Осы орайда Шымкент қаласының №89 мектеп-лицейі оқушылардың танымдық қабілетін дамыту, білім сапасын арттырумен қатар ақыл-ой шығармашылық белсенділіктерін жетілдіру, жеке пәндерді оқытудың тиімді әдіс-тәсілдерін іздестіруде ілкі қадамдарға бай білім ордасы деуге болады.
Елбасы әр Жолдауында заман талабына сай білім беру қоғам мүшелерінің адамгершілік, интеллектуалдық, мәдени дамуының жоғары деңгейін және кәсіби біліктілігін қамтамасыз етуге бағытталған тәрбие беру мен оқытудың үздіксіз үрдісі екендігін айтып келеді. Аталған лицей шәкірттердің ішкі әлеуеті мен сыртқы мәдениетін үйлестіруде жоспарлы жұмыс жүргізуде. Бүгінде тәрбие мен тәжірибені ұштастырып келе жатқан лицейдің жемісті жетістіктерінің бірқатары айта кетерлік мәнге ие.
Алдымен, мұғалім шеберлігінің негізгі көрсеткіші – методика саласындағы ғылыми жаңалықтар мен алдыңғы қатарлы озық тәжірибені жетік игеру. Әрине ізденіс нәтижесінде жүзеге асатын тиімді оқыту әдісі оқушылардың ғылыми негізде ынтасын арттыруға мүмкіндік береді. Бұл ретте №89 мектеп-лицейі математика және жаратылыстану пәндері бойынша электив, үйірме сағаттарын ұйымдастырып, оқушыларды ғылымға баулу жолға қойылған. Ең бастысы, жаңа оқу жылының алғашқы аптасында әр айда өтетін интерактивті сабақтар кестесі жасалып, барлық бірлестік мұғалімдері бекітілген кесте бойынша флипчартпен сабақ өтеді. Мұғалімдер онлайн әдіс-тәсілдерді Plikers, Kahoot, Bilim land тапсырмалары арқылы оқыту, жаңа сабақтарды Tarsia, Smart бейдж, сематикалық карта көмегін қолдана отырып дәріс өткізудің оқушыға оңтайлы екендігін айтады. Интерактивті сабақтармен 1-11 сынып оқушылары толық қамтылып, үздік сабақтарды жинақ қылып шығару ұстаздардың сапалы жұмыс істеуіне жол ашады. Сапалы сабақтар өз кезегінде нанымды нәтижелермен лицей атын республика көлеміне танытып отыр. Қазірге дейін мектеп-лицей бойынша 450 оқушы ғылыми жұмыспен айналысса, оның 95-і үш тілде қорғалған. Бұл жерде оқушыларға ғылыми жетекшілік жасаған мектеп ұстаздарының «Экологиялық орталық» мамандары, сондай-ақ алтауы ғылым кандидаты екенін айта кеткеніміз жөн.
Сонымен қатар бірегей білім ошағы оқушылар мен ұстаздардың білім-білігінен бөлек, қоғамдық жұмыстарды жүзеге асырады. Айталық, былтыр Шымкент қаласын гүлдендіру мақсатында қалалық әкімдік, мешіт, қарттар үйі, мектеп пен балабақша сияқты маңызды нысандардың алдына 25 мың дана гүл көшеттерін отырғызуды қолға алған. Биылғы оқу жылында да Шырайгүлдің 11 мың, 2 мың Тагис, Канна гүлінің 2 мың данасын, сондай-ақ жарқырауық Сальвияның 500 данасын қаланы абаттандыру үшін тарту етті. Мұның бәрі қыруар еңбекпен жүзеге асқан жұмыс екені айтпаса да белгілі.
Ең бастысы, аталған көшеттер биология пәні бойынша мемлекеттік жалпыға міндетті білім беру стандарты негізінде лицей мекемесінің ауласындағы оқу тәжірибе алаңында өсірілген. Алаң жұмысы 2012 жылдан бері жолға қойылған. Демеушілер көмегімен құрылған 300 шаршы метр жылыжайда «Терек ағашын вегативті көбейту жолдарын зерттеу», «Раушан гүлін вегативті жолмен көбейту», «Шырайгүлді өсіріп, баптау», «Биогумус дайындау», «Телу және ұластыру», «Емдік қасиеті бар өсімдіктерді зерттеу», «Тұқымнан жеміс ағаштарын көбейту» жұмыстарын да №89 мектеп-лицей оқушылары қолдарына алған. Онда үйірмеге қатысқан оқушылар бақылау, зерттеу жұмыстарын жүргізіп, теорияны практикамен, ғылыммен ұштастырады. Аталған тәжірибе алаңы оқушылар бойында білім мен экологиялық құзыреттілік қалыптастыра отырып, Шымқаланы гүл қалаға айналдыруда әлі де көптеген жұмыстар атқармақ.
Мемлекеттің «Қазақстанның әлеуметтік жаңғыртылуы: Жалпыға Ортақ Еңбек Қоғамына қарай 20 қадам» бағдарламасы мен мектеп оқушыларының функционалдық сауаттылығын дамыту жөніндегі 2012-2016 жылдарға арналған ұлттық іс-қимыл жоспары аталған мектеп-лицейде оңтайлы шешімін тапты.
Білікті басшы Қасымбай Өмірбекұлы басқаратын лицей оқушылары жоғарыдағы жемісті жұмыстардың нәтижесінде халықаралық, республикалық, облыстық, қалалық түрлі байқауларда үнемі жеңімпаз атанып жатады. «Біздің балаларымыз бен немерелеріміз бабаларының игі дәстүрін сақтай отырып, қазіргі заманғы нарықтық экономика жағдайында жұмыс істеуге даяр болуы керек. Олар бейбіт, жылдам өркендеу үстіндегі әлемге әйгілі әрі сыйлы өз елінің патриоттары болады. Сондықтан адамның жан-дүниесін рухани байытатын қасиетті бағалатуда әрқашан жаңашылдықты тарихпен, табиғатпен ұштастыруды мақсат етеміз», дейді мектеп директоры Қ.Атабаев.
Шынымен де жаңа адамды тек жаңашыл ұстаз ғана тәрбиелей алады. Өнерлі адамның талабын өнегелі ұстаз ұштауы керек. Сонда ғана жастар болашағының шоқтығы биік болмақ.
Фарида БАЙЫРБЕКОВА,
№89 мектеп-лицейдің қазақ тілі мен әдебиеті пәнінің мұғалімі
ШЫМКЕНТ