Өрттен кейінгі жағдай түзеліп келеді

Құрылыс онлайн режімде бақыланады

Баспана құрылысына арнайы бөлінген 12 гектар аумақта әрқайсысы 100 шаршы метрлік 91 үй салынып жатыр. Әр үйге 10 сотық жер бөлініп, газ, су, электр энергия­сымен қамтамасыз етіледі. Көшелерге асфальт төселеді. Облыс әкімінің бірінші орынбасары Ғауез Нұрмұхамбетовтің айтуынша, ҚазҚСҒЗИ жобалау институты тұрғынжайларды су басудың алдын алу мақсатында геологиялық зерттеу жүргізген. Жаңа салынып жатқан үйлердің іргетасы жерасты суларынан 2,5 м жоғары. 7 қыркүйекте 13 мердігер компания құрылыс жұмыстарына кірісіп кеткен. Бүгінгі таңда 91 үйдің қазаншұңқыры қазылып бітті. 55 үйдің іргетасы құйылып, бірнеше үйге іргетас блоктары орнатылды.

Премьер-Министрдің айтуынша, алаңда орнатылған бейнекамералар ар­қылы құрылыс барысы онлайн режімде бақыланып отыр. Құрылыс жұмыс­тарына Үкімет 2,2 млрд теңгеден астам қа­ра­жат бөлген. Ә.Смайылов мердігер ком­па­ниялардың басшыларымен де әңгі­ме­лесіп, оларға өздеріне тапсырылып отыр­ған міндетті сапалы әрі уақтылы орындап шығу керек екенін қадап тапсырды.

– Қазір әкімдік пен мердігерлердің алдында құрылыс жұмыстарын белгіленген мерзімде, яғни екі айдың ішінде сапа­лы аяқтау міндеті тұр. Бұл мәселе Мем­лекет басшысы мен Үкіметтің ерекше ба­қы­лауында. Сондықтан тапсырмаға аса жа­уап­кершілікпен қарау керек, – деді Үкімет басшысы.

Премьер-Министр одан кейін Әу­лиекөл ауылындағы мектептің жанынан құрылған эвакуациялық пунктке барып, зардап шеккендермен кездесті.

– Тұрғындардың алапат табиғи өрт­тер­дің салдарынан қандай қиын жағдайға тап болғанын білеміз. Осындай қиын сәтте мемлекет шұғыл шаралар қабылдап, бар­лық қажетті қолдауды көрсетті. Бұл жұ­мыс әлі де жалғасады, – деді Ә.Смайы­лов.

Үкімет басшысы өңірге орасан шы­ғын әкелген табиғи апатқа байланыс­ты Президенттің шұғыл шешімдер қа­был­дап, нақты тапсырмалар беріп, жағдайды жеке бақылауына алғанын, сондай-ақ оқиға орнына өзі арнайы келіп, елдің еңсесін көтеріп кеткенін атап өтті.

– Осындай қиын-қыстау кезеңде бос байбаламға салынбай, апат салдарынан туындаған ауыр жағдайда сабырдан аспай, төзімділік танытқандарыңыз үшін алғыс айтамын. Сондай-ақ халқымыздың бірлігін көрсетіп, отандастарына қол­ұшын созған барлық қазақ­стандықтарға да алғыс білдіргім келеді, – деді Ә.Сма­йы­лов.

Кездесу барысында өршіген өрт кезін­де қауіпсіз жерлерге көшірілген тұр­ғындар Үкімет басшысына мемлекеттің дер кезінде жедел шаралар қабылдап, қолдау көрсеткені үшін алғыс айтты.

Өрт сөндіргіш тікұшақтар саны үш есе артады

Облысқа жұмыс сапары барысында Премьер-Министр орталық мемлекеттік органдар мен әкімдік басшыларының қатысуымен өңірдің кешенді әлеуметтік-экономикалық даму мәселелері жөнінде кеңес өткізді.

Жиын барысында облыс әкімі Архи­мед Мұхамбетов, Төтенше жағ­дай­лар министрі Юрий Ильин, Индус­трия және инфрақұрылымдық даму министрі Қайырбек Өскенбаев, Эко­ло­гия, геология және табиғи ресурс­тар министрі Серікқали Брекешев, Ауыл шаруашылығы министрі Ербол Қара­шө­кеев, сондай-ақ Ұлттық экономика вице-ми­нистрі Бауыржан Омарбеков баяндама жасады.

Премьер-Министр жақында Қос­та­най облысында болған орман өрті жергілікті тұрғындар мен инфра­құ­ры­лымға айтарлықтай зиян келтіргенін, өрт кезінде бір зейнеткер қаза тапқанын атап өтті. Осыған байланысты Ә.Смайылов ор­ман шаруашылығы төңірегіндегі құт­­қару қызметін жетілдіріп, қуатты техни­­камен қамту жұмыстарын жүргізу қажет­тігін айтты.

