Президент айтқандай, мәслихаттар халықтың мәселесін шеше алатын күшке айналуға тиіс. Ол үшін әрбір депутат белсенді болып, өңірге инвестиция тарту, жаңа өндіріс орындарын ашу жұмыстарына атсалысуы қажет. Түркістан облысындағы 337 депутат осы жұмыстарды үйлестіруге белсене қатысса, жақсы нәтижелерге жетеміз деп санаймын. Бұл міндеттерді іске асыруға бізде ресурс та, мүмкіндік те бар. Ең бастысы – елімізде тұрақтылық пен тыныштық берік орныққан. Сондықтан түрлі геосаяси жағдайлар орын алып, әлем қырғи-қабақ қатынастардың ең қиын кезеңдерін бастан өткеріп отырғанда еліміз инвестициялар үшін тартымды десек те болады.
Мемлекет басшысы Үкіметтің кеңейтілген отырысында негізгі капиталға салынған инвестицияның ішкі жалпы өнімге шаққандағы үлесі азайып бара жатқанын айтып өтті. «Бұл күрделі жағдай деуге болады. Себебі экономикаға жеткілікті қаражат салынбай жатыр. Соның салдарынан алдағы жылдары елдің даму қарқынын сақтап тұрудың өзі қиын болуы мүмкін. Сондықтан ішкі және сыртқы инвестицияны айтарлықтай көбейту керек», деді Президент. Осы орайда шетелдік инвестициялар тарту ісінде белсенді әрекет етіп, инвесторлар үшін неғұрлым оңтайлы жағдайлар жасауға ұмтыла беруіміз керек. Елімізге инвестиция көп тартылса, соғұрлым экономикамыз дамитынын естен шығармауымыз қажет. Сондай-ақ Мемлекет басшысы міндеттегендей әділетті Қазақстанды құру үшін ең алдымен шағын және орта бизнесті дамытып, өндіріс орындарын ашуға өз үлесімізді қосу – әрқайсымыздың перзенттік парызымыз. Әрине, бұл бір күндік шаруа емес, дегенмен білек түре кірісіп, бірлігіміз бен ынтымағымызды, татулығымыз бен тұрақтылығымызды және өзара ауызбірлігімізді көздің қарашығындый қастерлеп, жұмыла жұмыс істегенде ғана алға қойған мерейлі мақсаттарға қол жеткіземіз.
Түркістан облыстық мәслихат депутаттары өңірдің 17 қаласы мен ауданын аралап, халық алдында есеп берді. Тұрғындарды мазалайтын мәселелерді тыңдап, өзекті мәселелердің шешілуіне оң ықпал ету және атқарылған жұмыстар туралы ақпарат беру мақсатындағы кездесулерді жергілікті тұрғындар жоғары бағалап, құптайтындықтарын жеткізді. Сонымен қатар тұрғындар өздерін мазалайтын мәселелермен бөлісті. Халықты алаңдататын мәселелердің көбі әлеуметтік салаға қатысты. Яғни мектеп, спорт алаңы, мәдениет үйін, денсаулық сақтау мекемелерін салып беруді сұрады. Сондай-ақ ауызсу, сапалы жол, жылдамдығы жоғары интернет, электр энергиясы, табиғи газ, жұмыспен қамту сынды мәселелер алға тартылды. Бүгінде әрбір кездесуде көтерілген мәселелердің барлығы хаттамаға еніп, тиісті ұсыныстармен мемлекеттік органдарға жолданды. Алдағы уақытта оның орындалуы тұрақты бақылауда болады.
Көптеген мәселенің шешімі бюджетке келіп тіреледі. Облысымыздың 2024 жылғы бюджеті 1 триллион 352 миллиард теңгені құраса, соның 90 пайызы республикадан беріледі. Түркістан облысы дотациялы аймақ болғандықтан, көп мәселе орталықтан қаржының бөлінуіне тікелей байланысты. Бұл орайда қосымша кіріс көздерін арттыру мақсатында өңдеу өнеркәсібін дамыту, инвестиция тарту, салық көздерін табу, зауыт-фабрикалар ашуға басымдық беріліп, түрлі жобалар қолға алынған. Осы бағытта өңірлік инвестициялық штаб инвесторлармен тікелей жұмыс жүргізіп, облыс делегациялары шетелдерге барып келді. Бұл жұмыстар өз жемісін бере бастады.
Нұралы ӘБІШОВ,
Түркістан облыстық мәслихатының төрағасы
