Бүгінде Жер шары халқының жартысынан көбі қалаларда тұрады. Заманауи мегаполистер ресурстардың барлық түрлерінің негізгі тұтынушысы болып, экологиялық мәселенің негізгі көзіне айналуда. Қалдықтарды басқару жүйесінің өзектілігі жыл өткен сайын артып келе жатқаны да сондықтан. Қазіргі таңда үлкен қалалардың түгелге жуығы қалдықтарды қоршаған ортаға зия-
нын тигізбей өңдеуге мүмкіндік беретін шешімдерге ие. Франция мен Қазақстан қалаларында қолданылатын технологиялық шешімдер осы шарада талқыланған негізгі тақырып болды.
Басқосу барысында қос елдің мамандары қалдықтарды өңдеу мен оларды энергияның баламалы көздеріне айналдыру саласындағы жаңа зерттеулерімен бөлісті. Француздық компанияның ведомствоаралық бөлімі директоры Каролин Шаль қоршаған ортаны қорғаудағы басым бағыттар мен екі ел арасындағы ынтымақтасудың және тәжірибе алмасудың ықтимал әдістері туралы баяндады. Париждің ірі коммуналдық қызметтері қаланың экологиялық және энергетикалық мәселелерін шешуге арналған тәжірибелері мен ресурс-
тарын қалай біріктіретіні жайында «SIAAP» компаниясы бас директорының орынбасары Дени Пенуэль әңгімеледі. Қазақстандық «Экология және климат зертханалары» энергетика орталығы жетекшісінің міндетін атқарушы, доктор Ербол Сарбасов қатысушыларға Астана үшін жасалған, тұрмыстық қатты қалдықтарды жағудың жаңа технологиясымен және айналмалы қайнаған қабат әдісі бойынша көмірді жағу реактивтілігіне тұрмыстық ауыр қалдықтардың әсерін зерттеуімен, сондай-ақ газдандыру үдерісімен таныстырды.
«Syctom» компаниясының қызметі қайталама шикізатты сұрыптауды қолдануға және әрі қарай өндіруге негізделген. Бұл қалған қалдықтардан таза әрі қайта жаңартылатын энергия алуға мүмкіндік береді. Мұндай қадамның нәтижесі ресурстарды сақтайды. Болашақтың міндеті – аздаған қалдықтан көп энергия өндіру», деді сөзінде компанияның техникалық сервис жөніндегі бас директорының орынбасары Пьер Хиртцбергер.
Асхат РАЙҚҰЛ,
«Егемен Қазақстан»