26-27 қазанда Астанада Батыс Қазақстан облысының күндері өтеді
Тәуелсіздік тамыры тереңде
Батыс Қазақстан облысының әкімі Бақтықожа ІЗМҰХАМБЕТОВПЕН әңгіме
Бабаларымыз ежелден Еділ мен Жайық аралығындағы кең байтақ кеңістікті емін-еркін жайлап келгені тарихтан белгілі. Бүгінгі Батыс Қазақстан облысы дәл осы жерде, қос құрлық – Еуропа мен Азияның түйіскен тұсында орналасқан. Еділ мен Жайық о бастан жердің шетінде, желдің өтінде тұрған өлке. Күллі Еуразияны қабағымен жасқап, қаһарымен ықтырған Алтын Орда, Ақ Орда, Дешті-Қыпшақ, Ноғай ордасы сияқты ортағасырлық мемлекеттік бірлестіктердің осы өңірде ірге көтеруі кездейсоқтық емес. Бұдан бергі кезеңдерде де осы аймақта ұлттық мемлекеттік құрылымдар ту тікті. Бүгінде құрылғанына 210 жыл толып отырған Бөкей хандығы мен күнбатыс Алашорданың ел тарихындағы орны айрықша.
Сондай-ақ бұл өңір ықылым замандардан Батыс пен Шығыстың арасын жалғайтын көпір қызметін атқарып келеді. Мұнда әлемдік өркениет пен мәдениет ұшқындары ертерек бой көтеруінің бір сыры осындай тарих тағылымында жатса керек. Ал егемен ел құрамындағы бүгінгі Батыс Қазақстан облысы халықаралық ынтымақтастық торабына айналып отыр. Облыс басшысы Б.С.ІЗМҰХАМБЕТОВПЕН тілшіміздің әңгімесі өрелі де өркенді өзгерістер төңірегінде өрбіді.
– Бақтықожа Салахатдинұлы, Қазақстанның жаңа тарихы 1991 жылдың 16 желтоқсанынан, яғни егемендікке қол жеткізген күннен басталатыны белгілі. Жасыратын несі бар, бұл тұста еліміздегі кез келген облыстың жағдайы мәз емес-ті. Өйткені, Одақ кезіндегі экономикалық байланыстар быт-шыты шығып үзіліп жатты. Осындай тығырыққа тап болған өңірлердің бірі Батыс Қазақстан облысы еді...
– Ойыңызды түсіндім. Бұл өңір маған бұрыннан да өте таныс, әрі өте жақын болатын. Өйткені, мен Батыс Қазақстан мен Атырау облыстарының тоғысқан жерінде дүниеге келдім. Кейін осы аймақтан онша қашық емес Уфа мұнай институтына түсіп, мұнай инженері мамандығын алып шықтым. Осы кәсіби мамандығым мені газ, мұнай тәрізді стратегиялық шикізат көздеріне жақын орналасқан Орал өңіріне деген қызығушылық пен ынтызарлық сезімін де туғызғаны рас. Сондықтан да бұл елдің өсіп-өркендеуіне, жерінің астында бұғып жатқан байлығының игілігін көруіне сырттай тілекші болып жүретінмін. Тәуелсіздіктің алғашқы жылдарында өңір республика үшін де, шетелдіктер үшін де инновациялық мәнге ие бола бастады. Мен бұл тұжырымды Қарашығанақ кенішін игеруге қатысты айтып отырмын.
Тұңғыш Президентіміз Нұрсұлтан Назарбаев егемендіктің елең-алаң шағының өзінде жас тәуелсіз мемлекетке инвестиция тарту мәселесін батыл қойды. Көп кешікпей-ақ республика басшысының табанды көзқарасы мен елдік маңызы бар еңбегінің нәтижелері көріне бастады. Оның игілігін республикада алғаш көргендердің бірі – Батыс Қазақстан облысы. Одақ тараған тұста тас-талқаны шығып, қондырғылары ұстағанның қолында, тістегеннің аузында кеткен кенішті игеруге Елбасының тікелей ықпалымен шетелдік инвесторлар тартылды. Өнімді өзара бөлісу жөніндегі келісім-шарт осылай дүниеге келді.
– Тәуелсіздіктің алғашқы жылдарында республиканың әр аймағының тек өзіне ғана тән проблемалары мен күрмеуі қиын жіп секілді шешілместей көрінген мәселелері болғаны белгілі. Сол кезеңде Батыс Қазақстан облысы үшін бұл қандай проблемалар екенін айта алар ма едіңіз?
– Неге айтпасқа. Тәуелсіздікке қолымыз жеткенге дейін Орал қаласындағы қару-жарақ зауыттары мен қорғаныс кәсіпорындары тікелей Мәскеу мен Ленинградқа қарап келді. Мұндағы технологиялық желілер орталықпен ажыратылмастай, мызғымастай болып жымдастырылған болатын. Бұл жүйедегі кәсіпорындар өнім шығаруға қажет шикізаттан өзімізден тек қара металл ғана алып келген. Қалғаны Мәскеудің өзінен тасымалданған. Міне, осы тін бір-ақ күнде үзіліп қалды. Сөйтіп, жас егемен елдің батыс қақпасында шоғырланған стратегиялық қорғаныс кәсіпорындарын жаңа жағдайда тиімді де ұтымды пайдалану қажеттілігі туындады. Сол кездегі тәуелсіздік талаптарының бірі де осы еді.
Не істеу керек? Бұларды алғашқыда конверсиялау, яғни халық тұтынатын тауарлар шығаруға икемдеу бағыты ұсталды. Алайда, егемен ел дербес қорғаныс құрылымдарын құруды ойластырып отырған кезде мұндай әскери-технологиялық желілерді жаппай жою да тәуелсіздік талаптарымен үйлесім таба алмайтын. Бұрынғы Ворошилов атындағы машина жасау зауытында егеменді елдің теңіздегі шекара қызметіне қажетті катерлер мен кемелер жасау өндірісі осылайша жолға қойылды.
