Ольга Перепечина форумда сөйлеген сөзінде әйелдердің экономикалық әлеуетін дамыту, зорлық-зомбылыққа қарсы күрес және Еуропалық одақпен ынтымақтастықтың басымдықтары туралы айтты. Депутат Орталық Азия әйелдерінің диалог тұғырнамасының маңыздылығына тоқтала келе, алаңның Қазақстандағы жұмысының нәтижелерін атап өтті.
«Қазақстанның демографиялық құрылымында әйелдер халықтың 51 пайызын құрайды. Еңбек нарығындағы әйелдердің үлесі шамамен 48 пайыз болып отыр. Бүгінде біздің республикамызда білім беру, денсаулық сақтау және әлеуметтік қорғау саласындағы жалдамалы қызметкерлердің 70 пайыздан астамы әйел. Жалпы, гендерлік теңдік саласындағы халықаралық рейтингтерде біздің еліміз ілгерілеудің оң үрдісіне ие. Сондай-ақ Президенттің тапсырмасы бойынша мемлекет қатысатын компаниялардағы басшылық лауазымдарға әйелдердің 30 пайыз өкілдігін енгізу әйелдерді саяси ілгерілету бағытындағы маңызды қадам болды», деді Ольга Перепечина.
Сенатор Мемлекет басшысы Қасым-Жомарт Тоқаевтың гендерлік саясатты іске асыру мәселелеріне баса назар аударып отырғанын атап өтті. Сенатор Отбасылық-демографиялық және гендерлік саясат тұжырымдамасы 2016 жылы қабылданғанын, ал 2021 жылы Президенттің тапсырмасы бойынша маңыз берілгенін хабарлады.
«Биылғы маусым айында Қазақстан Президенті Қасым-Жомарт Тоқаевтың тапсырмасы бойынша Орнықты даму саласындағы мақсаттар мен міндеттерді мониторингілеу жөніндегі парламенттік комиссия құрылды. Комиссияны Сенат төрағасы Мәулен Әшімбаев басқарады. Парламент орнықты даму мақсаттарын іске асыру мәселесін өз бақылауына алды, оған гендерлік теңдікті қамтамасыз етуге және барлық әйелдер мен қыздардың құқықтары мен мүмкіндіктерін кеңейтуге бағытталған 5 мақсат кіреді», деп атап өтті депутат.
Форум барысында қатысушылар әйелдердің экономикалық әлеуетінің өсуі, гендерлік зорлық-зомбылыққа қарсы күрес, гендерлік теңдік саласындағы заңнаманы жетілдіру, климаттың өзгеруі, сондай-ақ ЕО-мен парламенттік ынтымақтастық секілді тақырыптарды талқылауды жоспарлады.
