Сурет: instagram.com/turkistan_oblysy
Әли Бектаев пен Мұрат Қадырбек Түркістан қаласы мен Отырар ауданында болды. Сенаторлар Түркістанда «Turan» арнайы экономикалық аймағының аумағында орналасқан «Алтын дала мақта» мен «Turkestan тextile» өндірістік нысандарының жұмысымен танысып, еңбек ұжымдарымен кездесті. Кездесуде олар Парламенттің сессиясы кезінде қабылданған, кәсіпкерлікті дамытуға бағытталған заңдар туралы, өндірістік аймақтың инвестициялық ахуалын жақсартудың, экспорттық әлеуетін арттырудың маңызын айтты.
Сондай-ақ депутаттар Түркістан қаласының активімен кездесіп, онда қаланың әлеуметтік-экономикалық дамуы, инфрақұрылымды жаңғырту, ауыл шаруашылығын қолдау, құқықтық жүйені жетілдіру мен халықтың өмір сүру сапасын арттыру мәселелерін талқылады. Кездесу барысында Түркістанның ерекше мәртебесі туралы заңды іске асыру аясында Алаш қозғалысының қайраткерлеріне арналған мұражай ашу туралы бастама көтерілді. Сенаторлар тарихи-рухани мұраны сақтау ісін Үкіметпен бірлесіп қолға алатындарын жеткізді.
Отырар ауданында сенаторлар іске асырылып жатқан инвестициялық жобалармен, оның ішінде «Түркістан мақта агроөнеркәсіптік кешені» көпфункционалды кешеннің құрамындағы заманауи мақта өңдеу зауытын аралады. Олардың айтуынша, кәсіпорын қазір заманауи агротехнологияларды енгізіп, су ресурстарын тиімді пайдалануға ықпал етіп, өңірдің әлеуметтік-экономикалық дамуына үлес қосып отыр. Жалпы, ауыл-аймақтарда су үнемдеу технологиясын дамыту ауыл шаруашылығы тауарын өндірушілерге, өңір экономикасын әртараптандыруға, жаңа жұмыс орындарын құруға зор ықпал етеді.
Ал сенатор Нұртөре Жүсіп Т.Жүргенов атындағы Ұлттық өнер академиясының басшылығымен, профессор-оқытушылар құрамымен кездесіп, өнер саласын дамыту мәселелерін талқылады. Депутат академия еліміздегі негізгі зияткерлік, шығармашылық орталық, сондай-ақ ұлттық өнер мектебінің ұстасы екенін атап өтті. Оның айтуынша, мұнда болашақ сахна, экран мен бейнелеу өнері шеберлерінің көркем ойы, кәсіби мәдениеті, азаматтық жауапкершілігі қалыптасады. Сенатор өнер саласына білікті маман даярлау мәселесін де алға тартты.
«Көркемдік білім беру жүйесінің алдында кәсіби дағдыны жеткізу ғана емес, ұлттық бірегейлікті сақтай отырып, жаһандық кеңістікте жұмыс істей алатын мәдени жауапты, бәсекеге қабілетті тұлғаны қалыптастыру міндеті тұр. Оқытушылар, олардың мамандыққа деген талапшылдығы мен адалдығы болашақ отандық өнердің сапасын айқындайды. Қазір білім бағдарламаларын жаңарту, оқытудың практикалық құрамдас бөлігін күшейту мен театр, киностудия, мұражайлар мен халықаралық мәдени институттармен ықпалдасу өзекті болып отыр. Бұл мемлекет пен кәсіби қоғамдастықтың өзара тығыз іс-қимылын талап етеді», деді депутат.
Сонымен қатар сенатор Алтынбек Нұхұлы Бұқар жырау атындағы Павлодар облыстық әдебиет және өнер мұражайында болды. Ол мекеменің қызметімен, кейінгі жылдары табылған жаңа экспонаттармен, жүзеге асып жатқан цифрлық жобалармен танысты. Эвакуация, өрт қауіпсіздігі, күзет, климаттық ерекшелік және сақтау жағдайы бойынша талаптармен қоса мұражайларға ұлттық қауіпсіздік стандарттарын әзірлеу мәселелері қаралды. Сенатор ұжымның айтылған ұсыныстарын одан әрі пысықтауға алып, олардың іске асырылуына қолдау көрсетуге дайын екенін атап өтті.
Бұған қоса А.Нұхұлы Екібастұз қаласының әкімі Аян Бейсекинмен кездесіп, Екібастұз қалалық мәслихатының сессиясына қатысты. Онда қаланың бір жылдағы әлеуметтік-экономикалық дамуының қорытындысы шығарылып, Мемлекет басшысының өңірлік инфрақұрылымды жаңарту, халықтың өмір сүру сапасын арттыру, экологиялық қауіпсіздікті қамтамасыз ету және жастарға жаңа мүмкіндік жасауға бағытталған тапсырмаларын іске асыру мәселелері қаралды. Сенатор мәслихат депутаттарына қала дамуының оң серпінін сақтауға бағытталған міндеттерді табысты іске асыратынына сенім білдірді.