Сонымен бірге, «Металлист» қару-жарақ зауытының базасында Батыс Қазақстан машина құрастыру компаниясы құрылды. Қазір бұл ұжым республикадағы машина жасау өндірісінің көшбастаушылары қатарында екені батысқазақстандықтар үшін үлкен мерей. Бұл іргелі кәсіпорынның егемен ел мүддесіне қызмет жасауы үшін Елбасымыз Нұрсұлтан Назарбаев үлкен қолдау көрсетті деп санаймыз. Өйткені, Нұрсұлтан Әбішұлы Ақжайыққа келген сапарлары кезінде компания ұжымымен бірнеше рет кездесіп, алда тұрған міндеттерді айқындап берді. Сондай-ақ мұндағы инженер-техник қызметкерлерді ұлттық кадрлармен толықтыру жөнінде терең ой сабақтады. Бүгінде Мемлекет басшысы қойған осынау талаптар ойдағыдай орындалып келеді.
Екіншіден, сол кезде Орал өңірі үшін тағы бір проблема кешегі КСРО-ның мұрагеріндей көрінетін алып ел – Ресейдің алдындағы энергетикалық тәуелділік болатын. Сол тұстағы деректер тоқсаныншы жылдардың бас кезінде Батыс Қазақстан облысының Ресей энергетиктеріне кіріптарлығы 90 пайызға жеткенін көрсетеді. Өйткені, бұл кезеңде республиканың шекаралас өңірі Қазақстанның бірыңғай электр жүйесінен тым оқшау орналасқан еді.
Қашанда кісідегінің кілті аспанда емес пе? Ресейліктер Орал өңірі тұтынатын энергетикалық ресурстардың бағасын көтеріп отырды. Сөйтіп, облыс Ресей энергетиктері алдындағы қарызға белшесінен батты. Жағдай осылай жалғаса берсе, облыс тұрғындарының «күндері қараң» болатыны анық еді. Міне, осындай күрделі жағдайда шұғыл түрде өңірді энергетикалық тәуелсіздікке жеткізудің жолдары белгіленді. Әсіресе, соңғы төрт-бес жылда бұл іс тамаша нәтиже берді. Аймақта энергетикалық импорттың үлесін 90 пайыздан 2 пайызға дейін төмендетуге жол ашылды.
Тәуелсіздік алған кездегі екінші проблема өркениет көшіне бет бұрған заманда ел тұрғындарының көмір, қи тасып, от жағып, оның күлін шығарып машақат көріп отырғаны еді. Облыс орталығындағы әр түрлі өндірістік кәсіпорындар мен зауыт-фабрикалар да көмірмен, күйесі көп сұйық отын – мазутпен жұмыс жасап жатты. Осындай күрделі кезеңде оның бәрін арзан да тиімді, әрі таза отын табиғи газды тұтынуға көшіру ісі кезең-кезеңмен жүргізілді. Бүгінде облыстың барлық аудандарының тұрғындары көгілдір отынның пайдасын көріп отыр.
– Өткен қыркүйек айында Мемлекет басшысы Нұрсұлтан Назарбаев облысқа екі күндік жұмыс сапары кезінде тәуелсіздік жылдары Орал өңірінде болған өзгерістерді оң бағалады. Бұған қосарымыз, сапар қорытындысы бойынша Елбасы азық-түлік қауіпсіздігін сақтау ісінде облыста тындырылған істер мен жасалған жобаларға байыпты баға берген-ді. Бұл – науқандық шара емес. Үлкен стратегиялық мәні бар іс. Оның ұзақ мерзімді сипат алуы да алғашқы ойымызды шегелей түседі. Бақтықожа Салахатдинұлы, ендігі кезекте үдемелі индустриялық-инновациялық бағдарламаны іске асыру жөніндегі мәселеге тоқтала кетсеңіз.
– Біз тек бірыңғай мұнай-газ өндірісінен алынатын экономикалық өсімге тәуелді болмауымыз керек. Елбасының қойып отырған талабы осындай. Сондықтан да Нұрсұлтан Әбішұлы республиканы қарқынды дамыту ісінің басты жолдарының бірі ретінде индустрияландыру міндетін қойып отыр. Негізгі мәселе мұндай жобалардың ұшы қиыры жоқ тізбегінде емес, сан мен сапаның үйлесім табуында. Қолға алынған индустриялық жобалардың өміршеңдігінде. Бағдарламаны іске асырудағы басты өлшем осындай.
Индустриялық-инновациялық даму бағытын көздейтін бағдарламаның бәсекеге қабілеттілігі жоғары болуға тиіс. Әйтпесе ол жартыкеш күшінде қалып қоймақ. Бүгінгі басты мақсат – осы үдеден көріну. Өңірдегі индустриялық жобалар барысына талдаулар жасаған кезде жергілікті өндірісшілер импорт көлемін барынша азайтып, экспортқа бағытталған өнімдерді барынша молырақ өндіруге бағыт ұстап отырғанын көреміз. Бүгінгі күні облыстағы индустриялық-инновациялық жобалар шоғырында қазақстандық үлестің әжептәуір ұлғайғаны атап айтуға тұрарлық мәселе.
Ендігі жерде Ақжайық өңірінің тек өзіне ғана тән тағы бір ерекшелігін атап өте аламын. Мұнда ірі өндіріс орындарының жанынан кіші кәсіпорындар мен сервистік компаниялар құрылу үстінде. Бұл шағын құрылымдар алып өндірістердің қажеттілігін өтеуге қызмет жасамақ. Индустриялық жобаларды жан-жақты қанат қақтырудағы басты мақсат облыс экономикасын бұдан да биік деңгейге көтеру болмақ. Сондай-ақ бұл – өз кезегінде жүздеген, мыңдаған жаңа жұмыс орындары, рентабельді өндіріс және жоғары өнімділік деген сөз.
