Үкімет жұмысы бағдарламаларды орындауға жұмылдырылуы тиіс

Кеше Мемлекет басшысы Нұрсұлтан Назарбаев Қазақ­стан Республикасының Премьер-Министрі Кәрім Мәсімовті қа­былдады, деп хабарлады Қазақстан Республикасы Президентінің баспасөз қызметі. К.Мәсімов Президентті елдің экономикалық дамуының қар­қы­ны мен серпіні туралы, Үдемелі индустриялық-инновациялық даму бағдарламасының барысы, жиын-терін жайы, әлеуметтік бағ­дарламалардың жүзеге асы­ры­луы туралы хабардар етті. Жыл басынан бері өнеркәсіп өндірісі 6 пайызға өсті. Бірінші жартыжылдықта 70 жаңа өндіріс орны ашылды. 160 мың адам жұ­мыс­қа орналасты. Еліміз бойын­ша жылдың аяғына дейін тағы 600 миллиард теңгенің 129 жо­ба­сы аяқталатын болады. Қазақ­стан­да дағдарыстан кейінгі ке­зең­дегі экономикалық даму жө­нін­де бағдарлама жүзеге асыры­лу­да. Ең алдымен, бұл Үдемелі индустриялық-инновациялық даму бағдарламасы, «Бизнестің жол картасы», «Жұмыспен қам­ту», «Өнімділік», «Ақбұлақ», «Ба­­лапан», тұрғын үй-ком­му­нал­дық шаруашылықты жаңғырту бағ­дарламалары. Индустрияландыру бағдарламасынан басқа, оларды іске асыруға 165 миллиард теңге бөлінген. Нұрсұлтан Әбішұлы, Сізге 8 айдың қорытындылары мен 9 айдың алдын ала қорытын­ды­ла­ры туралы баяндасам деймін. Би­ылғы жылдың сәуір айында Үкі­мет отырысында Сіз берген тапсырмалар барлық көр­сеткіштер бойынша іс жүзінде орындалуда. 2011 жылдың қо­ры­тындысы бойынша Сіз алға міндет етіп қойған 7 пайыздық өсім қамтамасыз етілетін болады. Өң­деу­ші өнеркәсіп өсімі озық қарқын алып келеді. Бұл Сіздің тапсырмаңыз бойынша, индус­трия­лық бағдарламаның арқа­сын­да жүргізілуде. Желтоқсан ай­ында сөз еткен нысандардың тұсаукесері белгіленген мерзімде өткізіліп, іске қосылатын болады. Ә.Исекешев басқаратын жедел топ қазір бұл мәселе бойынша жұмыс істеп жатыр, олар қазіргі кезде өңірлерді аралап жүр. Барлығы да белгіленген жоспарға сәйкес жүргізілуде. Ауыл шаруа­шылығы саласындағы жиын-терін Сіздің тапсырмаңыз бойын­ша қолға алынған кешенді шара­лардың арқасында жанар-жағар маймен қамтамасыз ету, жаңа тех­нологияларды пайдалануға дай­ындық жұмыстары жүзеге асып, Сіз таяуда Қостанайда, Сол­түстік Қазақстанда көргеніңіздей, оң жемісін беруде. Бүгінгі күні 21 миллион тонна егін жиналды, тағы да резервтер анықталуда. Би­ылғы жылдың қорытындысы бойынша 24-25 миллион тонна егін жиналатын болады. Осыған сәйкес белгілі бір қиындықтар бар, ол – астықты сақтау. Ауыл ша­руашылығы министрі бастаған штаб құрылды. Ертең біз жи­налған астық өнімін сақтап қалу үшін республикалық селек­тор­лық кеңес өткізуді жоспарлап отыр­мыз. Белгілі бір проблемалар туындауда, алайда олардың бәрі шешімін табатын болады. Ауыл шаруашылығы министрі мен облыстардың әкімдері баян­да­ғандай, астық көп мөлшерде жиналғанына қарамастан, сақта­ла­тын