Айта кету керек, қан орталығы заманауи жабдықтармен қамтамасыз етілген. Медициналық мұздатқыш камералары, фармацевтикалық тоңазытқыштар, зертханалық жабдық, кептіргіш шкаф, термостат, бу стерилизаторы, зертхана жиһазы, таңу үстелдері және т.б. «Инфо-донор» атты компьютерлік бағдарлама жұмыс жасап тұр.
Маңғыстау облысы қан орталығы қан дайындау бөлімінің меңгерушісі Гүлнафис Кунашева қан тапсырып тұру адам ағзасына пайдалы екенін айтады. Әсіресе, қан-тамырлар ауруына шалдықпауға септігін тигізеді және қан қысымын төмендетедін көрінеді. Жалпы қан орталығына үнемі донор қажет екендігін бірі білсе, енді бірі біле бермейді. Бұл ретте мамандар әрбір азаматты қан тапсырып тұруға шақырады.
-Дәрігерлер әрбір донор туралы толық ақпарат білуі тиіс. Қан тапсырып тұру – адам ағзасына пайдалы. Сондықтан да қан бер де - жан бітір деген бастаманы құптайтындар көп болса деген тілегіміз бар. Бүгінде облыс бойынша қан қоры жеткілікті. Барлық мекемелерді қажетті қанмен қамтамасыз етіп отырмыз. Өңірдегі жалғыз қан орталығы емдеу-сауықтыру мекемелерінің сұраныстарын толық қамтып үлгерудеміз. Жасыратыны жоқ, соңғы кездері ерікті донорлар саны азайып кетті, дейді ол.
Донорлық қан тапсыру процедурасы арқылы адам ақысыз түрде зертханалық талдау жасайтын мүмкіндік бар. АИТВ, мерез, гепатиттің түрлері, гемоглобин көрсеткішін, эритроцит, лейкоцит және де қан тобы мен резус тәуелділікті анықтап алуға болады.
Донорлық арқылы жүрек пен қан тарату тамырлары, иммундық және тамақ қорыту жүйелері, ұйқы безі және тағы да басқа ағзалары тиімді жоғары жұмыс жасайды, денсаулығын жақсартады. Сонымен қатар қан жоғалту иммунитетті түсірмейді, керісінше жаттықтырады, зат алмасуын күшейтеді және де ағзаның жұмысын жақсартады.
Мәселен Ақтау қаласының тұрғыны Мақсат Бекмұратов осымен үшінші рет қан тапсырып отыр. Оның айтуынша, қан тапсыру оның денсаулығына пайдалы екенін сезінген. Донорлық ағзаның қан-айналымын реттеп, иммундық жүйені нығайтатыны туралы дәрігерлерден сұрап білген. Осылайша, ол өзінің тек қана төтенше жағдайларда ғана емес, дертке шалдыққан адамдарға қан тапсыру арқылы олардың өмірін құтқаруға пайдасының тигенін қалайды және донорлық қан тапсыру – азаматтық парызым деп біледі.
-Осымен үшінші рет келіп, қан тапсырып отырмын. Анам да, апам да - дәрігер. Олардың айуынша, егер адам жиі қан тапсырып тұрса қан қысымы жоғарыламайды және көптеген аурудың алдын алуға көмектеседі. Мен тапсырған қан біреуге пайдасы тиеді деп үміттенемін. Алдағы уақытта тағы да қан тапсырып тұратыныма сенімдімін, дейді ол.
