Медицина • 30 Қыркүйек, 2020

Жедел көмек көрсететін дәрігерлер даярлайды

22 рет көрсетілді

Елімізде әсіресе вирусолог, инфекционист дәрігерлер жетіспейді. Бұл мәселе төңі­регінде Семей өңіріне жұмыс сапарымен келген Парламент Сенатының де­пу­таттары сөз қозғады. Со­нымен қатар сенатор­лар мектептердегі қашық­­­тан білім беру форматы­ның тиімділігін, медициналық кадрларды даярлау және коронавирустың екінші тол­қынына дайындық барысын көрді.

Инфографиканы жасаған Қонысбай ШЕЖІМБАЙ, «EQ»

 

Семей медициналық универ­ситетінде болған Парламент Сена­тының депутаттары елдегі медицина кадрларының тапшылығын талқыға салды. Мәселен, пандемиямен күрес кезінде әр өңірге білімді-білікті дәрігерлердің қажет екеніне көз жетті. Бұл туралы Президент Қасым-Жомарт Тоқаев Қазақстан халқына Жолдауында «Пандемия туындатқан дағдарыс бізді көп нәрсеге үйретті. Мәсе­лен, дәрігердің еңбегін бағалай бі­летін болдық. Бір кезде медицина қызметкерлерінің мемлекет назарынан тыс қалғаны рас» деген еді. Сондықтан да Сенат депутаттары сұранысқа ие мамандарды даярлау, білім беру гранттарының деңгейін назарға алу сынды ұсыныстарын айтты. 

– Семей мемлекеттік медици­налық университетінің базасында білікті дәрігерлердің, оқытушы-профессорлық құрамның барын көрдік. Бірақ біздің елімізде 4 мыңға жуық дәрігер жетіспейді. Әсіресе инфекционистер, вирусо­лог мамандар қат. Осыған байланысты тиісті мамандықтар мен кафе­драларды ашу қажет, – деді Сенаттың Әлеуметтік-мәдени даму және ғылым комитетінің төрағасы Мұрат Бақтиярұлы.

Індеттің екінші толқынына төтеп беру үшін алдыңғы қатарда жүретін мамандардың біліктілігін арттыру туралы да ұсыныстар айтылды. Елдегі және әлемдегі санитарлық-эпидемиялық жағ­дайға байланысты алда тұрған жауапты міндеттер талқыланды. Медициналық университет маман­дарының айтуынша, пандемия кезінде инфекционистер мен вирусологтардың ауадай қажеттігі байқалған. Қазіргі таңда еліміз үшін сұранысқа ие мамандықтар тізімі ескеріліп, инфекционистер, реаниматологтар, пульмонологтар, кардио­логтар оқытылып жатыр. Сонымен қа­тар аталған оқу орны еліміз­де бірінші болып шұғыл көмек көр­сету дәрігерлерін қайта даярлауды қолға алған.

Кездесу барысында депутат­тарға оқу орнының қызметкер­лері мен студенттеріне қыз­мет көрсету орталығының мүмкін­діктері көрсетілді. Мұнда бір те­резе қағидаты бойынша, әрбір қыз­­­меткер немесе білім алушы, қе­ректі анықтамалар немесе ке­ңестер ала алады. Қажетіне қа­рай мемлекеттік қызметтер де көр­сетіледі. Жағдайға байланыс­ты бұл қызмет түрлерін онлайн ре­жім­­де көрсетуге де толық мүм­кін­­дік бар.

Университеттің академиялық жұмыс департаментінің дирек­торы Айгүл Жүнісова оқу орда­сының қызметі, жетістіктері мен стра­тегиялық жоспары туралы баян­дады.

– Семей медициналық уни­вер­ситеті республикадағы медици­налық жоғары оқу орындары арасындағы рейтингте бірінші орында тұр. Студенттердің прак­тикалық дайындығы үшін университет құрамына жекеменшік университеттік госпиталь, радиа­циялық медицина және экология орталығы кіреді. Сондай-ақ Өскемен және Павлодар қала­ларында университеттің филиал­дары жұмыс істеп тұр, – дейді А.Жүнісова.

