Мұндайда ойын балаларына қиын. Ауыл іргесінде күмістей жылтырап өзен ағып жатқаннан кейін үлкендердің көзін ала беріп суға күмп береді. Сарыағаш ауданы Бағыс ауылында да осындай жағдай орын алды. Таудан құлап аққан арық маңындағы балалардың қасында қалталақтап жүрген бір жарым жасар Ержан суға құлап кетеді. Үсті тынық болғанымен, ағысы қатты тау суы бүлдіршінді қақпақылға алып ала жөнелген.
Кішкентай Ержанның көрер жарығы бар екен. Осы мезетте үйінен шыққан он үш жасар мектеп оқушысы Демежан Алтай көмек сұраған балалардың шырылын естіп, мән-жайға қаныққан соң суға қарғып кетеді. Бір батып, бір шығып бара жатқан сәбиді қуып жетіп, жағаға алып шығады. Тау суының ызғары өтіп кеткен сәби көкпеңбек болып талып жатыр. Демежан Алтай жағаға жатқызып кеудесін басып, жасанды дем алдырғанда көгеріп жатқан сәби есін жинайды.
Кейін құтқарушылар келгенде он үш жасар баланың еш саспай алғашқы медициналық көмекті сауатты жасағанына таңданыстарын білдірген. Кейде абдыраған үлкендердің өзі мұндайда асып-сасып қалар екен.
Сәбиді құдай бір ажалдан қағыпты. Анығы, сол күні таңертеңгілік Демежан жарысқа кетуі керек болған. Бірақ, бір себептермен аялдап қалыпты. Егер ол үйден бірер минут кеш шықса, Ержанның жарық әлеммен қоштасуы әбден мүмкін екен.
Бүгінде жеткіншек Демежан Алтайдың ерлігі өз туған ауылына ғана емес, елге үлгі болып жатыр. Облыстық төтенше жағдайлар департаменті ержүрек ұланды медальға ұсынбақ ниетте. Жақында өз тараптарынан алғыс хат тапсырды.
Осындайда еске түседі. Ақтөбе қаласында канал суына екі бірдей бала батып, көмек сұрағанда жағадағы ересектер құтқаруға ұмтыла қоймапты. Бұл – нағыз ездіктің белгісі. Біреуге оқ тиіп, болмаса машина апатына түсіп жаны қиналып жатқанда, ұялы телефонмен таспаға тартып, әлеуметтік желіге салатындар да көбейіп келеді. Бұл – азғындық. Ал Демежан Алтайдыкі нағыз ерлік. Ол – бейбіт күннің батыры. Ізгілік пен ұлттық патриотизмге мысал іздесеңіз, шартарапқа шабылмай-ақ қойыныз, Демежан сияқты жалынды жастар жаныңызда жүр.
Бақтияр Тайжан,
«Егемен Қазақстан»
Оңтүстік Қазақстан облысы