болады. Бұл үшін Сіздің тапсырмаңыз бойынша бюджетті нақтылау жобасы қабылданды, оның ішінде, астықты тасымал­дау­ға, сатып алуға Сіздің тап­сыр­маңызбен «ҚазАгро» компаниясы тарапынан субсидия бөлу қа­рас­тырылған. Бұл өз нәтижесін береді және біз мұны үнемі бақылауда ұстаймыз. Диқандардың зор ең­бе­гімен жиналған астық сақ­талуы тиіс және сақталатын бо­ла­ды. Мен Сізге тағы бір мәселе жөнінде баяндағым келеді. Бұл жанар-жағармай материалдары­мен қамтамасыз ету жағдайы. Өйт­кені, бұл мәселе қоғамды қат­ты толғандырып отыр. Тамыз ай­ында белгілі мөлшерде кідірістер болды, себебі, бірінші кезекте бұл өзімізді әлі де болса жекеменшік жанар-жағармай өндірі­сі­мен толық қамтамасыз ете ал­мауымызға байланысты болып отыр. Тек 2014 жылы желтоқ­санда, Қазақстандағы барлық мұнай өңдейтін зауыттарды қай­та құру аяқталғанда ғана бұған мүмкіндік туады. Жалпы ал­ғанда, белгіленген барлық бағ­дар­ла­ма­ны іске асыруда қиын­дық жоқ емес, бірақ олардың бәрі шешімін табатын болады және Сіздің барлық тапсыр­ма­ларыңыз Тәуел­сіз­діктің 20 жыл­дығында орын­да­латын болады, деді К. Мәсімов. – Ауыл шаруашылығы тауар­ла­рын өндірушілер ақшаларын жоғалтпас үшін, келешектегі да­мулары үшін және осындай көп жиылған астықтан тиісті қара­жатын табу үшін бұл мол ас­тықты сақтау, дер кезінде экс­портқа шығару өте маңызды. Ағымдағы екінші үлкен мәселе – халық шаруашылығының, бар­лық өңірлердің қысқа дайын­ды­ғы. Бұл – өте маңызды. Үшіншісі – еліміз Тәуелсіздігінің 20 жыл­ды­ғын лайықты қарсы алуға дай­ындық жасау. Мен көп облысты аралап, солтүстік, батыс облыс­тарда болдым, тапсырмалардың орындалып жатқанына қызы­ғу­шылық таныттым, әрбір қала, әр­бір елді мекен, әрбір ауыл осыны сезінуі тиіс, бұл біздің бағдар­ла­маларымызда көрініс тапқан. Әсі­ресе, бұлар – жұмыспен қам­ту, ауыз сумен қамтамасыз ету және тұрғын үй-коммуналдық шаруашылық кешені жөніндегі бағдарламалар. Бұл бағдарла­ма­лар әрбір адамға, қарапайым адам­дардың мүддесіне қатысты, сондықтан тиісті жұмыстарды анағұрлым қарқынды жүргізулері үшін мұны қадағалап отыру қа­жет. Ол істер атқарылуда, мен бұған көз жеткіздім. Қазір бізде барлық бағдарлама әзірленген: біз­де индустриялық бағдарлама бар, бізде аграрлық кешенді да­мыту бағдарламасы да бар, әлеуметтік мәселелер бойынша бағдарламалар бар, медицинаны дамыту, денсаулық сақтау саласы жұмыс істеуде, адамдарды жұ­мыс­пен қамтамасыз ету, тұрғын үй-коммуналдық шаруашылық ке­шені, ауыз су мәселесі қолға алынған. Барлық бағдарлама әзір­ленді, қаражат бөлінді, ендігі мәселе экономиканы дамытуға, адамдардың өмір сүру деңгейін жақсартуға бағытталған осы бағ­дарламалардың орындалуына ба­қылау жасау қажеттігінде. Сон­дық­тан қазір Үкімет жұмысы осыған жұмылдырылуы тиіс, деп атап өтті Мемлекет басшысы.