– Сонымен, сөз түйіні өзіңізде.
– Соңғы жылдары Орал өңірінде жүзеге асқан әлеуметтік жобалар тұрғындардың көңілінен шығып отыр. Ынтымағы мен береке-бірлігі жарасқан Ақжайық аймағының тұрғындары бір жағадан бас, бір жеңнен қол шығарып тәуелсіздікті баянды ету бағытында алаңсыз еңбек етіп келеді. Өңірдегі азаматтық қоғам институттары өкілдері де Жайықтағы жасампаз жобаларға қолдау көрсетуде. Олар біткен іске сыншы болмай, іскерлік ұсыныстар мен ой-пікірлері және нақты тындырған істері арқылы облыстың алға қарай дамуына үлестерін қосуда. Иә, біздің барлық жеңістеріміз бен табыстарымыздың түп тамыры мен қайнар көзі – тәуелсіздікте. Барша отандастарымыз осы ақиқатқа жүгінер болса, тәуелсіздігіміз де соғұрлым тұғырлы бола бермек.
Дәлелдеуді қажет етпейтін тағы бір аксиома, ақиқат бар. Бұл – тәуелсіздік тамыры тым тереңде екендігі. Оны өзінен-өзі келе қалған, бір-ақ күнде басымызға қона қалған бақ құсы деп ойлағандар оңбай қателеседі. Тәуелсіздік – бабаларымыздың ғасырлар бойғы арман-мұраттарының, соған жету жолындағы күрестері мен іс-әрекеттерінің бұдан жиырма жыл бұрын ғана нәтиже беруі. Осыны ұмытпайық.
– Бақтықожа Салахатдинұлы, күні ертең елордамыз Астанада облыстың күндері басталмақ. Бұл шақта өңір өкілдері Астана жұртшылығына тәуелсіздік жылдарында жеткен ұлан-ғайыр жетістіктерін паш етпек. Ендеше, бәрі де сәтті болсын демекпіз. Әңгімеңізге көп рахмет.
Әңгімелескен Темір ҚҰСАЙЫН.
Металлургия өңдеуші бағытқа бет бұрды
Күллі еліміздегідей Ақжайық өңірінде де индустриялық-инновациялық бағдарлама тың күшпен басталып, жалғасуда. Елбасының өзі аталмыш бағдарламаны «мемлекет пен тәуелсіздікті құрумен маңызы бірдей мемлекеттік тапсырма» деп бағалады. Өйткені, нарықтық қатынас, күніне мың құбылатын әлемдік конъюнктура жағдайында шикізаттық бағдармен алысқа ұзау қиын. Сондықтан үдемелі индустриялық-инновациялық бағдарламаны жүзеге асыра отырып, әлемдік инновациялық экономикаға қосылуымыз керек. Осы бағыттағы жобаның бірі ауыл-аймақтағы керексіз жатқан металл сынықтарын өңдеп, дайын өнім алуға жол ашады.
![221011-2](http://old.egemen.kz/2011img/221011-2.jpg)
Индустрияландыру картасы бойынша «Батыс Жол Құрылыс» ЖШС-нің балқыту-прокат цехын ұйымдастыру жобасы жандандырылмақ. Компания 2007 жылдан бері металл прокаты өнімдерін өндіріп, облыстың және еліміздің Астана, Қарағанды, Ақтөбе, Атырау, Ақтау өңірлерінің сұраныстарын өтеуде. Алайда, прокат түрлерін шығаруға қажетті металл құймаларды Қарағандыдан сатып алып келеді. Нарық жағдайында оны тасымалдау шығынын айтпағанның өзінде, шикізат бағасының тұрақсыздығы экономикалық жағынан тиімсіз. Сондықтан компания осы жаңа инновациялық жобаны іске асыруға кірісті. Оның үстіне қазіргі уақытта ауыл-аймақта қолданыстан шыққан металл қалдықтары жетіп артылады. Жер-жерде металл өткізу бизнесі гүлдеп тұр. Бірақ оның қызығын өзге елдер көруде. Аталмыш жоба іске асқан жағдайда, кәсіпорын шикізат тасымалдаудан құтылады. Қара металл қалдықтары шет ел аспай-ақ өзімізде, яғни индукциялық пештерде балқытылып, темір бұрыш, швеллер, двутавр сықылды құрылысқа қажетті материалдар шығарылады.
– Биыл наурыз айында түріктің «5М Electromehanic Ticaret Itd» фирмасымен құйманы үзіксіз құю желісі мен үш балқыту пешін жаңартып, жетілдіру жөнінде келісім-шарт жасадық. Құрал-жабдық Түркияға жөнелтілді. Желтоқсан айына қарай жаңғыртылған жабдық кері жеткізіледі. Содан кейін түрік мамандары құрал-жабдықты орнату, іске қосу жұмыстарын атқарып, жергілікті мамандарды оқытып, үйретеді. Алдағы Тәуелсіздік күні қарсаңында қара металды алғаш рет тәжірибелік балқыту рәсімін өткізуді жоспарлап отырмыз. Жоба 2012 жылдың бірінші тоқсанында іске қосылмақ, – деді өз әңгімесінде аталмыш компания директорының орынбасары Мақсат Бисембиев.
Компания басшылығының айтуынша, олардың өнімдеріне деген сұраныс жоғары. Қазақстан рыногына мұндай өнімдері Ресей мен Украинадан тасымалданады. Таяуда ғана көршілес Ресейдің шекаралас облыстарынан, Түркіменстаннан кәсіпкерлер келіп, тұрақты байланыс орнатуға ниеттерін білдірген. Самара, Орынбор өңірлеріне өнім өткізу алдағы уақыттың еншісінде. Бүгінде еліміздегі «Стальной двор» ЖШС, «Агис-Темир», «Титан-металл», «УралМеталлинвест», «КазТемирКонтракт» және өзге де ірі металл трейдерлеріне өнім түрлерін өткізу жайында келісім-шарттар жасалған. Жоба іске асқан жағдайда, шаршы шойын құйманы экспортқа шығару мүмкін болмақ. Сондай-ақ ортақ кедендік кеңістік жағдайында жобаны шикізаттық базамен қамту мәселесін шешу қиын емес.