– Тікұшақ техникасының жақын жерден су алып, өртті сөндіруін жеңілдету мақсатында орман алқаптарының жанын­дағы су қоймаларының түбін терең­дету жұмыстарын жүргізу қажет. Біз тікұшақтар паркін үш есе ұлғайту үшін қосымша субүркігіш құрылғыларды сатып аламыз, оларды өрт сөндіру үшін пайдалануға болады. Бұл Қостанай облысын қоса алғанда, барлық өңірлерге қатысты, – деді Ә.Смайылов.

Білім саласын сынға алды

Кеңес барысында Премьер-Министр өңір әкімдігінің білім беру саласындағы кемшіліктеріне де назар аударды. Ә.Сма­йылов өңірдің 7 мектебінде күрделі жөн­деу жұмыстарының аяқталу мерзімінің кешіктірілгенін, соның салдарынан балалар балабақша, мәдениет үйлері мен ауыл әкімдіктерінің ғимараттарында оқуға мәжбүр екенін атап өтті.

– Бұл мәселелерді шешу үшін жедел шаралар қабылдау қажет. Жалпы білім беру саласына жауапкершілікпен қарау керек, балалардың сапалы білім алуы үшін тиісті жағдайлар жасалу керек, – деді Ә.Смайылов.

Экономикалық мәселелер бойынша Премьер-Министр облыс тұрғындарының әл-ауқатын арттыру үшін бүкіл өңірдің әлеуметтік-экономикалық дамуына серпін бере алатын инвестициялық жобаларды іске қосу бойынша жұмыс жүргізу қажеттігін қадап айтты. Бұл – әкімдіктің басты міндеттерінің бірі. Премьер-Министрдің айтуынша, «Қуатты өңірлер – ел дамуының драйвері» ұлттық жобасы және «Ауыл – ел бесігі» бағдарламасы аясында Қостанай облысына 32 ауылдық елді мекенде 75 жобаны іске асыруға 6,7 млрд теңге бөлінген. Жалпы өңірді дамытуға 2022 жылы республикалық бюджеттен 115,9 млрд теңге, сондай-ақ бюджетті нақтылау аясында тағы 31,7 млрд теңге қарастырылған.

– Бұл қаражат ең алдымен әлеу­мет­тік қажеттіліктерге, облыстың инфра­құ­рылымы мен агроөнеркәсіптік кешенін дамытуға бағытталған. Әкімдік аталған қа­ра­жаттың тиімді пайдаланылуын қамта­масыз етуі тиіс, – деді Премьер-Министр.

Ә.Смайылов азық-түліктің жетіс­пеу­шілігі мен бағаның негізсіз өсуіне жол бермеу бойынша жоспарлы жұмыс жүргізу қажеттігіне де назар аударып, әкімдікке осы бағытта қолданыстағы тетіктерді пайдалануды жандандыруды тапсырды. Сонымен қатар өңір экономикасын одан әрі әртараптандырудың маңыздылығына тоқталды. Мәселен, 2022 жылы облыста құны 38 млрд долларға жуықтайтын 45 жаңа жобаны іске қосу жоспарланған.

– Инвестициялық жобаларды іске қосу жаңа жұмыс орындарының ашылуына септігін тигізеді. Облыс әкімдігі инвесторлар үшін барлық қажетті жағдайды жасау және белгіленген жобаларды уақтылы іске қосу жөніндегі жұмысты жалғастыруы керек, – деді Ә.Смайылов.

Жиын соңында Премьер-Министр жы­лумен жабдықтау жобаларын іске асыруға қаражат бөлу мәселесін пысық­тауды, «Қостанай-Денисов» көлік жо­лын реконструкциялау жөніндегі жоба­ны уақтылы қаржыландыруды қамта­ма­сыз етуді, 2022 жылдың соңына дейін жергілікті маңызы бар жолдардың жағда­йын жақсарту жөнінде шаралар қабылдауды тапсырды.

Бұдан өзге, Үкімет басшысы өңірде алдағы уақытта көпфункционалды меди­циналық мекеме болып ұлғайты­латын жаңа перинаталдық орталық салу мәселесін, Әулиекөл ауданының «Дос­тық» балалар мәдени жазғы сауықтыру кешенін қалпына келтіру үшін қаражат бөлу, сондай-ақ Тобыл қаласында емхана құрылысын қаржыландыруды және басқа да бірқатар мәселені пысықтауды тапсырды.

Қостанай облысы