Мазмұнды музыка кешінде театр солистері, Astana Opera Халықаралық опера академиясының тыңдаушылары және облыстық филармониялардың шақырылған әртістері, атап айтсақ, Қазақстанның еңбек сіңірген әртісі Шолпан Дүкімбаева (Көкшетау), Қазақстанның еңбек сіңірген әртісі, мәдениет қызметкері Нұрияш Оспанова (Атырау), маэстро Марат Әйтімов (Ақтөбе) бастаған талантты музыка майталмандары өнер көрсетті. Көрермен назарына дарынды әртістердің орындауында Күләш Байсейітованың репертуарынан әсем де әуезді әндер ұсынылды.
Концерт ажарын ашқан сондай бірегей орындаудың бірі – Қазақстанның еңбек сіңірген әртісі Ғалия Байғазинова әуелеткен әнші репертуарындағы әсем әндер келген көрерменнің құлақ құрышын қандырды.
– Мен үшін бұл концерттің маңызы өте зор, оған асқан жауапкершілікпен дайындалдым. Шығармашылық жолымда Күләш Байсейітованың репертуарындағы «Қыз Жібек» операсындағы әйгілі партиясынан бастап барлық әндерді айтып шықтым. Сондай-ақ аңызға айналған әнші бірнеше мәрте шырқаған поляктың халық әнін Польшада таныстырдым. Бұл музыкалық шығармалардың барлығы маған өте қымбат, себебі жаныма ыстық естеліктер солармен байланысты. Ал әншінің талантты ғұмыры біз үшін қашанда ғұмырлық тағылым, деп тебірене толғанды әнші.
Еске сала кетсек, қазақтың бұлбұлына арналған керемет кештің негізгі ұйымдастырушысы – «Қазақстан вокалистер одағының» құрылғанына биыл 5 жыл толады. Оның төрағасы – «Астана Опера» опера труппасының директоры, Қазақстанның еңбек сіңірген қайраткері Азамат Жылтыркөзовтің бастамасымен одақ еліміздің түкпір-түкпіріндегі орындаушылардың басын біріктіріп, вокал өнерін насихаттауға қомақты үлес қосып келеді.
– «Вокалистер одағы» республикалық ұйым болғанымен, оның географиясы уақыт өте келе кеңейіп, халықаралық бірлестік деңгейіне көтерілді деуге болады. Қазіргі таңда оған 100-ден астам адам мүше. Олардың барлығы кәсіби білікті вокалистер. Мен де осы бірлестіктің құрамындамын, онда аға буын мен жас музыканттар да жемісті еңбек етуде. Жас буын бізбен кеңесіп, осылайша тәжірибе алмасамыз. Бірнеше рет «Вокалистер одағының» концертін өткіздік. Осы ретте бірлестік төрағасы Азамат Жылтыркөзовтің елеулі еңбегін атап өткім келеді. 2020 жылдан бастап «Вокалистер одағы» айтулы даталарға орай дарынды әншілерді Күләш Байсейітова атындағы медальмен марапаттауды қолға алды. Мұндағы негізгі мақсат қазақ операсының негізін қалаған Күләш Байсейітованың есімін дәріптеу болып табылады. Өзін әншілік жолда сынап жүрген өнерпаздар үшін бұл шынымен де жоғары марапат, – деп атап өтті Қазақстанның еңбек сіңірген қайраткері, пианист Раушан Бескембирова.
Бұған дейін «Вокалистер одағы» Бибігүл Төлегенова, Хорлан Қалиламбекова, Қанат Омарбаев, Шахимардан Әбілов, Барсег Туманян, Ева Мартон секілді атақты қазақстандық және шетелдік опера әншілерін осы медальмен марапаттаған болатын. Олардың барлығы да аталған бірлестіктің мәртебелі мүшесі. Сондай-ақ Үлкен театр солисі, Ресейдің еңбек сіңірген әртісі Павел Черных пен басқа да танымал шетелдік әртістер одақ мүшелері атанғанын айта кеткеніміз жөн.
Ал қазақ операсының аңызы, бұлбұл әнші Күләш Байсейітоваға арналған бүгінгі кеш шын мәнінде тұлғаның өнердегі тағылымды жолын дәріптеуге арналған тамаша шығармашылық шарықтау болғаны сөзсіз. Әнші ізін жалғар қазақтың талантты ұл-қыздары мен талғампаз тыңдарманы барда Күләш Байсейітова есімі әсте өшпейді. Ғасырды ғасырға жалғап Бұлбұл әуезі мәңгі шырқала бермек. Көрермен көңілін серпілткен «Күләштің әні» жобасы соның айқын дәлелі.