Жобаның құны 1 миллиард 30 миллион теңге шамасында. Өткен жылдан бастап «Бизнестің жол картасы-2020» бағдарламасына енген кәсіпорын 12 пайыздық несие алып, оның 7 пайызын компания төлеуде. Қалған 5 пайызын мемлекет өтейді. «Бұл 5 пайыздың есебінен ұжымдағы жұмысшылардың жалақысын өсірдік және Металлургтер күніне орай сыйақы бердік. Жобаның тиімділігі зор. 200 адамға жұмыс орны ашылады. Салық төлемдері өседі. Қазақстан рыногындағы отандық өнім өндіру үлесі артады, – дейді Мақсат Тельманұлы. – Ал, жұмысшы кадрларын даярлауды кәсіптік лицейлермен, колледждермен бірігіп шешуді ойластырудамыз».
Оралда қолға алынған тың жоба еліміздің металлургия рыногының шикізаттық бағдардан өңдеуші бағытқа өткенінің жарқын бір мысалы болады деген сенім зор.
Гүлнар ШӘҢГЕРЕЙ.
Суретте: металл балқыту цехында.
Дерек пен дәйек
Өнеркәсіп
Облыс бойынша өнеркәсіп өнімдерін өндіру көлемі 1995 жылғы 12,3 миллиард теңгеден 2010 жылы 990,1 миллиард теңгеге, яғни 80 есеге өсті. Осы уақытта облыс экономикасындағы өнеркәсіп өнімдерінің үлес салмағы 20,7 пайыздан 53,2 пайызға ұлғайды.
Өнеркәсіп саласында тау-кен өндірісі 89 пайызды құрайды. Табиғи газ өндіру 1995 жылмен салыстырғанда 5,9 есеге, газ конденсаты 4,6 есеге өсті. Өңдеу өнеркәсібі өндірісінің көлемі 1995 жылғы 7 миллиард теңгеден 2010 жылы 83 миллиард теңгеге, яғни 12 есеге өсті. Облыс бойынша жалпы аймақтық өнім көлемі 1995 жылы 25 миллиард теңге болса, 2010 жылы 1049 миллиард теңгеге, демек 42 есеге өсті.
Жалпы аймақтық өнім әрбір жан басына шаққанда 38,5 мың теңгеден 1 730 мың теңгеге немесе 45 есеге өсті. Республиканың ішкі жалпы өнімі бойынша облыстың үлесі 2,7 пайыздан 4,8 пайызға ұлғайды.
Инвестициялық жобалар
2010 жылы облыста республикалық және аймақтық индустрияландыру картасы шеңберінде 9 инвестициялық жоба жүзеге асырылды. Олардың ең бастылары – 54 мВТ газ турбиналық электр стансасы, «Қарашығанақ – Орал» газ құбырының 2-кезеңі, мия тамырын өндеу зауыты, 8600 басқа арналған мал бордақылау алаңы, металл құрылғыларын ыстықтай мырыштау өндірісі, полиэтилен тұрбалар шығару цехы, Чинарев кен орнында тазартылған газ қондырғысы құрылысы және тағы басқалары.
2011-2013 жылдары үдемелі индустриялық-инновациялық бағдарлама бойынша жалпы сомасы 164 миллиард теңгеге 22 жоба іске асырылады, оның 4-уі биылғы жылдың бірінші жартысында пайдалануға берілді. Облыстың негізгі капиталына 2000-2010 жылдары 1 800 миллиард теңге инвестиция тартылды. Соның ішінде 684 миллиард теңгесі немесе 38 пайызы шетелдік және 62 пайызы отандық инвестиция.
Ауыл шаруашылығы
2010 жылы ауыл шаруашылығының жалпы өнімі 52,8 миллиард теңгені құрады, 1995 жылмен салыстырғанда 9 есеге артты. Тұрғындарды ерте піскен жеміс-көкөніс өнімдерімен қамтамасыз ету мақсатында жылыжай шаруашылықтарын дамыту жұмыстары атқарылып, соңғы үш жылда 15 жылыжай салынды. 2011 жылдың 1 қаңтарына облыста жалпы алқабы 14,1 мың шаршы метр 28 жылыжай бар. Қазіргі таңда облыста 400 мыңнан астам ірі қара малы, 1 миллоннан астам қой мен ешкі, 80 мыңның үстінде жылқы бар.
Азық-түлік қауіпсіздігін қамтамасыз ету және ауыл шаруашылығы шикізаттарын қайта өңдеуді дамыту мақсатында 2000-жылдардан бастап облыста инвестициялық жобалар жүзеге асырылып, өндірістер қайта жаңғыртылды. Соның ішіндегі ірі жобалар: Орал қаласында жылына 52 миллион дана жұмыртқа өндіретін құс фабрикасы, қуаты тәулігіне 150 тонна бидайды қайта өңдейтін диірмен кешені, жылына 7,4 мың тонна май өндіретін зауыт, 8,6 мың бас ірі қара малына арналған ірі бордақылау алаңы.
Шағын кәсіпкерлік
2010 жылы шағын кәсіпкерлік субъектілерінің саны 34 мыңға жетті. Бұл салада 64 мың адам еңбек етеді. Олар жылына 104 миллиард теңгенің өнімін шығарып, қызмет түрлерін көрсетеді. «Бизнестің жол картасы-2020» бағдарламасы шеңберінде аймақтық үйлестіру кеңесі құны 12,3 миллиард теңге тұратын 48 жобаны мақұлдады. Осы жобалар бойынша 1000 жаңа жұмыс орындары ашылмақ.
