![Ауыл олимпиадасына іріктеу басталды](/media/2024/09/12/auyl-olimpiadasyna-irikteu-bastaldy.jpeg)
Олимпиадаға ауыл мектептерінің 9-11 сынып оқушылары қатыса алады. Мұндағы мақсат – еліміздің шалғай елді мекендеріндегі дарынды және талантты балалардың қабілетін анықтап, білімін шыңдау, халықаралық олимпиадаларға қатысуға ынталандыру. Сайыс қағидаларының барлығы ең беделді әлемдік «IMO», «IPhO», «IChO», «IBO», «IGeO», «IOI», «IOL» олимпиадаларының ережелеріне сүйеніп жасақталған.
«Ауыл мектептерінің оқушыларына арналған жалпы білім беретін пәндер бойынша Республикалық олимпиада алғаш рет өткен оқу жылында Оқу-ағарту министрлігінің бастамасымен өткізілді. Білім жарысының былтырғы қорытындысына көз жүгіртсек, ауыл оқушыларының жүлделі орындарға ие болу көрсеткіші сегіз есеге артқанын анық аңғарамыз.
Өткізу қағидаларына сәйкес олимпиада 13 пән бойынша, нақтырақ айтсақ, жаратылыстану-математика бағытындағы 6 пән, қоғамдық-гуманитарлық бағыттағы 7 пән бойынша өткізіледі және 3 кезеңнен тұрады. Былтыр сайыстың бірінші кезеңіне 78 404 оқушы қатысып, 24 122 оқушы келесі кезеңге өтті. Ал республикалық кезеңде 740 оқушы бақ сынады. Қорытынды кезеңде 335 жеңімпаз Оқу-ағарту министрлігінің дипломына, 69 түлек жоғары оқу орындарының білім грантына ие болды», деді «Дарын» республикалық ғылыми-практикалық орталығының директоры Ғаждембек Тұрсынов.
Пәндік олимпиада – оқушылардың санасында алғашқы ғылыми ізденістерге жол салатын, болашақ ғалымдарды шабыттандыратын, ғылыммен еркін айналысатын жастар тобын қалыптастыратын ең ауқымды бағдарламалық сайыс екені анық. Айта кетейік, аталған жарысқа қатысуға барлық ниет білдірушілер «auyl.daryn.kz» сайтына тіркелу қажет. Ал сайыстың өткен жылғы жеңімпаздары таңдаған пәндері сәйкес келсе, биылғы білім бәсекесінің республикалық кезеңіне конкурстан тыс қатыса алады.
«Бұл олимпиада – біз секілді ауыл балаларына өте үлкен мүмкіндік. Мен өзім Ақтөбе облысы, Шалқар ауданы, Тоғыз ауылының тумасымын. Былтырғы ауыл оқушыларына арналған білім сайысына «Қазақстан тарихы» пәнінен қатысып, жеңімпаз атандым. Нәтижесінде, Х.Досмұхамедов атындағы Атырау университетіне грант ұтып алдым, одан бөлек бірнеше бағалы сыйлыққа да ие болдым. Бұл ғылымға деген қызығушылығымызды одан сайын арттырды. Жарысқа дайындықты 10-сыныптан бастаған едім. Осы жылғы олимпиада қатысушыларына да ертерек қамдануды ұсынамын. Өйткені еңбегіңе сай нәтиже көрсетесің. Алдағы уақытта өзім де халықаралық олимпиадаларға оқушы дайындап, білім саласына жақсы ықпал етуге ұмтыламын», дейді ауыл олимпиадасының жеңімпазы Едіге Мадияр.
«Дарын» республикалық ғылыми-практикалық орталығының әдіскері Серікжан Дамысханұлының айтуынша, олимпиада «бір компьютер – бір оқушы – бір камера» қағидаты бойынша өткізіледі.
«Қыркүйекте байқаудың бастапқы, қазанда аудандық, қарашада облыстық, ал желтоқсанда республикалық кезеңі өтеді. Әрбір кезең қорытындысы орталықтың «daryn.kz» сайтында жарияланады. Айта кетейік, іріктеу онлайн-платформада жүзеге асады. Олимпиаданың IV республикалық кезеңіне жаратылыстану-математика бағытындағы 9-11(12) сынып оқушылары, ал қоғамдық-гуманитарлық бағыттағы 10-11(12) сынып оқушылары қатысады. IV кезеңнің жеңімпаздары алдағы зияткерлік жарыстарға дайындалу үшін оқу-жаттығу жиындарында білімдерін шыңдайды», дейді С.Дамысханұлы.