп, жеңімпаздар анықталды.
Кез келген байқауда бас бәйгені иеленген шығарма үлкен оқиға тудыруы керек. Сол себепті, бас жүлденің орнына 1-орынды 2 шығармаға беруге шешім қабылдаған қазылар алқасының ортақ ұйғарымы бойынша бірінші жүлде – Мархабат Байғұттың «Асқаровтың аққайыңдары» мен Сая Қасымбектің «Дауыл» пьесаларына, екінші орын – Байғали Есенәлиевтің «Ана жүрегі», үшінші орын Төкен Әлжантегінің «Жалғыздық жаңғырығы» және Мұрат Қолғанаттың «Пони» шығармаларына берілді. Ал арнайы номинациялар, «Шығармадағы рухани кеңістік», «Тақырып тұтастығы», «Ұлттық құндылықты дәріптегені үшін», «Бүгінгі күннің жарқын белгісі» аталымдары бойынша Хұсейін Әмір-Темірдің «Ешкімге керегі жоқ ауыл», Ұлжан Шайхиеваның «Желтоқсан айы мазасыз», Ақылбек Шаяхметтің «Алғыс пен қарғыс немесе Жарық пен көлеңке» және Асылбек Ихсановтың «Хақ жолы» туындылары марапатталды.
Қарашаш ТОҚСАНБАЙ,
«Егемен Қазақстан»