Құрылыс
Құрылыс жұмыстарының көлемі 2010 жылы 1995 жылмен салыстырғанда 34 есеге немесе 2,4 миллиард теңгеден 81 миллиард теңгеге өсті. 1995 жылы 70,4 мың шаршы метр тұрғын үй салынса, 2010 жылы оның көлемі 207,4 мың шаршы метрге жетті.
Таза ауыз сумен қамту
Тұрғындарды таза ауыз сумен қамту 2002 жылы 31 пайыз болса, 2010 жылы 64 пайызға жетті.
Табиғи газбен қамту
Елді мекендерді табиғи газбен қамтуда ауқымды жұмыстар атқарылды. Барлық 12 аудан орталығына табиғи газ жеткізілді. Ауылдық жерлердегі 185 елді мекенге газ барды, 95 ауылдық округ табиғи газға қосылды. 2007 жылы облыс бойынша елді мекендердің 67,6 пайызы газға қосылса, биыл 84 пайызға жетті. Бұл бағыттағы жұмыстар одан әрі жалғасуда.
Инфляция
Инфляцияның жалпы деңгейі 1995 жылғы 152,7 пайыздан 2010 жылы 107,2 пайызға төмендеді. Азық-түлік тауарлары бағасының индексі 138,8 пайыздан 110,1 пайызға түсті.
Білім беру
Білім беру саласын қаржыландыру 1997 жылғы 2,3 миллиард теңгеден 2010 жылы 30 миллиард теңгеге дейін жетті немесе 13 есеге өсті. Тәуелсіздік жылдары облыста 66 жалпы білім беретін және арнаулы орта мектеп, 14 мектеп жасына дейінгі тәрбие беретін мекеме салынды.
Балаларды мектеп жасына дейінгі тәрбие беру мекемелерімен қамту 1995 жылы 20,9 пайыз болса, «Балапан» бағдарламасы бойынша атқарылған жұмыс арқасында бұл көрсеткіш 93,2 пайызға жетті.
Денсаулық сақтау
Денсаулық сақтау саласын қаржыландыру 1,5 миллиард теңгеден 22 миллиард теңгеге өсті немесе 14,6 есеге артты. Тәуелсіздік жылдары облыста 76 заманауи техникамен жабдықталған нысандар салынды және 347 нысан күрделі жөндеуден өткізілді.
Осы жылдары облыс тұрғындарының орташа өмір сүру ұзақтығы 63,9-дан 68,4-ке дейін, яғни 4,5 жылға көбейді. Ана өлімі 68,5-тен 8,3-ке (100 000 тірі туғандарға шаққанда), балалар өлім-жітімі 26,2-ден 13,87-ге (1000 тірі туғандарға шаққанда), туберкулезбен сырқаттанушылық 104,8-ден 95,7-ге (100 000 адамға шаққанда) азайды.
Жұмыспен қамту
Жұмыссыздар саны 2010 жылы 1995 жылмен салыстырғанда 41,1 пайызға төмендеді. Жалпы жұмыссыздық деңгейі 10,8 пайыздан 5,6 пайызға түсті. Азаматтарды еңбекке орналастыру 1995 жылға қарағанда 6,6 есеге артты (2,8 мыңнан 18,5 мың адамға жетті).
Орташа айлық ақы 1995 жылы 3616 теңге болса, 2010 жылы 80 101 теңгеге жетті. Әрбір жанның айлық орта табысы 1 405 теңгеден 47 692 теңгеге көтерілді.
Мәдениет
Тәуелсіздік алғаннан бері ұлттық мәдениетті дамытуға жаңа мүмкіндіктер туды. 1999 жылдан бері 4 мәдениет мекемесіне жаңадан ғимарат салынды, 182 мәдениет ғимаратына күрделі жөндеу жүргізілді, 36 кітапхана, 84 клуб, 10 мұражай ашылды, жаңадан 9 кәсіби музыкалық және хореографиялық ұжым құрылды, ал «Халықтық» және «Үлгілі» атағы бар шығармашылық өнер ұжымдарының саны 19-дан 54-ке дейін көбейді.
...Сенің орның алабөтен
![221011-4](http://old.egemen.kz/2011img/221011-4.jpg)
Күллі аумағын солтүстіктен оңтүстікке қарай шарлап, жарып ағатындықтан да шығар, Батыс Қазақстан облысының аумағы ықылым замандардан бері Ақжайық атырабы аталады. Көктемде жайылмасындағы сай-саланы, ескі арналарды суға толтырып, қуаң тіршіліктің тұла бойына жан бітіріп, жайқалтып нуға айналдырып, жарқырай, жайыла ағатын Жайық бойы, шынында да қонысқа жайлы, шұрайлы атырап, түгін тартсаң құнары андыздайтын «майлы қиян».
Ата-бабаларымыз заманында өліспей беріспеген беймаза «қанды қиян» – Еділ бойы шынында да «адыра қалып», бүгінде қазақтың «майлы қияны» мен «шаңды қияны», шүкіршілік, түпкілікті өзіне бұйырды. Ежелден тамырлас, тілін тапса татулықтан айнымайтын, тарихқа тереңдей берсе діні басқа болса да, қаны аралас ағайынның иелігінде жатса да, көк түріктің рухы шарлаған аралық болашақта ел мен елдің достығын жарастырмаса, сына қағылатын жіктің жоқтығына шынайы кепіл. Жайық бүгінде еркін елдің ерке өзені. Берекелі байлығына ешкім көз аларта алмайтын құтты қонысы.
Бір алаңдатарлығы – адамзат ұрпағы ес білгелі ағысынан жаңылмаған арналар соңғы жылдары адам сенбестей тартылды. Заманында ат жалдап өте алмайтын асау арнаның жарқабақтары қалқиып жағалаудан алыстаған. Баяғы сыланып ағатын бұла өзен, қайсыбір жылдары жыланып жылжиды. Тіпті жаз ортасы ауа суға шомылған жағажайлардағы жұрттың Жайықты әр тұстан бойлап өткенін көргенде «Ақырзаман болғанда су тартылардың» кебі келді емес пе?» деп шошынғандардың жан-айқайын да естідік.
