Жыл сайын мемлекеттің, Ел басшысының қолдауымен Ауған соғысының ардагерлеріне қолдау көрсетіліп келеді. Нақты айтқанда, бес отандасымызға Кеңес Одағының Батыры атағы берілді, 1 адам Халық Қаһарманы атанып, екі азамат «Айбын» орденінің иегері атанды, жүздеген азамат бұрынғы КСРО және Қазақстан Республикасының ордендерімен және медальдарымен марапатталды.
Денсаулық сақтау министрлігі де өз тарапынан Ауған соғысының шиеленісінде шираған ардагерлерімізге барынша қызмет көрсетіп отыр. Маусым сайын соғыс ардагерлеріне арналған республикалық клиникалық госпиталінде Ауған ардагерлері де тұрақты түрде сапалы ем қабылдайды. Емханада ардагерлеріміздің жан саулығы мен тән саулығын сақтауға барлық жағдай жасалған.
«Amanat» партиясының «Ардагерлерді ардақтайық» жобасы аясында жақында министрлік пен госпиталь ұжымының ұйымдастыруымен Ауған соғысына қатысқан жауынгерлердің құрметіне орай «Ауғанның асуында от кешкендер» атты кеш өтті. Тарихи тағылымы мол іс-шарада еліміздің әр өңірінен келген ардагерлер бас қосып, өткен күннің естеліктеріне үңілді, тәуелсіздік тарту еткен бейбіт күннің берекесіне бой жылытты. Бар аймақтан келген ардагердің басы біріккен салтанатты жиынды Ұлттық қауіпсіздік комитетінің Шекара академиясы әскери оркестрі рухты әуен, әсем сазбен көмкерді. Ауыр аманат арқалап, өмір мен өлім қайшыласқан қанды шайқасқа қатысқан Марат Мажитов, Алик Атықанов, Мұрат Абдушукуров, Байдәулет Дәркенбаев, Алмасбек Айдарбаев, Болат Сайлан, Жұмат Құнанбай, Дүйсен Мағұлұмов, Марат Сайбеков, Бақыт Тақырбасов, Алтынбек Танабаев, Валерий Перминов, Наурызбай Айдабосын, Махат Смақов сынды ардагерлерге Алғысхат және бағалы сыйлықтар табысталды.
Госпиталь басшысы Гаухар Тазабекқызы майдангерлердің биік болмыс, мәрт тұлға, батыр бейнесі жайлы айта келіп: «Ауған соғысы ардагерлерінің жүріп өткен жолы, ерен еңбегі, көрсеткен ерлігі – бүгінгі ұрпақ білуі керек тарих беттерінің бір парағы. Бұл тарихи күннің мән-маңызы тым тереңде жатыр. Сондықтан да халық үшін Ауған соғысы ардагерлері – жоғары рухтың көрінісі. Ардагерлерін қадірлеп, рух жасампаздығын жаңғыртайық», деген ізгі тілегін білдірді.
Кейіннен жиылған қауым мен ардагерлердің құрметіне ақ халаттылар өз өнерін паш етті. Көпбейінді оңалту бөлімінің мейірбикесі Айдын Совет «Ауғанстан» әнін шырқаса, неврология бөлімінің қызметкері Минира Торокулова «Ауғанстан қасіреті», терапия бөлімінің аға мейірбикесі Мөлдір Балтабай «Ән сал сарбаз», физиотерапия бөлімінен Айбек Қасымахын нақышына келтіре өлең оқып, клиника-диагностикалық бөлім мейірбикелері «Алға, қазақ жігіттері» әнін шырқады.
Сондай-ақ сазды кештің сарыны, тағылымды кездесудің тәліміне бойлаған ардагерлер госпиталь қызметкерлерінің сапалы қызметіне сай берілген марапатын табыстады. Жылы лебіз білдіріп, госпиталь әкімшілігі мен ұжымға алғысын жаудырды. Ауқымды іс-шара жарқын жүздесуге толы болды. Кеште генерал майор Марат Әлімжанұлы өзінің жасағындағы сарбазы Олег Озеровті «күтпеген жерден» кездестіріп, ерекше сезімге бөленгенін баяндады. Ардагерлерін ұлықтап қана қоймай, қанша жылдан кейін бір ортада табыстырған госпиталь ұжымына алғыс айтты.
Кеш соңында естеліктер айтылып, ұзақ уақытқа дейін ардагерлер өзара қауқылдасып жатты. Сол күні көпшілік құнды кешті ғана қызықтап қоймады, өнерпаздардың ыстық ықыласы, мейманасы тасыған ардагерлер мен ізетті дәрігерлер қауымының әрбір әрекеті ерліктің даңқы мәңгі өшпейтінін айғақтап тұрды.
Дастан ҚАСТАЙ,
журналист
АЛМАТЫ
