Сол қасиеттерінің арқасында болса керек, өмір жолында арман-мақсаттарына қол жеткізді. Биыл 80 жасқа толатын Орынғали Балтайұлының жұмыстан жалыққан кезі жоқ. Ол әлі де қызмет етеді. Атырау қаласындағы №7 емханада педиатр-кеңесші. Тәжірибелі маманға қаладағы ғана емес, алыс ауылдағы ата-аналар да көп келеді. Бала денсаулығы, оны сақтау жолдары, дұрыс тамақтану жайында кеңестер алады. «Қазір балалар ауруы көбейіп кетті, – дейді медицина ғылымдарының докторы, профессор О.Балтаев. – Дүниеге жаңа келген нәрестелердің өзінде туабітті ақаулар белең алып тұр. Әсіресе, жүрек ауруы, асқазан-ішек жүйелерінің аурулары, қаны аздық, тыныс алу жолдарының сырқаты жиі кездеседі».
Дұрыс тамақтанбаудың ақыры ауруға алып келеді. Дүкен сөрелерінде қаптап тұрған түрлі аллергендердің бала денсаулығына пайдасынан зияны көп. Алдына келген ата-аналардың бәріне осыны айтып отыратын дәрігер «Ауру – астан» деген бабалар даналығына жете мән беруіміз керек» дейді. Бүгінгі балалардың компьютерден бас алмайтыны да Орынғали Балтайұлын толғандыратын тақырып. Дәрігер, әсіресе, жазғы демалыс кезінде балалардың компьютерде сағаттап үзіліссіз отыруы ми жүйесіне кері әсер ететініне алаңдайды. «Бұл жағдай гиподинамияға әкеледі, соның кесірінен баланың дене шымырлығы әлсірейді» дейді ол.
Ол компьютермен емес, кітаппен дос болған кезеңнің өкілі. Сондықтан болса керек, дәрігерлік кеңес алуға келген ата-анаға да, жасөспірім балаға да «Оқыған адам мұратына жетеді» деп үнемі айтып отырады. Шын мәнінде «ақ халатты абзал жан» деп айтуға тұрарлық шипагердің өмір жолы да тағылым мен тәлімге толы. 1964 жылы Алматы мемлекеттік медициналық институтын бітіргеннен кейін туған жері Атырауға оралып, облыстың ең шалғайында жатқан Қызылқоға ауданына педиатр-дәрігер болып барды. Үш жыл еңбек еткен соң, 1967 жылы Мәскеуге аспирантураға аттанды. 1970 жылдан 2002 жылға дейін Ақтөбе медициналық институтында ассисент, доцент, педиатрия кафедрасының меңгерушісі қызметтерін атқарды. 1991 жылы докторлық диссертациясын қорғап, бір жылдан кейін профессор атағын алды. 2002-2004 жылдары Атырау облыстық ауруханасы бас дәрігерінің орынбасары, 2004-2006 жылдары темір жол ауруханасы бас дәрігерінің орынбасары қызметтерін абыроймен атқарды. 2006-2012 жылдары Атырау облыстық балалар ауруханасында педиатр-дәрігер болды. 2012 жылдан бері №7 Атырау қалалық емханасында еңбек етеді.
Орынғали Балтайұлын өз кәсібіне жауапкершілікпен қарайтын жоғары дәрежелі маман ретінде әріптестері де құрметтейді. 45 жыл бойы денсаулық сақтау саласында еңбек етіп келе жатқан ардагер дәрігердің жас мамандарға үйретері көп. Орынғали Балтайұлының Ақтөбе медициналық институтында педиатрия факультетінің ашылуына көп еңбек сіңіргені елге белгілі. Ол қазірге дейін өз ісінің шебері ретінде гастроэнтеролог, аллерголог, нефролог мамандықтарының жаңа емдеу әдістерін ұсынып, науқастарға емдеу процесінің дұрыс болуын қадағалап отырады. Марапат пен мадақтан да кенде емес. Сексеннің сеңгіріне шыққан дәрігерден «Тілегіңіз қандай?» деп сұрадық. «Ең бастысы – балалар ауырмаса екен» – деді ол.
Бақытгүл Бабаш,
«Егемен Қазақстан»
Атырау