Сөйткен Жайық биылғы көктемеде небір жылдардан бері байқатпаған тосын мінезін танытты. Буырқана тасып, шамырқана тулады. Оған ілесе өңірдегі Деркүл, Шаған, Елек өзендері де долданып, арнасынан асты. Талай жылдардан бері табиғаттың мұндай тосын әрекетінен бейқам, өзендердің ескі жайылмаларын жазықтыққа балап, кейбір жерлерде ауа жайылып, бейберекет құрылыс салған, ескі арналардың маңайын мекен еткен марғау ел жер бауырлап жылжып, көк сауырлап шалқыған тілсіз жаудан сақтықты жадынан шығарып алғандарын бір сәтте естеріне түсірді. Зардап шекті. Жайық өңірінде су тасқынына байланысты төтенше жағдай жарияланып, тасқынның зардаптарын жоюға бүкіл ел жұмылдырылды. Елдігіміздің, бірлігіміздің, татулығымыздың туы осындайда асқақтады.
Қазақтың қайраткер ақын қызы Ақұштап Бақтыгереева басшылық ететін Қазақстан Жазушылар одағы облыстық бөлімшесінің жұмылдыруымен Ақжайықтың барлық қаламгерлері көктемгі туындыларының қаламақысын тасқыннан зардап шекендердің арнайы есеп-шотына аударды. Қолында қаржысы барын да, жоғын да жұмылдыра білген ел елдігін жасады. Үйсіз, күйсіз қалған мыңдаған отбасы бір жазда қайтадан баспаналы болып, көктемде көз жастарын қайғырып төккендер, күзде жанарларына қуаныштың көз жасын қайтадан үйірді. Табиғат апаты адам баласының табиғатқа тәуелді екендігін тағы бір есіне түсірді. Бірақ қамданса, жұмылса «Нұқ пайғамбардың кемесіне мініп» тығырықтан шыға алатындықтарын да ұғынды. Әрбір жапа шеккен жан артында елі барын, елді жұмылдыратын Елбасы бастаған жайсаң жұрты барын түсінді.
Көктемде әбігерге түскен Жайықта, міне, бүгін жаймашуақ күз. Ырысты, ынтымақты, жомарт күз. Жаратылыстың ен байлығын жиып үлгіре алмай жатқан қарбаласты күз. Күздің осы бір күндерінде Ақжайыққа Елбасы Н.Назарбаев келді. Жай келген жоқ, Жайық жұртының жайын қамдап келді. Тасқыннан зардап шегіп жабыққан жұртының қолтығынан тағы бір демей келді. Көздерінен күн сәулесі шашырап, жүздерінде шұғыла ойнаған, көкіректерінен алғыс ақтарылған ағайынмен жүздесті. Тыңнан тұрғызылған тұтас бір ауылдың тұсауын кесті.
Елбасы осы жолы атбасын қайтадан Ақордаға емес, Астраханьға бұрды. Күй атасы Құрманғазының, Бөкей ханның сүйегі жатқан екі елге де қадірлі Еділ жағалауындағы ежелгі шаһарға бағыт алып, Қазақстан мен Ресейдің шекаралас өңірлерінің VІІІ аймақаралық ынтымақтастық форумына қатысты. Мұнда да шешімін тапқан іргелі мәселелердің бірі – Жайықтың жағдайына қатысты болды. Елбасымыздың трансшекаралық Жайық өзенін бірлесіп қорғау жөніндегі ұсынысы қолдау тапты. Жайықты қорғайтын бірлескен мемлекеттік қор құрылатын болды. Суы ортақ екі елдің, түсіністігі, ауызбірлігі осыдан да көрінді. Енді Жайыққа қатысты мәселені осы қор арқылы жан-жақты шешуге болатын болды.
Бүгінде табиғат та белгілі дәрежеде адам баласының іс-әрекетіне, күш- қуатына илігеді. Иліккені бар болсын, айнала беріп шамырқана шүйлігеді. Жаратылыстың жөнге көнбей, тосыннан тарпаң қылық танытуы кейде жері бөлек болса да, суы бір ағайынның «ала қойды бөле қырыққанынан» да болып жатады. Жерге шекара сызығын салу оңай болғанмен, атасы сұйық суды апшыру шартты ұғым. Қармағанда қолға ілікпейтін ауа мен шарлағанда ізің қалмайтын су меншіктегенге де мойынсұна бермейтін өзгеше құбылыс. Сондықтан шекаралық өзендерге келгенде көршілес елдер өзгеше саясат ұстануы керектігі осындайда білінеді.
Мәселен, бастауын Ресейден алатын Жайықтың суының тартылып, ескі арналарының бітелуіне, экологиялық жағдайының бүлінуіне жоғары жақтағы көршілерден келіп жатқан кесепаттың аз еместігі талай айтылды. Түптеп келгенде, киелі судың шайырланып барып, ортақ айдынға лоқсып төгілуі талай елдерге, соның ішінде Ресейге де ортақ Каспийдің сапасына, табиғи байлықтарына нұқсан келтіріп, түпкі зардапты елдер бірге тартуына соқтырады. Жайықта балық азайса, бұрын теңізден шығып, Ресей аумағындағы тау қайраңдарына дейін жететін аса бағалы қызыл балықтың бүгінде Индерден аса алмай, уылдырығын еркіндеп шаша алмай тапшыланып бара жатса, бұған екі ел де кінәлі. Ресей суды бөгеп, Жайықтың бастауына Ирклин тәрізді су қоймасын жасап, шүмектен бір қысса, «зардабы басқаға» деп зауыттарының қалдығын өзенге жөнсіз төгіп, бүлдіріп тағы бір кесепат жасады.