Қазіргі уақытта жоғары оқу орнында 5 мыңнан астам студент білім алуда. Оның ішінде бакалавриат, магистратура, докторантура сияқты үш деңгейлі оқытудың толық циклі жұмыс істейді. Оқу­ды тәмамдаған студенттердің бар­лығы дерлік жұмысқа орналасады. Кейбіреуі алыс-жақын шетелдерге де шығып еңбек етеді. Оқу сапасының деңгейін арттыру үшін университет оқытушылары халықаралық тәжірибені енгі­зе отырып, білім беру проце­сін үздіксіз жетілдірумен ай­на­лы­­сады. Мысалы, 2019 жылы Түр­­кияның Башкент универ­сите­тімен бірлесіп жаңа білім беру бағдарламасы енгізілді.

«Артық білім – кітапта». Де­путаттар университеттің кітап қорына да бас сұқты. Мұнда 700 мыңнан астам кітап, ғылыми еңбектер жинақталған. Мамандар кітап қоры үнемі жаңартылып отыратынын тілге тиек етті. Кі­­­тапхана құнды қорға толы бол­­ғанымен, студенттер немесе уни­верситет қызметкерлері қа­ғаз толтырмай-ақ «Адалдық дүкені» жобасы аясында кез кел­ген қажетті әдебиеттерін ала ала­ды. Мұндай әлеуметтік жоба ер­теңгі мамандарды адалдыққа тәр­биелейді деседі ұстаздар.

Бұл оқу орнында білім мен тәрбие қатар беріледі. Соның бір айғағы, пандемия кезінде сту­денттер халық денсаулығы үшін «қызыл аймақтарда» жұмыс істеді. Ал университет корпустары коронавирус инфекциясын жұқ­тырған пациенттерді емдеуге арналған стационарлар құру үшін қайта бейімделді.

Медицина саласын назарға алған депутаттар Семейдің жедел медициналық жәрдем ауруханасында болып, гибридті операция бөлімінің жұмысымен де танысты. Мұнда олар медицина қызметкерлерінің жалақысын кө­теру жөніндегі ойларын ортаға салды.

Қарт қаланың Қарағайлы ша­ғын ауданында болған коми­тет мүшелері күннен күнге көркейіп келе жатқан ауданның даму қар­қынын көрді, көппрофильді мә­дени-спорт кешенін аралады. Кө­не қала көркейіп келе жат­қа­­нымен, денсаулық сақтау саласында бірқатар мәселелерді жоқ­қа шығара алмаймыз деседі депутаттар. 

– Медицина мамандарының жетіс­пеушілігін министрмен бір­лесе отырып талқылаймыз. Кез­де­су 30 қазанға жоспарланған, – деді Мұрат Бақтиярұлы.

Делегация мүшелері Се­мей­­­дегі әлеуметтік нысандар­ды ара­лаған соң Абайдың туған жеріне жол жүрді. Олар Ақ­шоқы, Қарауыл, Қасқабұлақ ауыл­­­дары мен Жидебайда болып, Құнанбай Өскенбайұлы му­зейі­­мен, «Абай-Шәкәрім» мемо­риалдық кешенімен танысты. Де­путаттар Абай ауданындағы әлеу­меттік нысандарды да ұмыт қалдырмады.

 

Шығыс Қазақстан облысы

 

Соңғы жаңалықтар

Фотосуреттің тарихы...

Тарих • Бүгін, 15:00

Поэманы суретпен бейнеледі

Аймақтар • Бүгін, 13:35

Еуропадағы антирекордтар

Әлем • Бүгін, 11:54

Өртте өлген мал саны нақтыланды

Аймақтар • Бүгін, 11:40

Қазақстанда доллар арзандады

Экономика • Бүгін, 11:12

Ұқсас жаңалықтар