Қазақстандықтар жағы Жайыққа Каспийдің балығының еркін өтуіне бөгет жасап, табиғи өрісін шектеп, бағалы балықты жолортадан қайырғандарын оны қорғағандыққа балады. Шынтуайтына келгенде, қызыл балықты еркіндігіне жіберсе, Жайықтың тау жыныстарына апарып, таза суға шашқан уылдырығы мыңдаған шақырымды қамтитын өзеннің өн бойы мен жыра-жықпылы, сай-саласына дейін таралып, табиғи өсімі көбейіп, аулағанға азаймайтын табиғи айналымына түспес пе еді?! Әйтпесе, қызыл балық тек Каспий үшін жаралған тіршілік емес. Жайық суының тайызданып, жазғытұры өзен бойлап өрге талпынатын су асты «серкелерінің» тұмсығының жасанды тосқауылдарға соғылып, қанатын жазып қалықтай алмағаны олардың Жайық бойындағы жайлы мекендерін құтынан айырды.
Жоғарыдағы ағайыннан біз Жайықтың балығын қызғанбайық, олар суын қызғанбасын. Көктемде көк теңізден шығып, алды көгілдір тау етектеріне дейін барған текті балықты әрлі-берлі шекара асатын ортақ ырыс деп ұғынайық. Көктемде уылдырық шашар кезде қызыл балықты қорғауды бұрынғы кеңестік замандағыдай екі елдің табиғат, балық қорғаушыларының бірлескен қамқорлығына көшірген жөн болар. Ол үшін ендігі жерде мәселені ортақ шешетін қор да құрылғалы жатыр ғой.
Алып балықтар осы күні бұл жақта жоқ. Ертеректегі жылдары өзенде осындай балықтар қыстап қалатын терең ұймалар болыпты. Ол ұймалар қазір де болғанымен, онда қыстайтын мұндай тым ірі балықтар емес. Бірақ өзен жағалауларындағы қайраңдарда алып балықтардың адам таңқаларлық зор қаңқалары, ірі сүйектерден қалған ақықтар әлі күнге көрініп жатады. Тау жыныстарының арасындағы мөлдір бұлақта жаралған текті тұқымның теңіздегі төркіні майдаланып кеткендей. Әттең олардың бүгінде атажұртына жете алмайтыны, алыптай бұлқынып өсе алмайтыны өкінішті!
Айтса айтқандай, бекіре тұқымдас балықтардың бүгінде тапшыланып, шабақтары инкубатордағы балапандай тоғандарда көбейтіліп, табиғи өсімнен шектеліп отырғандығы ойландыратын жай. Ырыс-құтын тел еміп отырған ару Жайықты қос мемлекет бір атаның баласындай әлдилеп, өзегін аршып, суын толтырып, кемеріне келтіріп шалқытып отырса, төңірегіндегі экожүйе бабына түскені өз алдына, айдынында кеме, су астынан өзеннің киесі, табиғаттың тірі «сүңгуір қайықтары» – бекіре тұқымдастар жортып жатпас па еді, киелі өзенді қоныстанған жұртының игілігіне айналмас пе еді деп те қиялға батасың. Әтпесе, тек теңізде өсіп, бағасы төтен аспандап, атақоныстың емес, бірте-бірте қалталы ағайын мен шет жұрттың ғана игілігіне айналып бара жатқан балықтың тағдыры алаңдататын күйде. Ақ Жайық, қазақтың Абайдан кейінгі теңдесі жоқ ойшыл ақыны, Ақжайық атырабының дана перзенті Қадыр Мырза Әлінің «... сенің орның алабөтен» деп жырға қосқан Жайығы аман болса, қарын да, көңіл де тоқ! Ақжайықты аялайық!
Аманкелді ШАХИН, ақын, Қазақстан Жазушылар одағының мүшесі.
Тәуелсіздік таңы тудырған театр
Тәуелсіздік таңы атып, өз жоғымызды түгендей бастаған 1991 жылдардан Оралда қазақ драма театрын ашу мәселесі қайта-қайта көтеріліп, ұлт зиялылары өнер ошағын құруды талап ете бастады. 1993 жылы Мәдениет министрлігінің жолдамасымен Орал қаласына 15 кәсіби маман шақырылды. Театрдың бас режиссері Ж.Есенбеков – Қарағандыдан, режиссер Е.Жылқышинов – Арқалық театрынан, Қазақстан Республикасының еңбек сіңірген әртістері – А.Сұлтанғалиев пен Г.Жақыпова Атыраудан, Ш.Есенғұлова мен Қ.Есенғұлов Жезқазған театрынан, әртістер – Х.Нұғманова мен М.Ахманов (Талдықорған), Т.Есенғалиев (Шымкент), С.Сембаев (Атырау), Т.Имашев (Орал), С.Әуелбаев, Г.Әбішева осы облыстың Жаңақала ауданынан жиналды. Б.Молдабаев, А.Жүгінісова, Ж.Тілекқабылов осы жылы Алматыдағы Т.Жүргенов атындағы театр және көркемсурет институтын бітіріп келді. Театр директоры болып Қазақ-стан Республикасының еңбек сіңірген әртісі А.Сұлтанғалиев тағайындалды.
Театр шымылдығын М.Әуезовтің «Қарагөз» трагедиясымен ашу ұйғарылып, режиссер Ж.Есенбеков дайындыққа кірісіп кетті. Театрға берілген бұрынғы жөндеу зауытының Мәдениет үйін қайта жөндеу репитициямен бірге қатарласа жүріп жатты. Жаңа театрдың ашылу салтанатында әртістердің барлығы да сахнада өнерін көрсету үшін өзбек драматургі Ш.Башбековтің «Шойын қатын» комедиясы қоса дайындалды. Ол қойылымның режиссері Елкен Жылқышинов болды.
1993 жылғы 16 желтоқсанда, дәл ұлық мереке Тәуелсіздік күнінде М.Әуезовтің «Қарагөз» трагедиясымен театр шымылдығы ашылды. Жиналған халық театрға сыймай, сыртқа дастарқан жайып тойлады.
Театрдың ашылған күні тұп-тура Тәуелсіздік мерекесімен бір күнге келуі де тегін емес деуге болады. 1996 жылы желтоқсан оқиғасының он жылдығына арнап қойылған С.Асылбековтің «Бір түнгі оқиға» қойылымы 1998 жылы Тараз қаласында өткен VI республикалық театр фестивалінде Бас жүлдені жеңіп алды. Бұл құрылғанына бес-ақ жыл болған Батыс Қазақстан драма театрының алғашқы фестивалі және алғашқы жеңісі еді...
2002 жылы қыркүйек айында Орал қаласында жаңа театр ғимараты салынып пайдалануға берілді. Оның ашылу рәсіміне Елбасы Нұрсұлтан Назарбаев қатысып, тұсауын өзі кескені барша батыс-қазақстандықтар үшін үлкен мерей болған еді. Осы бір қуанышты сәт кезінде алыстан ат терлетіп арнайы келген қазақ театр өнерінің патриархы, майталман режиссер, марқұм Әзірбайжан Мәмбетовтің: «Менің түсінігімде бұл бұрынғы кеңестік кеңістіктің ізіндегі бой көтерген тұңғыш ұлттық театр ғимараты», дегені де ұмытыла қойған жоқ.
2003 жылы қыркүйек айында Орал шаһарының нақ орталығына орналасқан өнер ордасы еліміздің 13 кәсіби театрын қабылдады. Махамбет Өтемісұлының 200 жылдық мерейтойына арналған ХІ республикалық театрлар фестиваліне Иран-Ғайыптың «Махамбет» трагедиясымен қатысқан Орал театры бірінші орынды иеленді.
…Әрине, қазіргі Батыс Қазақстан облыстық қазақ драма театрын сонау отызыншы жылдары ашылған театрдың жалғасы деп айту қиын. Өйткені, көне театрдың дәстүрлі жолы, сабақты инесі бүгінгі күнге жеткен жоқ. Алайда, сол кезде қазақ театры шаңырағының уығын өз қолымен қадаған аға буын өнер шеберлері жөніндегі деректерді түгендеу, ең алдымен, қазіргі қазақ театрының парызы.
Бүгінде облыстық театр сахнасында тұтас ансамбль құрай алатын әрі актерлік шеберліктері шыңдалған 40-қа жуық әртіс қызмет етеді. Олардың қатарында өнерін халық мойындаған Мемлекеттік сыйлықтың лауреаты, Қазақстанның еңбек сіңірген әртісі, режиссер, кино және театр актері С.Қажымұратов, Қазақстанның еңбек сіңірген қайраткері Қ.Асқарова, актриса Г.Шынтемір, Қазақстанның мәдениет қайраткері Б.Молдабаев, әртістер Б.Исалиева, М.Бектенов, Т.Матаев, Б.Жақыпова, Е.Есендосов, Э.Мақашева, Қ.Амандықов, С.Әбуов, Н.Жұбатова сынды сахна жүйріктерімен бірге, көздерінде от ойнар М.Кенжетаев, Н.Сейітмаханбетов, Д.Омаров, Н.Шадыева, Т.Мутиғуллина, Е.Тазболатов сынды жастар да бар.
Театр соңғы он жылда екі рет шет елдерде (VІ Дүниежүзілік театрлар фестивалі, «Қорқыт» (реж. Қ.Қасымов), Каир, 2005 ж., М.Чехов атындағы халықаралық театр фестивалі, «Зоопарк» (реж. А.Маемиров), Риджфильд (АҚШ), 2009 ж.) табысты өнер көрсетті. Ал 2008 жылы Ақтау қаласында өткен ХVІ республикалық Қазақстан театрлары фестивалінде режиссер Мұқан Томановтың «Калигула» қойылымы «Ең үздік дебют» аталымын жеңіп алды. Сол жылы театрда балалар қойылымына арналған кіші зал ашылды. Қазірде театр қоржынында ең кішкентай көрермендерімізге тарту етілген 20-ға жуық ертегі бар.
Осы жылдың маусымында театр Қырғызстан халық суретшісі, сол елдің еңбек сіңірген өнер қайраткері, Ш.Айтматов атындағы халықаралық сыйлықтың лауреаты Маратбек Шарафидиновтің 60 жасқа толуына орай ұйымдастырылған театрлар фестиваліне қатысып келді. Театр ұжымы қойған Шекспирдің «Ромео мен Джульетта» трагедиясы театр сыншыларының жоғары бағасын алды. Театр директоры Құжырғали Төлеуішев пен кәсіби актер Боранбай Молдабаевқа «Қырғыз Республикасының өнер қайраткері» төсбелгісі табыс етілді.
Күні бүгінге дейін театрда 100-ге жуық қойылым сахналанды. Оның 40-тан астамы репертуарда жүреді.
Орал театры, расында да, Тәуелсіздік тудырған театр. Елу жылдай өз жерінде отырып, өзге ұлттың театрына телміріп келген қазақ жұрты үшін бұл шаңырақтың ашылуы өлгені тіріліп, өшкені жанғандай ерекше оқиға болды. Содан бергі 18 жылда театр өз мақсатына адал, көрерменіне көздің қарашығындай ыстық күйінде киелі сахна өнерінің туын түсірмей келеді.
Құжырғали ТӨЛЕУІШЕВ, облыстық қазақ драма театрының директоры.
Суретте: Батыс Қазақстан облыстық қазақ драма театры ғимаратының сыртқы көрінісі.
А
йқара беттердің материалдарын дайындаған «Егемен Қазақстанның» Батыс Қазақстан облысындағы меншікті тілшісі Темір ҚҰСАЙЫН, суреттерді түсірген Александр Куприенко.